ءقازىر قازاقستاننىڭ رەسەيدەگى وكىلەتتى ەلشىسى قىزمەتىن اتقارىپ وتىرعان يمانعالي تاسماعامبەتوۆ ۇكىمەت باسشىلىعىندا وتىرعاندا قازاقستانداعى بالاباقشالاردىڭ ءبارىن قازاق تىلىنە اۋدارۋعا باستاما كوتەرگەن دەپ حابارلايدى Qamshy.kz.

مەملەكەتشىل تۇلعا يمانعالي نۇرعالي ۇلى ۇكىمەت مۇشەلەرى مەن زيالى قاۋىم وكىلدەرى قاتىسقان جيىندا ءتىل ماسەلەسى تۋرالى ايتا كەلىپ، قازاقستانداعى ەشبىر اتا-انانىڭ قارسى شىقپايتىنىن العا تارتىپ، بارلىق بالاباقشالاردى قازاق تىلىنە اۋدارۋعا باستاما كوتەرگەن.

«ەگەمەندىگىمىزگە، تاۋەلسىزدىگىمىزگە 25 جىل تولدى. ءقازىر بارلىق جەردە بالاباقشالار سالىنىپ جاتىر. نەگە سونى قازاق تىلىندە اشپايمىز» دەيدى تاسماعامبەتوۆ.

ايتا كەتەر بولساق، وتكەن جىلدىڭ جەلتوقسان ايىندا استانادا وتكەن رەسپۋبليكالىق جاستار فورۋمىنىڭ پلەنارلىق وتىرىسىندا جاستار ق ر پرەمەر-مينيسترىنىڭ ورىنباسارى يمانعالي تاسماعامبەتوۆتەن ەلىمىزدەگى ءۇش تۇعىرلى ءتىل ساياساتىنا قاتىستى پىكىرىن ءبىلدىرىپ، «بىرىنشىدەن، زاڭ قابىلدانىپ، قاجەتتى قاراجات ءبولىندى. ماماندار دايىندالدى. بۇگىنگى كۇنى قاراپ وتىرساڭىزدار، پارلامەنتتەگى جالپى جيىنداردىڭ بارلىعى قازاق تىلىندە وتەدى. ۇكىمەتتىڭ ءماجىلىسى قازاق تىلىندە وتەدى. ءبىراق، ءبىر نارسە تۇسىنىكسىز. ءبىز وسى كۇنگە دەيىن، قازاق ءتىلى وزگە ەمەس، وزىمىزگە كەرەك ەكەنىن تۇسىنبەي كەلەمىز. جالپى قازاق ءتىلى دەگەن حالىقتىڭ جانى. بۇدان ارتىق ايتا المايسىڭ» دەگەن بولاتىن. سونداي-اق، قازاق ءتىلىنىڭ دامۋى تۋراسىندا «مىنە، ماسەلە وسىندا، ءبىز بىر-بىرىمىزبەن قازاقشا سويلەسسەك، ءبىز ءوز ءتىلىمىزدى ءوزىمىز قۇرمەتتەسەك، ءبىز وعان شىن مانىندە جاناشىرلىق بىلدىرسەك قانا ءتىلدىڭ بولاشاعى بولادى. ءتىل بار جەردە قازاق بار، ءتىل جوق جەردە قازاق جوق. ءبىتتى، باسقا فورمۋلا جوق بۇل ماسەلەدە"، - دەپ توقەتەرىن ايتقان ەدى.