اقش پرەزيدەنتى دونالد ترامپ  دۇيسەنبى كۇنى اق ۇيدە ارنايى جاساق مەن كەڭ وكىلەتتىلىكتەر قۇرىلاتىنىن مالىمدەمەك. The Washington Post اقپاراتتىق گازەتىنىڭ حابارلاۋىنشا، ارنايى جاساققا جەتەكشى رەتىندە پرەزيدەنتتىڭ كەڭەسشىسى مەن ءوزىنىڭ كۇيەۋ بالاسى دجارەد كۋشنەر تاعايىندالادى.

باسىلىمنىڭ مالىمەتىنشە، اق ۇيدەگى امەريكالىق يننوۆاسيانىڭ جەتەكشىسى ترامپقا تىكەلەي باعىنىشتى بولىپ، باتىس قاناتىنداعى تاۋەلسىز بىرلىك رەتىندە جۇمىس اتقاراتىن بولادى.  كوممەرسيالىق ۇيىمداردىڭ بۇرىنعى باسشىلارىنان قۇرىلاتىن وپەراتيۆتى توپ ۆاشينگتونعا تىڭ ءارى ساپالى يدەيالار اكەلەدى دەپ كوزدەلىپ وتىر.

«بيلىكتىڭ توقىراۋى جۇمىستىڭ العا ورلەۋىنە مۇمكىندىك بەرمەيتىنى ساياساتتان بەيحابار امەريكالىقتاردىڭ ءبارى ءۇشىن تۇسىنىكتى. بۇنداي جاعداي جاپپاي توقىراۋعا، ارتىق شىعىننىڭ كوبەيۋىنە جانە جۇمىستىڭ تەجەلۋىنە اكەلىپ سوعادى»، - دەپ حابارلادى ترامپ. «مەن مەملەكەتىمىزدىڭ قاراجات شەڭبەرىنە ءوزىمنىڭ تىڭ ويىمدى ەنگىزەتىن بولامىن دەپ امەريكالىقتارعا ۋادە بەرگەنمىن»، دەپ جالعاستىردى ويىن.

ەسكەرە كەتەتىن جايت، كۋشنەردىڭ باسشىلىعىنداعى ۇيىمنىڭ قۇرىلىمى كەزەكتى رەت ترامپتىڭ اكىمشىلىگىنە كۇيەۋ بالاسىنىڭ اسەرى تيگەنىن كورسەتەدى. بۇگىنگى كۇنى ول سىرتقى جانە ىشكى ماسەلەلەردى شەشەدى جانە  پرەزيدەنت جانىنداعى كادرلارعا جاۋاپتى. كۋشنەردى جۇڭگو، مەكسيكا، كانادا جانە شىعىس ەلدەرىندەگى ماسەلەلەردى شەشۋگە ترامپتىڭ كەڭەسشىسى بولىپ جۇرگەنى ءۇشىن «كولەڭكەلى ديپلومات» دەپ اتاپ كەتكەن. 

اۋدارعان: گۇلىم جاقان