ازيادا-2011 قورىتىندىسى بويىنشا قازاقستان 32 التىندى الىپ رەكورد ورناتقان ەدى. مۇنداي كورسەتكىشكە ازيادا تاريحىندا بىردە-بىر ەل قول جەتكىزبەدى. 2ء-شى ورىن العان جاپونيا سپورتشىلارى ول كەزدە تەك 13 مارتە تۇعىرعا كوتەرىلدى. جاپونيا، وڭتۇستىك كورەيا جانە قىتايدى قوسقاندا ءۇش ەل 37 مەدال الىپ، ءبىر قازاقستاننىڭ كورسەتكەن كورسەتكىشىنە جەتپەدى دەپ جازادى camonitor.kz. سىني ماقالا "قامشى" پورتالىنىڭ نازارىنان تىس قالمادى. "دوس جىلاتىپ ايتاتىنىن" ەسكەرە وتىرا ماتەريالدى قازاق تىلىنە اۋدارىپ، وقىرمانعا ۇسىنۋدى ءجون دەپ تاپتىق.
الايدا 6 جىل وتكەننەن كەيىن ءتورتىنشى ورىنعا سىرعىپ كەتتىك. ازيادا قىسقى ويىنداردان مىقتى تەك 4 ەل بارىن ەسكەرسەك، ءبىز ەڭ سوڭعى ورىن الىپ وتىرمىز دەپ ايتۋعا بولادى.  ءبىزدىڭ سپورتشىلاردىڭ العان مەدالى ەكى ەسەگە قىسقاردى. ونى مىنا كەستەدەن بىلۋگە بولادى.

ازيادا-2011 وتپەس بۇرىن قازاقستاندىق سپورت باسشىلارى الدىڭعى شەپتە كورىنۋ ءۇشىن بارىن سالدى. بىرنەشە ۋاقىت وتكەننەن كەيىن جاساعان «رەكوردى» وزدەرىنە بالە بولىپ جابىساتىنىن بىلمەدى دە. سەبەبى وتكەن ناتيجەمەن ولاردىڭ كەلەشەكتەگى ناتيجەسىن سالىستارىنىن ەسكەرمەدى. ەندى مىنە سول ءسات كەلدى. قىسقى ويىندار باستالماس بۇرىن جاريالانعان «ازيادا ي ازياچينا» ماقالاسىندا ازيادا-2011 باعدارلاماسى تۋرالى، قازاقستاندا رەكورتتىق كولەمدە التىن مەدالداردى الىپ بەرەتىنى تۋراسىندا جازدى. ونىڭ بولجامى ءدال كەلدى.

سول كەزدە كوبى ماقالا اۆتورىن باسقا ەلدەردە ءوز سپورتشىلارىنا ءوز ەلىندە  قولداۋ بىلدىرەتىنىن ايتىپ،  وتانعا دەگەن سۇيىسپەنشىلىكى جوق دەپ سىناعان ەدى.

ازيادا-2017 باعدارلاماسىن قاراڭىز، وندا وليمپيادالىق ويىندارعا بارىنشا جاقىن. ونى وتكىزىپ وتىرعان ەل ودان ەشقانداي پايدا تابۋدى كوزدەمەگەنىن اڭعارۋعا بولادى. وعان مىنا اقپارات دالەل.

جاپوندىقتار شاڭعى قوسسايىسىنان الەمدە كوش باستاپ تۇر. الايدا سارى قۇرىلىقتا ولارعا باسەكەلەس بولا الاتىن ەل بولماعاندىقتان بۇل سپورت ءتۇرىن ازيادادان الىپ تاستادى. ءدال وسى سەبەپپەن ساپپوردا ايەلدەردىڭ ترامپليننان سەكىرۋ ءتۇرى بولمادى. ياعني قازاقستاندىق ۇيىمداستىرۋشىلارعا قاراعاندا ولار ازيا ويىندارىن ءادىل وتكىزدى. بارلىعى بىردەي جاعدايدا باسەكەگە تۇسكەندە عانا مىقتىنى انىقتاۋعا بولادى.  

قازاقستاننىڭ قورجىنىنا تۇسكەن مەدالداردىڭ كوبىن بياتلونيستەر جەڭىپ العان. ولار جەتى جارىستىڭ، الىتىسىندا جەڭىسكە جەتتى.

مانەرلەپ سىرعاناۋدى دا الايىق. ساپپوراعا ءبىزدىڭ ەكى كوشباسشى سپورتشىلارىمىز دەنيس تەن مەن ەليزابەت تۇرسىنبايەۆا باردى.

دەنيس تەن ساپپورادا ءساتسىز ونەر كورسەتكەننەن كەيىن سپورتشى كوپ جاعىمسىز پىكىر ەستىدى. تەك بىزدە عانا سپورتشىلار جەڭىسكە جەتكەندە زور ماقتانىشقا يە بولادى دا، جەڭىلىپ قالسا سىننىڭ استىنا قالادى. مانەرلەپ سىرعاناۋدا كوبى پسيحولوگياعا بايلانىستى. ءتىپتى ەڭ مىقتى دەگەن سپورتشىلاردىڭ ءوزى ساتسىزدىككە ۇشىراۋى مۇمكىن.

سونىمەن قاتار، ەليزابەت تۇرسىنبايەۆانىڭ دا قولا مەدالىن دە اسىرا ماقتاۋدىڭ قاجەتى جوق. ول الەمدىك رەيتينگتە وزىنەن تومەن تۇرعان ەكى سپورتشىنى جىبەرىپ العانىن ەسكەرۋ كەرەك.  

جاقىندا ناۋرىز ايىندا ەكى سپورت تۇرىنەن الەم چەمپيونى وتەدى. ولار – شورت-ترەك پەن فريستايل. اتالعان سپورت تۇرىنەن مەدال الاتىن بولارمىز. ازىرشە شاڭعى جارىسىن باقىلاۋعا بولادى.

اۆتور: جەڭىس بايحوجا

اۋدارعان: اسەم المۇحانبەت