قوستاناي وبلىسىنىڭ اكىمى ا.مۇحامبەتوۆ قوستاناي ءوڭىرى  كولەمىندە 2017 جىلدى «تاريحقا تاعىزىم» جىلى دەپ بەلگىلەدى. قوستاناي ءوڭىرىنىڭ تاريحىنا قاتىستى بىرنەشە جوبالار قوستاناي وبلىسىنىڭ ىشكى ساياسات باسقارماسى تاراپىنان الەۋمەتتىك تاپسىرىس رەتىندە مەملەكەتتىك ەمەس ۇيىمدار سەكتورىنا ۇسىنىلدى. قازىرگى تاڭدا سول الەۋمەتتىك تاپسىرىستاردى جۇزەگە اسىرۋ مۇمكىندىگىنە يە بولعان ۇيىمدار ءوز جۇمىستارىنىڭ جوسپارىن جۇرتشىلىقپەن تانىستىرۋ كەزەڭىن ۇيىمداستىرىپ جاتىر. سونداي الەۋمەتتىك جوبانىڭ ءبىرى -  "ۇلى دالا تۇلعالارى:كەيكى باتىر". اتالمىش جوبا مەملەكەتتىك ەمەس ۇيىمدار تاراپىنىڭ كەڭ قىزىعۋشىلىعىن تۋدىردى. سەبەبى كەيكى  باتىر ەرلىگى قازاق حالىقىنىڭ  قايتا ورالىپ جاتقان رۋحىنىڭ ءبىر رامىزىندەي بولىپ سانالادى. بىلتىرعى 2016 جىلى تورعاي كوتەرىلىسىنىڭ 100 جىلدىعىنا وراي قوعامدىق نەگىزدە تۋعان جەردىڭ قاسيەتى مەن ءقادىرىن قۇرمەتتەيتىن ازاماتتاردىڭ جەكە باستاماسىمەن «ءور تورعاي – ەرلىك مەكەنى» اتتى دالالىق ەكسپەديسياسى، كورنەكتى قوعام قايراتكەرلەرىنىڭ ىنتا-جىگەرىمەن تورعاي وڭىرىندە  قوعامدىق كەزدەسۋلەر وتكىزىلگەن بولاتىن.  وسىنداي باستامالاردىڭ بيلىك تاراپىنان قولداۋعا يە بولۋى كوڭىلدى قۋانتادى. مۇنداي تاريحي-تانىمدىق  مازمۇنداعى جوبالار جۇرتشىلىقتىڭ تۋعان ولكەنىڭ تاريحىن تانۋعا دەگەن سۇرانىسىن وتەۋگە، جاستاردىڭ بويىندا وتانسۇيگىشتىك ىزگى قاسيەتتەردى قالىپتاستىرۋعا قىزمەت ەتەرى انىق. جوبانى جۇزەگە اسىرۋ مۇمكىندىگىنە يە بولعان «نۇرشاڭىراق» قوعامدىق قورى الەۋمەتتىك جوباسىنىڭ العاشقى قوعامدىق تىڭدالىمىن وتكىزدى. جوبانى تانىستىرۋ بارىسىندا ۇلت-ازاتتىق كوتەرىلىستىڭ قاھارماندىق ءھام باتىرلىق ەرلىك ىستەرىن ناسيحاتتايتىن رەسپۋبليكالىق دەڭگەيدەگى دەباتتىق تۋرنير، كەيكى باتىردىڭ ەلىنە عىلىمي -اعارتۋشىلىق ەكسپەديسيا، امانكەلدى، جانكەلدى اۋدانى، ارقالىق قالاسى، وبلىس ورتالىعى تۇرعىندارىمەن، جاستارىمەن كەزدەسۋ ۇيىمداستىرۋ كوزدەلىپ وتىرعاندارى باياندالدى. تىڭدالىمعا قوستاناي وبلىسى ىشكى ساياسات ءبولىمىنىڭ وكىلى بايمەنوۆا زاۋرە اناۋربەك قىزى، مەملەكەتتىك ەمەس ۇيىمدار جۇمىسىن ۇيلەستىرۋ ورتالىعىنىڭ باسشىسى وتەبايەۆا دينارا قايىربەك قىزى، قوعام بەلسەندىلەرى، ستۋدەنت جاستار قاتىستى. تىڭدالىمعا جينالعان جۇرتشىلىق قولعا الىنىپ وتىرعان جوبانىڭ قولعا الىپ وتىرعان جوسپارلارىنىڭ اسا ماڭىزدىلىعىنا ەرەكشە نازار اۋدارىپ، ونىڭ ءساتتى وتۋىنە تىلەكتەستىك ءبىلدىردى.

وتەگەن يسەنوۆ، قوستاناي مەملەكەتتىك ينستيتۋتىنىڭ وقىتۋشىسى، تاريح عىلىمدارىنىڭ كانديداتى.