كەلىسسوز بارىسىندا تاراپتار ەكى ەل اراسىنداعى ىنتىماقتاستىقتىڭ قازىرگى احۋالى مەن ونى بۇدان ءارى دامىتۋ جايىن تالقىلادى. اتاپ ايتقاندا، ساۋدا-ەكونوميكا، قارجى جانە ينۆەستيسيا سالالارىنداعى ءوزارا ءىس-قيمىل ماسەلەلەرى قارالدى، دەپ حابارلايدى پرەزيدەنتتىڭ باسپا ءسوز قىزمەتى.
مەملەكەت باسشىسى دۋباي حالىقارالىق قارجى ورتالىعى (DIFC) مەن دۋباي قالاسىنىڭ قارقىندى دامىپ كەلە جاتقانىن اتاپ ءوتتى.
نۇرسۇلتان نازاربايەۆ قارجى ورتالىعىن ءتيىمدى باسقارۋ تۇرعىسىنان بىرىككەن اراب امىرلىكتەرىمەن تاجىريبە الماسۋدىڭ ماڭىزدىلىعىنا، سونداي-اق DIFC پەن استانا حالىقارالىق قارجى ورتالىعى اراسىندا تىعىز قارىم-قاتىناس ورناتۋ قاجەتتىگىنە توقتالدى. دۋباي امىرلىگىنىڭ بيلەۋشىسى بۇل باعىتتا ءىس-قيمىل ورناتۋعا تولىق دايىن ەكەنىن جەتكىزدى.
قازاقستان پرەزيدەنتى يسلامدىق قارجىلاندىرۋ ءىسىن دامىتىپ، ونى ەنگىزۋگە ايرىقشا ۇلەس قوسقانى ءۇشىن شەيحقا العىس ءبىلدىردى.
بۇدان بولەك، مەملەكەت باسشىسى «ەكسپو-2017» حالىقارالىق مامانداندىرىلعان كورمەسىنە دايىندىقتىڭ اياقتالعانىن، كەيىننەن كورمە نىساندارى استانا حالىقارالىق قارجى ورتالىعىنىڭ جۇمىسى ءۇشىن پايدالانىلاتىنىن ايتتى.
كەزدەسۋ سوڭىندا نۇرسۇلتان نازاربايەۆ بىرىككەن اراب امىرلىكتەرىنىڭ پرەمەر-مينيسترىن استاناداعى «ەكسپو-2017» كورمەسىنىڭ اشىلۋىنا شاقىردى.
