«اكىم» ءسوزىنىڭ قاي زاماندا، قانداي ماعىنادا پايدا بولعانىن ەشكىم دە ءدوپ باسىپ ايتا المايدى. نەگىزگى ءتۇپ ماعىناسىن دا كوپ ادام بىلمەسە كەرەك. ءتىپتى اكىم لاۋازىمىنداعى قۇرمەتتى مىرزالاردىڭ دا بىلمەيتىنى داۋسىز. ءبىر جاعىنان بۇل كەشىرىمدى دە. قازاق ءتىلى اباي اتامىز ايتقانداي «تولعاۋى توقسان» وتە كونە ءتىل. اكىم اعالارىمىز قازاقتىڭ قاي ءسوزىنىڭ ماعىناسىن، شىعۋ تاريحىن زەرتتەپ جاتسىن. نيەتى بولعانىمەن مەملەكەتتىك قىزمەت، قوعامدىق جۇمىستار قول بايلاۋ. ويدى وي قوزعاپ، سوزدەن ءسوز تۋادى. اكىم ءسوزىنىڭ تاريحىنا ۇڭىلگەن بولدىق. ناعىز «اكىم» اتىنا قانداي ازامات لايىق ەكەنىن انىقتاۋدى ماقسات تۇتتىق. «اكىم» ءسوزى تۋرالى كەزىككەن قىزىقتى ءبىر دەرەكتى ۇسىنۋدى ءجون كوردىك.
قاز داۋىستى قازىبەك بي انەت باباعا سالەم بەرە بارىپ، ءبىر اۋىز وسيەت ايتۋدى وتىنسە كەرەك. سوندا انەت بابا تەرەڭ ويعا باتىپ:
-جارايدى، ايتايىن. «اكىم» دەگەن ءسوزدى جادىڭدا ساقتا، - دەپتى. قازىبەك بي انەت باباعا ريزاشىلىعىن ءبىلدىرىپ، جورا-جولداستارىمەن ەلىنە قايتادى. ول جول-جونەكەي جانىنداعى جولداستارىنان:
-انەت بابانىڭ قانداي وسيەت ايتقانىن ۇقتىڭدار ما؟ – دەپ سۇرايدى. ءبىراق بۇل ساۋالعا ەشكىم ۇندەمەيدى. سوندا قاز داۋىستى قازىبەك بي انەت بابانىڭ ايتقان وسيەتىن بىلاي دەپ شەشىپتى:
-«ءا» دەگەنى – ءادىل بول،
-«ك» دەگەنى – كۇنشىل بولما، كوپشىل بول.
-«ءى» دەگەنى – ءىلتيپاتتى بول،
-«م» دەگەنى – مەنمەن بولما، مەيىرمان بول، - دەگەنى» بۇل وسيەت انەت بابادان قازىبەك بيگە، قازىبەك بيدەن قارعا تامىرلى قازاققا مۇرا بولىپ قالدى. ناعىز اكىم اتىنا وسى وسيەتكە ساي كەلەتىن ازامات لايىق سەكىلدى...
قۇرمەتتى، اكىم اعالار! ەگەردە قولىڭىز قالت ەتىپ، وسى ماقالانى وقىپ وتىرعان بولساڭىز ويلانىڭىز. قانداي اكىم ەكەنىڭىزدى بىلگىڭىز كەلسە، انەت بابانىڭ وسيەتىندەگى اكىممەن ءوزىڭىزدى سالىستىرا قاراڭىز.
سونىمەن، ءسىز، قانداي اكىم بولدىڭىز؟!
يشانبەكوۆ ماديار ىلەسكەن ۇلى
جامبىل وبلىسى، سارىسۋ اۋدانى، ساۋداكەنت
پىكىر قالدىرۋ