بۇگىنگى رەپورتاجدىڭ كەيىپكەرى سۋپەر-مودەل، تابىستى كاسىپكەر، ياكي ساحنا جۇلدىزى ەمەس. ول بار بولعانى شىمكەنت قالاسىنداعى كوممۋنالدىق قىزمەت كورسەتۋشىلەردىڭ ءبىرى - نۇسقالييەۆا لەيلا جولتاي قىزى. 1969 جىلى دۇنيەگە كەلگەن ازاماتشانىڭ جولداسى ومىردەن قايتقان. جالعىز قىزى بار دەپ جازادى szh.kz.

تاڭەرتەڭ دالاعا شىققانىڭىزدا اۋلانىڭ سىپىرىلىپ، تازا تۇراتىنىن ءسىز دە بايقايتىن شىعارسىز؟ تۇندە كورگەن قوقىستار دا جوق. كوشەگە شىققانىڭىزشا قالانى ايناداي ەتكەن كىم؟ كۇنى-تۇنى قاردان، قوقىستان تازارتىپ، گۇل مەن تالدى سۋارىپ جۇرەتىن جاندار تۋرالى نە بىلەسىز؟ ولاردىڭ جۇمىسىن جەڭىلدەتىپ، ياكي اۋىرلاتۋعا ات سالىسىپ جۇرگەندەردىڭ ءبىرى ەمەسسىز بە؟ 

تاڭعى ساعات 4.00-دە ول وزىنە تاڭعى اسى مەن تۇستىگىن دايارلايدى. جەكسەنبى كۇنى دەمالىس. ەگەر دالادا قار جاۋسا، دەمالىسقا قاراماستان جۇمىسقا شىعادى.

“جىلى كيىمدەردى بىزگە جۇمىستان بەرەدى. ءبىراق قانشا قىمتانىپ، ورانىپ الساق تا، سۋىق”، – دەيدى لەيلا.

اۆتوبۋس پاركىنە جەتۋ ءۇشىن ول كۇن سايىن 1 كم جول جۇرەدى. ارنايى كولىك ساعات 5.30-دا ونى باسقا قىزمەتتەستەرىمەن بىرگە اۋداننىڭ ءار ايماعىنا جەتكىزەدى.

“العاشىندا وسى جۇمىستان ۇيالىپ، “تانىستارىم كورىپ قالماسىن” دەپ جاسىرىنىپ جۇرەتىنمىن. كەيىننەن “ەڭبەك ەتىپ، ادال نان تاۋىپ ءجۇرمىن عوي” دەپ بەكىندىم”، – دەيدى لەيلا.

ول ءار كۇن سايىن 5 000 شارشى مەتر جەردى تازالايدى. “جۇمىس اۋىر. ءبىراق جەڭىلىنە بارساڭ، نان جوق”، – دەيدى اۋلا سىپىرۋشى.

لەيلا وسى قىزمەتتە 10 جىلدان بەرى جۇمىس ىستەپ كەلەدى.

ونىڭ ايلىق تابىسى – 54 مىڭ تەڭگە. “تۇرمىسىما نەگىزى جەتكىلىكتى اقشا. ءبىراق قىزىم ستۋدەنت بولعان سوڭ، كەيدە قيىندىقتار تۋىپ جاتادى”، – دەيدى ول.

“نەبىر ادامداردى كەزدەستىرۋگە بولادى. كەيبىر جاس بالالار كومەكتەسىپ جاتادى، ال كەيبىرەۋلەرى ادەيى قوقىس تاستايتىنداي كورىنەدى. سوندا دا ومىردە مەيىرىمدى، جاقسى ادامدار كوپ”، – دەپ اتاپ ءوتتى ول.

“تۇسكى استى وزىمىزبەن بىرگە الا كەلەمىز. ءبىراق قىستا ول ءبارىبىر سۋىپ قالادى عوي. كۇندەلىكتى ارنايى بۋدكادا تاماقتانامىز. كەيدە بولادى، تۇرعىن ۇيلەردىڭ جورتولەسىنەدە (پودۆال) تۇستەنەمىز”، – دەپ قىمسىنىپ جىميدى لەيلا.

“كوبىنىڭ باسىندا نەسيەسى بار. كەيبىرى – وتباسىننىڭ جالعىز اسىراۋشىسى. ءبىراق مۇنداي ماسەلەلەر ءبىزدىڭ جادىراپ جۇرۋىمىزگە توسىق بولمايدى. ءبىر-بىرىمىزدى كۇلىپ قارسى الامىز”، – دەيدى لەيلا.

“كەيبىر كولىك يەلەرى ماشينالارىن ءدال ادام جۇرەتىن، ءبىز تازالاۋ كەرەك جەرلەرگە قويىپ قويادى. بۇل ءبىزدىڭ جۇمىسىمىزعا قاتتى كەدەرگى كەلتىرەدى”، – دەيدى ول.

“مەن ءوز ماماندىعىممەن ماقتانامىن. قالانى تازارتىپ، ناتيجەسىن كورگەندە، كوزىم قۋانادى. قالا تازا بولسا، ادامداردىڭ دا كوڭىلى جاي”، – دەيدى لەيلا.