«ەرتىس» فۋتبول كلۋبىنىڭ باسشىلىعى، باپكەرلەرى مەن ويىنشىلارى ەۋرازيالىق توپتىڭ پاۆلودار وڭىرىندەگى ەكى كاسىپورنىن ارالادى. سپورتشىلار «قازحروم» تۇك» اق فيليالى – اقسۋ فەرروقورىتپا زاۋىتى مەن «قازاقستان ەلەكتروليز زاۋىتى» اق-نىڭ وندىرىستىك پروسەستەرىمەن تانىستى. ميني-فۋتبولدان كاسىپورىن قۇرامالارىنىڭ مۇشەلەرى، ارداگەرلەر مەن سپورت سۇيەر قاۋىمنان قۇرالعان جانكۇيەرلەر ولاردى ەرەكشە ىقىلاسپەن، قۋانا قارسى الدى دەپ حابارلايدى qamshy.kz.
ەۋرازيالىق توپتىڭ پاۆلودار وبلىسىندا ورنالاسقان كاسىپورىندارىنىڭ قىزمەتەرلەرى – «ەرتىس» فۋتبول كلۋبىنىڭ باستى جانكۇيەرلەرىنىڭ قاتارىندا. ءار كەزدەسۋ سايىن جۇزدەگەن ەۋروازياتتىقتار اتالعان ۇجىمعا قولداۋ كورسەتۋ ءۇشىن ستاديونعا اسىعادى. ءارى ERG – كلۋبتىڭ نەگىزگى دەمەۋشىسى.
«ەرتىس» فك باسشىلىعىنىڭ ۇيعارىمىمەن كلۋب ويىنشىلارىنىڭ وڭىردەگى وندىرىستىك كاسىپورىن ۇجىمدارىمەن جۇزدەسۋى الدىن الا جوسپارلانعان. وسىلايشا، جاتتىعۋ جۇمىستارى مەن قازاقستان پرەمەر ليگاسى ويىندارى اراسىنداعى ۇزىلىستە فۋتبولشىلار «قازحروم» تۇك» اق فيليالى – اقسۋ فەرروقورىتپا زاۋىتىنا كەلدى. تمد اۋماعىنداعى ەڭ الىپ فەرروقورىتپا سەح سانالاتىن №6 سەحتى ارالاعان فۋتبولشىلار جوعارىكومىرتەكتى فەرروحرومدى بالقىتۋ ءۇردىسىنىڭ قالاي جۇزەگە اساتىنىن ءوز كوزدەرىمەن كورىپ، الىپ كاسىپورىننىڭ وندىرىستىك قۋاتىنا تاڭدانىپ قايتتى. ودان سوڭ اقسۋ قالاسىنداعى دەنە شىنىقتىرۋ جانە ساۋىقتىرۋ ورتالىعىنا بەتتەپ، اقسۋ فەرروقورىتپا زاۋىتىنىڭ «مەتاللۋرگ» كومانداسىندا ءتالىم تەرىپ جۇرگەن ورەندەر، جانكۇيەرلەرمەن كەزدەستى. ءتىپتى جەتكىنشەكتەرگە كىشىگىرىم شەبەرلىك ساباعىن دا وتكىزدى. وسى ورايدا اتالعان كلۋبتا ءوڭىردىڭ باستى كومانداسىندا دوپ تەبەتىن ويىنشىلاردىڭ ءىزباسارلارى جەلكىلدەپ ءوسىپ كەلە جاتقانىن اتاپ ايتقان ءجون. ماسەلەن، بوريس كۋسيەۆول قازىردەن «ەرتىستىڭ» قوسالقى قۇرامىندا ونەر كورسەتسە، يزات قۇلجانوۆ، دانيل دەنيسوۆ، تيمۋر جاپارگازينوۆ، نيكيتا پروحورەنكو، ۆياچەسلاۆ گورديەنكو جانە يلدار سلياموۆتار «ەرتىستىڭ» فۋتبول ورتالىعىندا شەبەرلىكتەرىن شىڭداپ ءجۇر.
– جاسىم توعىزدا. ءۇش جىلدان بەرى وسى «مەتاللۋرگ» كلۋبىندا فۋتبولمەن اينالىسىپ ءجۇرمىن. بۇل كوماندالىق ويىن بولعاسىن وندا گول سالۋ دا وڭاي ەمەس. سول ءۇشىن الدىمەن دەنە الەۋەتىمدى شىنىقتىرىپ، جاتتىعۋدىڭ تەحنيكالىق قىرلارىنا ەرەكشە كوڭىل ءبولىپ ءجۇرمىن. مەن دە، دوستارىم دا «ەرتىس» ويىنشىلارىنان ۇلگى الامىز. ءارى ويىن سايىن ولاردىڭ قارسىلاستان باسىم تۇسكەنىن قالايمىز، – دەدى ەسكەندىر ەرنازار ۇلى.
ودان سوڭ ويىنشىلار بيىل ون جىلدىق مەرەيتويىن اتاپ وتكەلى وتىرعان ERGء-دىڭ ەڭ جاس كاسىپورنى – قازاقستان ەلەكتروليز زاۋىتىنا باردى. سپورتشىلار باستاپقى اليۋمينيي ءوندىرىسىن تانۋعا ەرەكشە تالپىنىس تانىتتى. ءاليۋمينييدى ەلەكترليزدەۋ سەحىن ارالاعان سپورتشىلار ءونىمنىڭ قايدان الىناتىنىن، قالاي ءوندىرىلىپ، قاي سالادا كەڭىنەن پايدالانىلاتىنى تۋرال ەگجەي-تەگجەيلى سۇراپ ءبىلدى. كوماندانى اسىرەسە ءوندىرىس پروسەستەرىنىڭ اۆتوماتتاندىرىلۋ دەڭگەيى تاڭ قالدىردى.
– ءبىز قازىرگى زامان تالابىنا ساي قۋاتتى ءارى اۋقىمدى ءوندىرىس وشاقتارى – ەۋرازيالىق توپ كاسىپورىندارىن قۋانا ارالادىق. ونىڭ ۇستىنە بۇل ادامدار بىزگە ءاردايىم قولداۋ كورسەتىپ، ءبىزدىڭ كوماندامىزدىڭ ءبىر مۇشەسى بولعانى قۋاناتادى. وسى ورايدا فۋتبولشىلارعا جانكۇيەردىڭ ىقىلاسى ەرەكشە اسەر ەتەتىنىن ايتا كەتكەن ابزال. سوندىقتان اۋىر جۇمىس اتقارىپ جۇرگەندەرىنە قاراماستان، ويىنعا كەلەتىن قىزمەتكەرلەرگە العىس ايتامىز. بىزگە كورسەتىپ وتىرعان قولداۋلارىڭىز ءۇشىن كوپ راحمەت!، – دەدى «ەرتىس» فك ديرەكتورى ويرات سادۋوۆ «قەز» اق ۇجىمىمەن كەزدەسۋدە.
– ءبىزدىڭ ۇجىمدى بۇل كەزدەسۋ جاڭا بەلەسكە جەتەلەپ، ىنتالاندىردى. ويتكەنى وسىنداعى سپورتشىلار ءوز ءىسىنىڭ شىن مىقتىلارى، كاسىبي شەبەرلەرىمەن جۇزدەستى. قازاقستان ەلەكتروليز زاۋىتىندا فۋتبول – №1 سپورت. سول سەبەپتى سپورتتىڭ ناقتى وسى ءتۇرىن دامىتۋعا ەرەكشە كوڭىل بولەمىز. قەز قۇراماسى توپ ىشىلىك، قالالىق جانە وبلىستىق دەڭگەيدە ۇيىمداستىرىلاتىن جارىستاردىڭ بارىنە بەلسەنە قاتىسادى. ءارى ءبىزدىڭ ارىپتەستەرىمىز تۇراقتى جاتتىعىپ، فۋتبولداعى شەبەرلىكتەرىن ۇزدىكسىز جەتىلدىرىپ كەلەدى، – دەدى «قەز» اق كاسىپوداق كوميتەتىنىڭ ءتوراعاسى الەكساندر كليمەنكو.
قوس كەزدەسۋ سوڭىندا تاراپتار تارتۋ تارالعىلارىن جاساپ، ەستەلىك سۋرەتكە ءتۇستى. ودان سوڭ جانكۇيەرلەر سپورتشىلاردان قولتاڭبا الدى.
پاۆلودار وبلىسى اكىمدىگىمەن الەۋمەتتىك ماڭىزى بار جوبالاردى جۇزەگە اسىرۋ جونىندە جاسالعان مەموراندۋم اياسىندا ەۋرازيالىق توپ ءبىراز جىلدان بەرى «ەرتىس» فۋتبول كلۋبىن قولداۋعا قاراجات قاراستىرىپ كەلەدى. ERG توپ كاسىپورىندارى ورنالاسقان اقتوبە، قوستاناي جانە پاۆلودار وبلىستارىنىڭ اكىمدىكتەرىمەن دە 13 جىلدان بەرى تۇراقتى تۇردە وسىنداي مەموراندۋمدار جاساسىپ كەلەدى.
سوڭعى بەس جىلدا (2012-2016 جج.) ەۋرازيالىق توپتىڭ قازاقستانداعى بارلىق كاسىپورىندارى قىزمەتكەرلەردى الەۋمەتتىك قورعاۋ مەن الەۋمەتتىك سالانى قارجىلاندىرۋعا، ايماقتاردى الەۋمەتتىك-ەكونوميكالىق دامىتۋعا، دەمەۋشىلىك پەن قايىرىمدىلىققا 103 ملرد تەڭگەدەن استام قارجى جۇمسادى.
