قىلمىس 1996 جىلى مارتۋك اۋدانىندا بولعان. 30 جاستاعى ايەل مەن ونىڭ 17 جاستاعى باۋىرىن زورلاپ، ءولتىرىپ، ال 6 جاستاعى ءبۇلدىرشىن قىز جوعالىپ كەتكەن، دەپ حابارلايدى ينفورمبيۋرو، مالىمەتتىڭ قازاقشا نۇسقاسىن «قامشى» پورتالى وقىرمان نازارىنا ۇسىنادى.

مارتۋك اۋدانىنداعى قاراتۋساي اۋىلى تۇرعىندارىنىڭ زارەسىن العان قىلمىس 1996 جىلدىڭ 22 قاڭتارىندا بولعان. جەكەمەنشىك ۇيدەن 30 جاستاعى ايەل مەن ونىڭ 17 جاستاعى ءىنىسىنىڭ ءمايىتى تابىلعان. زەرتتەۋ بارىسىندا، ولاردى زورلاپ، ءولتىرىپ كەتكەندىگى بەلگى بولعان.  كوز جۇمعان ايەلدىڭ 6 جاستاعى قىزى سول بويى جوعالىپ كەتكەن.

بارىنشا كۇش جۇمىلدىرىپ، ىسكە كىرىسكەنىمەن تەرگەۋ توبى قىلمىستىڭ بەتىن اشا الماعان بولاتىن. ولار تەك اتالمىش وقيعاعا كۋاگەر بولعان ەكى تاكسي جۇرگىزۋشىسىن عانا تاپقان. ولاردىڭ ءبىرى قىلمىس بولعان كۇنى ءبىر جاس جىگىت پەن بەلگىسىز بىرەۋدى مارتۋك اۋدانىنان قاراتۋساي اۋىلىنا الىپ كەلگەن. ال ەكىنشى تاكسي جۇرگىزۋشىسى كەلەسى كۇنى ءدال سول ەركەكتى ءبىر كىشكەنتاي قىزبەن قاراتۋساي اۋىلىنان مارتۋك اۋدانىنا الىپ بارعانىن ايتقان. وسى ىستەن سوڭ ول ءىز-تۇسسىز جوق بولعان.

بۇل وقيعا 20 جىل بۇرىن بولعان. بۇۇ ەلدەرىمەن بىرلەسىپ جۇمىس ىستەۋ كەزىندە مۇنداي وقيعالار رەسەيدە دە بولعاندىعى انىقتالدى. 1996 جىلدىڭ قىسىندا تامبوۆ اۋدانىنداعى نوۆوحمەلوۆوە اۋىلىندا 6 ادامنىڭ دەنەسى تابىلعان، ولاردىڭ اراسىندا اقتوبە وبلىسىندا جوعالىپ كەتكەن 6 جاستاعى قىزدىڭ ءمايىتى دە بولعان. كۋرسك وبلىسىندا ءدال سول قىلمىسكەردىڭ قولىنان تاعى ەكى ادام قازا تاپقاندىعى انىقتالدى.

بۇۇ مەملەكەتتەرىنىڭ قۇقىق قورعاۋ ورگاندارىنىڭ بىرلەسىپ جۇمىس ىستەۋ ناتيجەسىندە، اتالعان قىلمىستىڭ بارلىعىن 1961 جىلى تۋىلعان ۋكرايندىق ازاماتتىڭ جاساعانى انىقتالدى. بەلگىلى بولعانداي، قاسكوي ۋكرايناداعى حمەلنيسا اۋدانىندا تاعى ءبىر ادام ءولتىرۋ ءىسى بويىنشا تۇزەتۋ كولونياسىندا جازاسىن وتەپ ءجۇر ەكەن.

قىلمىسكەردى اقتوبەلىك ەكى تاكسيست سۋرەتىنەن تانىپ، تۇسىنىكتەمە بەرگەن. ۋكراينا ەلىنە اقتوبە قالاسىنداعى ءىىد اسا ماڭىزدى ىستەرمەن اينالىساتىن تەرگەۋشى بارىپ، كۇدىكتىنى تەرگەۋگە العان. قاسكويدىڭ بيولوگيالىق ۇلگىلەرىن ەكسپەرتتەر تەكسەرىپ، ناتيجەسىندە، اقتوبە وبلىسىندا بولعان قىلمىسقا تىكەلەي قاتىسى بار ەكەندىگى انىقتالدى.

قىلمىستىق ءىس ق ر باسپروكۋراتۋرانىڭ شەشىمىمەن ۋكرايناعا جىبەرىلدى.

اۋدارعان: نازەركە لابيحان