الماتى وبلىسى ەڭبەكشىقازاق اۋدانىنىڭ تۇرعىنى پنيەۆماتيكالىق قارۋمەن باقشاسىنا كىرىپ كەتكەن ءتورت جاستاعى بالانى اياعىنان اتىپ قۇلاتقان. بىرنەشە بالا كورشىنىڭ قورشاۋسىز اۋلاسىندا ويناپ جۇرگەن، دەپ حابارلايدى NUR.KZ
بۇل تۋرالى پورتال تىلشىسىنە جابىرلەنۋشىنىڭ اناسى ايتىپ بەردى. بەس بالانى جالعىز ءوزى تاربيەلەپ وتىرعان مايرا ءىبىلجاننىڭ سوزىنشە، بۇل جاعداي بويىنشا قوزعالعان قىلمىستىق ءىستى اۋداندىق ىشكى ىستەر ءبولىمى كوپ ۇزاماي جاۋىپ ۇلگەرگەن. الايدا زاڭگەردىڭ ارالاسۋىمەن پروكۋراتۋراعا حات جازىپ، ونى قايتا قاراتۋعا مۇمكىندىك الدى. سوندا دا جالعىزباستى انانىڭ قورقىنىشى سەيىلەر ەمەس. قىلمىستىق ءىستى اۋداندىق ىشكى ىستەر بولىمىندەگى تۋرا سول مامان قايتا قاراۋىنا العان. مايرا ءىبىلجان وبلىستىق ىشكى ىستەر دەپارتامەنتىن وسى ءىستى قاداعالاۋدى ءوتىنىپ وتىر.
ءتورت جاستاعى ابدىكەرىموۆ اقجولدىڭ اياعىنا وق اتقان 40 جاستاعى كورشىسى بولىپ شىقتى.
ءقازىر ءبۇلدىرشىن اياعىن سىلتىپ باسادى. اناسىنىڭ ايتۋىنشا اقجول ءسۇرىنىپ قۇلاي بەرەتىن بولعان. فوتودان كورىنىپ تۇرعانداي، پورتال رەداكسياسىنا جەتەم دەگەنشە ول قۇلاپ، ءۇستىن تاعى بىلعاپ الدى.
«7 قىركۇيەك كۇنى جۇمىستان كەلسەم، بالامنىڭ ءۇستى سۋ، جىلاپ وتىر ەكەن. بالام بۇزىقتىق جاساپ قويدى ەكەن دەپ ويلادىم. ودان ءسال ۇلكەنىرەك ءبىرىنشى سىنىپ وقيتىن قىزىمنان سۇراسام، كورشى بالالار وينايتىن جاقتا اتتى دەدى. بۇلار بالا ەمەس پە، كورىشىمىزدىڭ باقشاسىنا كىرىپ كەتىپتى. ونىسى دۇرىستاپ قورشالماعان دا. اياعى قان جوسا. بالامدى جۋىندىرىپ، جاڭاعى ءۇيدىڭ ۇلكەندەرىنە باردىم. اپاسى شىقتى. مەن ول كىسىگە: «كىشكەنتاي بالاعا ويناۋعا سونداي اتىلاتىن مىلتىق بەرە مە؟»، - ۇرىستىم. كورشى، ونىڭ ۇستىنە كىشكەنتاي بالا عوي دەپ ودان ارىگە بارمادىم»، - دەيدى مايرا.
ۇيگە كەلگەندە كىشكەنتاي اقجول مازاسى قاشىپ، جىلاي بەرەدى. ەسى شىققان اناسىنىڭ ويىنا ۇلىنىڭ اياعىندا وقتىڭ بار-جوعى كىرىپ شىقپاپتى. كوشەدەن ءبىر تانىس جىگىتتى شاقىرىپ الىپ، اقجولدى اۋىلدىق فەلدشەردىڭ ۇيىنە اپارعان.
«اۋىلدىق مەدبيكە ۇلىمنىڭ اياعىن كورىپ، وق تيگەن جەردە بىردەڭە بولۋى مۇمكىن ەكەنىن ايتىپ، باسقا ۇلكەن اۋىلدىڭ اۋرۋحاناسىنا بارۋعا كەڭەس بەردى. قايتىپ كەلە جاتقاندا جاڭاعى ۇلىمدى كوتەرىسىپ اپارعان جىگىت اياعىنان كىم اتقانىن سۇرادى. سوندا عانا وعان وق اتقان بالا ەمەس، ەرەسەك ادام ەكەنىن بىلدىك. «ءبىزدىڭ ەسىكتىڭ الدىنان وتەتىن قىزىل ماشيناداعى اعا» دەگەن ءسوزدى ەستىگەننەن كەيىنگى مەنىڭ ءتۇرىمدى ەلەستەتىپ كورىڭىزشى»، - دەيدى كەلىنشەك.
اقجول ابدىكەرىموۆ سول كۇنى بالاباقشادا بولۋى كەرەك ەدى. الايدا ءبىر سەبەپتەرمەن بارماي، ۇيدە قالعان. ول ءبىرىنشى سىنىپ وقيتىن اپكەسى، كورشىنىڭ ەكى بالاسىمەن اۋلادا قۋالاسپاق ويناپ ءجۇرىپ، بىرەۋدىڭ قورشاۋسىز اۋلاسىنا كىرىپ كەتكەن.
مايرا ءىبىلجان وق اتقان كورشىسىنىڭ بالاسىن ادام تۇگىلى يت قۇرلى كورمەي باسىنىپ وتىرعانىن ايتادى. ول ءتىپتى قانسىراپ تۇرعان بالانى اۋرۋحاناعا اپارۋعا جاراماعان.
اۋىلدىق اۋرۋحانادا اياعىنا تيگەن وقتى تابا الماعان دارىگەرلەر، بالانى اۋداندىق اۋرۋحاناعا جىبەرەدى. ول جەردە حيرۋرگ بولماي، وتەگەن باتىر اۋىلىنداعى بالالار اۋرۋحاناسىنا كەلگەن. اقجولدىڭ اياعىنا كىرگەن وق بىرنەشە سانتيمەترگە تومەن ءتۇسىپ كەتكەن ەكەن. دارىگەرلەر وقتى حيرۋرگيالىق جولمەن العان. ۇيدە قالعان بالالارىن ويلاعان كەلىنشەك اۋرۋحاناعا جاتۋدان ەرىكسىز باس تارتىپتى.
وسى جايت قىلمىستىق ءىستىڭ جابىلىپ قالۋىنا مۇرىندىق بولىپ وتىر دەپ ەسەپتەيدى جالعىزباستى انا.
ءوز كەزەگىندە زاڭگەر اسىلحان وتاشيەۆ بۇل وقيعا بويىنشا قوزعالعان قىلمىستىق ءىستىڭ زاڭسىز جابىلعاندىعى جونىندە پروكۋراتۋراعا شاعىم ءتۇسىرىپ، ونى قايتا كوتەرۋگە مۇمكىندىك الدى.
ءتورت جاسار اقجولدىڭ اياعىنان اتقان ازاماتقا قاتىستى ءىستى مەديسينالىق ساراپتاماعا سىلتەمە جاساي وتىرىپ جاپقان. الايدا زاڭگەر ساراپتامانىڭ قىلمىستىق ءىس جابىلىپ، 23 كۇن وتكەن سوڭ تاعايىندالعانىن، جانە بالانىڭ مەديسينالىق كارتاسىنا عانا نەگىزدەلىپ جاسالعانىن انىقتادى.
«ءىس قايتا قارالىپ جاتىر. بۇل كىسىنىڭ باستى قورقىنىشى - ءىستى قايتا جاۋىپ تاستاماي ما دەگەن كۇدىك. مۇندا كەلۋ سەبەبى دە - قىلمىستىق ءىستى جۇرگىزۋدى وبلىستىق ىشكى ىستەر دەپارتامەنتى باقىلاۋىنا السا دەگەن وي. ەڭبەكشىقازاق اۋدانىندا قىز زورلايدى - ءىستى جاۋىپ تاستايدى، جول-كولىك وقيعاسى بولادى - ءىستى جاۋىپ تاستايدى. وسىنداي جاعداي ورىن الماسا ەكەن دەپ تىلەيمىز»، - دەيدى زاڭگەر.
