«I am singer» جوباسىنىڭ قاتىسۋشىسى قازاقستاندىق ديماش قۇدايبەرگەنوۆتىڭ قىتايداعى تانىمالدىلىعى جايىندا فرانسۋزدىق  France 2  رەيتينگىسى جوعارى تەلەارناسى رەپورتاج ۇسىنعان. بۇل تۋرالى «قامشى» پورتالى «قازاقپارات»-قا سىلتەمە جاساپ  حابارلايدى.

-مىنا عاجايىپ داۋىستى ەستىپ تۇرسىزدار ما؟ بۇل داۋىستىڭ يەسى ديماش. بۇگىن وسى جاس جىگىت تۋرالى، ونىڭ الەۋمەتتىك جەلىدەگى تانىمالدىلىعى تۋرالى ءسوز قووزعايتىن بولامىز. وسى ءاندى ايتىپ ول ءوزىنىڭ اتاعىن شىعاردى- دەپ اتاپ ءوتتى تاڭعى باعدارلاما جۇرگىزۋشىسى.

-ءيا، ول دەنيەل بالاۆۋننىڭ اۋىر ولەڭىن ورىندادى. سوندىقتان ول، ماقتاۋعا عانا ەمەس مەدال تاعۋعا دا لايىقتى، -دەدى جۇرگىزۋشى.

فرانسۋزدىق باعدارلامادا ديماشتىڭ كەلبەتتى، سىمباتتى ءارى تارتىمدى ەكەنىن، سونىمەن بىرگە ءتۇر-تۇلعاسى جاعىنان قىتايلىققا ۇقسايتىنىن دا ايتىلدى. رەپورتاجدا ديماش قۇدايبەرگەنوۆتىڭ ۇلتى قازاق ەكەندىگى، جانە ول قىتايشا بىلمەيتىندىگى دە ءسوز ەتىلدى. الايدا، Weibo الەۋمەتتىك جەلىسىندە ونىڭ 3 ميلليون جانكۇيەرى بار ەكەندىگىن، ال جۇڭگو الەۋمەتتىك جەلىلەرىندەگى ديماشتىڭ ورىنداۋلارىندا 1،5 ملرد قارالىم بولعاندىعىن دا ايتتى.

ايتا كەتەيىك سوڭعى جاڭالىقتار بويىنشا، ديماش 10-تۋردا ءۇشىنشى ورىن الىپ، كەلەسى كەزەڭگە جولداما الدى.