قاراعاندى وبلىسىندا ەكى جول اپاتىنان بەس ادام جانە ءبىر كىشكەنتاي قىز مەرت بولدى، تاعى ەكى ادام اۋرۋحاناعا جاتقىزىلدى، - دەپ حابارلايدى Tengrinews.kz وبلىستىق ءىىد-نىڭ باسپا ءسوز قىزمەتىنە سىلتەمە جاساپ. 

العاشقى جكو قاراعاندى-بالقاش تاسجولىندا سپاسسك اۋىلىنان 20 شاقىرىم جەردە بولعان. 27 جاستاعى ەر ادام Mercedes Benz كولىگىمەن قارسى باعىتقا شىعىپ كەتىپ، Toyota Fortuner كولىگىنە سوعىلعان. Mercedes جۇرگىزۋشىسى مەن ەكى جولاۋشى وقيعا ورنىندا مەرت بولدى. Toyota Fortuner كولىگىندە بولعان اناسى مەن ەكى جاستاعى قىز اۋرۋحاناعا بارا جاتقان جولدا كوز جۇمعان. Toyota جۇرگىزۋشىسىنە مەدەسينالىق كومەك كورسەتىلدى، ال ونىڭ ۇلى اۋرۋحاناعا جاتقىزىلعان. 

وبلىستىق دەنساۋلىق ساقتاۋ باسقارماسىنىڭ مالىمەتى بويىنشا، سەگىز جاستاعى بالا ءقازىر جانساقتاۋ بولىمىندە جاتىر. ونىڭ جاعى سىنىپ، باسسۇيەك ميى شايقالعان. 

ەكىنشى وقيعا قاراعاندىنىڭ كوسماناۆت كوشەسىندە بولعان. وندا جولاۋشىلار اۆتوبۋسى مەن Mercedes Benz كولىگى سوقتىعىسىپ، 26 جاستاعى جەڭىل كولىك جۇرگىزۋشىسى قازا تاپتى. الدىن الا مالىمەت بويىنشا، اۆتوبۋس جۇرگىزۋشىسى رولگە يە بولا الماي قالعان. اپات ساتىندە اۆتوبۋس سالونىندا 30-داي جولاۋشى بولعان. ولاردىڭ ەكەۋىنە مەدەسينالىق كومەك كورسەتىلدى. اۆتوبۋس جۇرگىزۋشىسى ۋاقىتشا ۇستاۋ اباقتىسىنا قامالدى.

ەكى وقيعا بويىنشا دا قاجەتتى ساراپتامالار تاعايىندالىپ، سوتقا دەيىنگى تەرگەۋ باستالدى. 

الماتى وبلىسىندا قۇلجا تاسجولىندا ەكى كولىكتىڭ سوقتىعىسۋىنان سەگىز ادام مەرت بولىپ، تاعى ءبىر ادام زارداپ شەكتى. وقيعا ناۋرىزدىڭ 23 ناۋرىزعا قاراعان ءتۇنى بولعان. 

وبلىستىق ءىىد-نىڭ باسپا ءسوز قىزمەتىنىڭ مالىمەتى بويىنشا، وقيعا ەڭبەكشىقازاق اۋدانىنىڭ "قازاقستان"اۋىلىنىڭ ماڭىندا بولعان. تاسجولدىڭ 80ء-شى شاقىرىمىندا Nissan Primera جانە Toyota Vista كولىكتەرى سوقتىعىسىپ، جەتى ادام وقيعا ورنىندا مەرت بولدى. تاعى ءبىر ادام اۋرۋحاناعا بارار جولدا كوز جۇمعان. ءتىرى قالعان جولاۋشى ەسىك قالاسىنىڭ اۋرۋحاناسىنا جەتكىزىلدى. 

"بۇل جاعدايعا بايلانىستى ق ر قك-نىڭ 345-بابىنىڭ 4 تاراۋى بويىنشا سوتقا دەيىنگى تەرگەۋ جۇمىستارى باستالدى. ءىس وبلىستىق انىقتاۋ باسقارماسىندا. كەرەكتى ساراپتامالار تاعايىندالدى"، - دەيدى باسپا ءسوز قىزمەتىنىڭ وكىلدەرى.

الدىن الا بولجام بويىنشا، Nissan Primera قارسى باعىتقا شىعىپ كەتكەن.

سونداي-اق، كۋاگەرلەر جول اپاتىنان قازا تاپقانداردىڭ ىشىندە ەكى بالانىڭ بولعانىن ايتادى.