ەلىمىزدە تۇڭعىش رەت ساڭىراۋلاردىڭ ەستۋ قابىلەتىن قالپىنا كەلتىرەتىن وتا جاسالدى. سونىڭ ارقاسىندا تۋعانىنان ناۋقاسقا شالدىققان بوزبالا دەرتىنەن ايىقتى، دەپ حابارلايدى ەۋرازيا ءبىرىنشى ارناسى.

مۇنداي وپەراسيالاردى امەريكا مەن ەۋروپا ماماندارى 50 جىلدان بەرى قولدانىپ كەلەدى.

ەندى جاڭا تەحنولوگيانىڭ ارقاسىندا كەرەڭ بولىپ تۋىلعان 800-دەن استام بالاعا العاش رەت اتا-اناسىنىڭ داۋىسىن،  جىلى لەبىزىن ەستۋ باقىتى بۇيىرماق.

17 جاستاعى رامازان ءالى كۇنگە دەيىن اتا-اناسىنىڭ داۋىسىن ەستىمەگەن. تۋا ءبىتتى ناۋقاسقا شالدىققاندىقتان جاقىندارىمەن تەك ىمداپ قانا سويلەسەدى. الايدا، ەندى بوزبالانىڭ تاعدىرى تۇبەگەيلى وزگەرۋى مۇمكىن.

«تۇركىستان قالاسىنان كەلىپ وتىرمىز. شاقىرتۋ بويىنشا 3 جىلدان بەرى وسىندا كەلىپ قارالىپ جاتىرمىز. بالانىڭ قۇلاعىنىڭ تۋىلعاننان وسىنداي. سونى ەمدەتۋگە، قۇلاعىن جاقسى ەستىتۋگە كەلىپ وتىرمىز» — رامازاننىڭ اكەسى عافۋر جوراباي ۇلى.

مامانداردىڭ ايتۋىنشا ەلىمىزدە مۇنداي وتاعا مۇقتاج جاندار جەتەرلىك. ونىڭ ىشىندە بالالار دا بار.

«ەلىمىزدە قۇلاعىندا كەمىستىگى بار 800-دەن استام بالا بار. ونىڭ بىرەۋىنىڭ جاسى 17-دە. ولاردىڭ ازداعان بولىگى عانا وسى ماسەلەنى كوتەرىپ دابىل قاعادى» — دەيدى اۋرۋحانانىڭ ورتالىق مەڭگەرۋشىسى ايگۋل مەدەۋلوۆا.

ەستۋ قابىلەتى ناشار ناۋقاستاردىڭ قۇلاعىنىڭ ارتىنداعى سۇيەككە ارنايى يمپلانتانت بەكىتىلەدى.  ول دىبىستاردى ميعا جەتكىزۋ قىزمەتىن اتقارادى. مۇنداي وتا ەلىمىزدە تۇڭعىش رەت رامازانعا جاسالۋدا. شەبەرلىك سىنىبىن وتكىزۋ ءۇشىن گوللانديادان دارىگەر مامان شاقىرتىلعان.

«يمپلانتانتتىڭ ارتىقشىلىقتارى كوپ. ءقاۋىپسىز ءارى وتا بار بولعانى 30 مينۋتقا سوزىلادى.  حيرۋرگتار تەز ۇيرەنىپ الادى. سونىمەن قاتار يمپلانتانت شاعىن بولعاندىقتان كورىنبەيدى. ءارى ناۋقاس  وسى ۋاقىتقا دەيىن ەستىمەي كەلگەن دىبىستاردى ەستۋ مۇمكىندىگىنە يە بولادى» — دەيدى حيرۋرگ  يان لەدەر.

بۇل اۋرۋحانا ناۋقاس بالالارعا تولىققاندى ءومىر سۇرۋگە العاش رەت مۇمكىندىك سىيلاپ وتىرعان جوق. قاڭتار ايىندا ءبىز ءۇش جاسار ايانا راحات تاعدىرى تۋرالى ايتقان بولاتىنبىز. ءبۇلدىرشىن سويلەۋگە مۇمكىندىك بەرمەيتىن سيرەك كەزدەسەتىن ناۋقاسقا شالدىققان. سول كەزدە دارىگەرلەر كومەكتەسە الاتىندارىن مالىمدەگەن بولاتىن.

«ناۋرىز ايىندا ءبىز شەت ەلدىك مامانداردىڭ قاتىسۋىمەن  تاعى ءبىر شەبەرلىك سىنىبىن وتكىزۋدى جوسپارلاپ وتىرمىز.  ناۋقاستى لازەردىڭ كومەگىمەن ەمدەۋگە بولادى» — دەيدى اۋرۋحانانىڭ ورتالىق مەڭگەرۋشىسى ايگۋل مەدەۋلوۆا.

رامازانعا جاسالعان وپەراسيا ءساتتى اياقتالدى. ءبىر ايدان كەيىن ول تولىعىمەن ساۋىعىپ كەتەدى. مۇنداي وتانىڭ قۇنى شامامەن 3 ميلليون تەڭگە تۇرادى. ءقازىر دارىگەرلەر ەمنىڭ بۇل ءتۇرىن تەگىن مەديسينالىق قىزمەت تىزىمىنە قوسۋدى كوزدەيدى. ەگەر دەنساۋلىق ساقتاۋ مينيسترلىگى ماقۇلدايتىن بولسا، قۇلاعىندا كەمىستىگى بار بالالارعا اتا-ناسىنىڭ داۋىسىن ەسۋ مۇمكىندىگى تۋادى.