وتاندىق كينو اۋەسقويلارىنا سىي. 27 ناۋرىزدا، ياعني بۇگىن كەشكى ساعات التىدا «ەل ارنا» تەلەارناسى ىسكە قوسىلادى.

ەڭ ءبىرىنشى بولىپ «ءان اعا» جانە «دوروگا دوموي» اتتى تۋىندىلار كورەرمەنگە جول تارتادى. «حابار» اگەنتتىگىنە كىرەتىن ارنادا تەك قانا قازاقستاندا شىعارىلعان كوركەم فيلمدەر، دەرەكتى كينو مەن سەريالدار كورسەتىلەدى. مۇندا مەملەكەتتىك تىلدەگى تۋىندىلاردىڭ ۇلەسى 50%-دان كەم بولمايدى. ولار ەفيرگە 6 ساعاتتىق قايتالاۋمەن شىعادى. ارنا باسشىلىعى «قازاقفيلم» اكسيونەرلىك قوعامىمەن كەلىسسوزدەر جۇرگىزىپ، ءبىرقاتار تاماشا تۋىندىلار كورسەتىلىمى بويىنشا شارت جاساستى. سونداي-اق ەلىمىزدىڭ جاس ءارى دارىندى ماماندارى دا ءوز كينولارىن بۇكىل حالىق نازارىنا پاش ەتە الادى. جاڭا ارنانىڭ اكىمشىلىگى ولارمەن تىعىز جۇمىس جۇرگىزۋگە دايىن ەكەندىگىن جەتكىزدى.

«ەل ارنا» ارناسىنىڭ شەف-رەداكتورى كاميلا قامنازاروۆا:

- ءبىز جاستاردى كينو الەمىنە باۋليتىن مەكتەپتەرمەن، ءتۇرلى كينوفەستيۆالدەردىڭ اكىمشىلىگىمەن قويان-قولتىق جۇمىس ىستەيمىز. ۇسىنىلعان تۋىندىلاردىڭ اراسىندا ىرىكتەۋ وتكىزەمىز. قىسقا مەتراجدى جانە ارت-حاۋس ستيلىندەگى فيلمدەردى دە ەفيرگە شىعارامىز. ءبىزدىڭ ويىمىزشا، مۇنداي اۋقىمدى جوبا جاس رەجيسسەرلەردىڭ سانىن ارتتىرىپ، كينو يندۋسترياسىنىڭ دامۋىنا سەرپىن بەرەدى.