№58 مەكتەپ-گيمنازياسىندا ساباق بەرەتىن ءمۇعالىمنىڭ بۇل ارەكەتىن ءبىلىم باسقارماسى تەكسەرەدى، دەپ حابارلايدى Sputnik پورتالى
جەتىنشى سىنىپ وقۋشىسىنىڭ اناسى ەلوردالىق №58 مەكتەپتە سىنىپ جەتەكشىنىڭ قىزىنا قول جۇگىرتكەنىن مالىمدەدى.
ايەل ادام بۇل تۋرالى قوعام قايراتكەرى مارات قابىلبايەۆقا ايتقان. ول Facebook پاراقشاسىندا جازعان سوڭ، بۇل وقيعا كوپشىلىككە ايان بولدى. ءبىلىم باسقارماسى ءىستىڭ انىق-قانىعىنا جەتىپ، جاريالى تۇردە تۇسىنىكتەمە بەرۋگە ۋادە بەردى.
تەلەفون ارقىلى سۇحبات بەرگەن قىزدىڭ اناسى 14 اقپان كۇنى قىزىنىڭ مەكتەپتەن جىلاپ كەلگەندىگىن ايتتى. ول "ءمۇعالىم ساباق سوڭىنان الىپ قالىپ، قولىم مەن يىعىمنان سيپادى" دەپ ايتىپتى. وقۋشىنىڭ سوزىنە سۇيەنسەك، ءمۇعالىم "باسقا قىزدارعا دا تيىسەدى"، ءبىراق ولار مۇنى ايتۋعا قورقادى ەكەن.
بۇدان بۇرىن سىنىپ جەتەكشىسى دەنە شىنىقتىرۋ كەزىندە مۇعالىمگە بايقاۋسىزدا دوپ تيگىزىپ العان ەر بالانى ۇرىپ جىبەرگەن.
ايەل ادامنىڭ ايتۋىنشا، 18 اقپان كۇنى مەكتەپتە جينالىس ءوتتى، ءبىراق ديرەكتور دا، مەكتەپ پسيحولوگى دا قاتىسپاپتى. ەسەسىنە جينالىسقا كەلگەن وقۋ ءىسى مەڭگەرۋشىسى مەن وزگە مۇعالىمدەر ارىپتەستەرىن ماقتاپ، بولعان وقيعانىڭ تۇسىنبەۋشىلىك ەكەنىن ايتقان.
"مەن مۇعالىممەن سويلەستىم، جاسى 22-دە. مەكتەپكە قاراشا ايىندا ورنالاسقان، ەكىنشى توقساندا. باسىندا جىلاپ، ەشتەڭە ايتا المادى. مۇعالىمدەر ونى قورعاشتاپ ەدى، وزگەرىپ سالا بەردى. قىزىمدى سيپاعانىن مويىنداپ، مۇنى وقۋشىلارىمدى جاقسى كورگەننەن دەدى. باسقا قىزدارعا تيىسپەگەنىن ايتىپ، ءتىپتى ەر بالانى ۇرىپ جىبەرگەنىن دە جوققا شىعاردى. ول جايتتى بۇكىل سىنىپ كورگەن بولاتىن. مەنى جالا جاپتى دەپ ايىپتاۋعا تىرىستى"، — دەيدى ايەل.
وسى وقيعا الەۋمەتتىك جەلىلەردە تارالىپ كەتكەن سوڭ، ءمۇعالىمنىڭ اپكەسى قىزدىڭ اناسىنا حابارلاسىپ، باۋىرى ءۇشىن كەشىرىم سۇراعان. كەيىن ءمۇعالىمنىڭ ءوزى دە قوڭىراۋ شالعان ەكەن.
پىكىر قالدىرۋ