يسلامنىڭ قاسيەتتى كىتابى قۇراندى تاريحتا تۇڭعىش رەت قازاق تىلىنە اۋدارعان بەلگىلى عۇلاما حاليفا التاي 25 ناۋرىز كۇنى ىستامبۇلدا تۋعانىنا 100 جىل تولۋىنا بايلانىستى ءىس-شارا وتكىزىلدى. قازاقستان انكارا ەلشىلىگى، تۇركى دۇنيەسى اكىمشىلىكتەر وداعى، زەيتىنبۇرىن اۋدان اكىمشىلىگى جانە تۇركيا قازاقتارى ءبىلىم جانە زەرتتەۋ قوعامى تىزە قوسا وتىرىپ ۇيىمداستىرعان ءىس-شارادا حاليفا التايدىڭ تەك قانا ءدىني عالىم ەمەس، سونىمەن قاتار تاريحشى، ϶تنوگراف، اقىن، قوعام قايراتكەرى سىندى باسقا كوپتەگەن قىرلارى باسا كورسەتىلدى.
دۇنيەجۇزى قازاقتار قاۋىمداستىعىنىڭ حاتشىسى بوتاكوز ۋاتقان بيىل استانا EXPO-2017 اياسىندا وتكىزىلگەن دۇنيەجۇزى قازاقتارىنىڭ قۇرىلتايى اياسىندا ەۋرازيا ۋنيۆەرسيتەتى وتىرار عىلىمي زەرتتەۋ ورتالىعىمەن بىرلەسىپ “حاليفا التاي جانە اتامەكەنگە ورالۋ” اتتى حالىقارالىق عىلىمي پراكتيكالىق كونفەرەنسيا وتەتىنىن مالىمدەدى.
قازاقستان ىستامبۇل باسكونسۋلى ەركەبۇلان ساپييەۆ، زەيتىنبۇرىن اۋدان اكىمى مۇرات ايدىن، التايدىڭ الماتى، پاريج جانە ىستامبۇلدا تۇراتىن ۇرپاقتارى، ىستامبۇل قازاقتارى جانە تۇرىك عالىمدارى مەن زيالىلارى دا قاتىسقان باس قوسۋدا تۇركيا قازاقتارىنىڭ كوش باسشىلارىنان ەلىسحان باتىر تۋرالى “قارالى كوش” رومانىنىڭ اۆتورى ءجادي شاكەن ۇلى ءوز كەزەگىندە حاليفا التايدىڭ 100 جىلدىعىنىڭ الاشتىڭ دا 100 جىلدىعىنا تۇسپا-تۇس كەلگەنىنە باسا كورسەتىپ كەزىندە بولشيەۆيك توڭكەرىسىنەن كەيىن ءبىر قاتار الاش قايراتكەرلەرىنىڭ شەكارانىڭ ار جاعىنا ءوتىپ ءورالتايدا بالا وقىتىپ الاش رۋحىن سىڭىرگەنىن ايتتى. حاليفا التايدىڭ الاش قايراتكەرلەرىنەن احمەت مولدادان ءدارىس العانىن، ءسويتىپ بويىنا الاش رۋحى مەن ساناسىن دارىتقان التايدىڭ ءومىرىن قازاق حالقىنا، قازاق ەلىنە قىزمەت ەتۋگە ارناپ وتكەنىن اتاپ ءوتتى.
ەۋرازيا ۋنيۆەرسيتەتى وتىرار عىلىمي زەرتتەۋ ورتالىعىنىڭ ديرەكتورىنىڭ ورىنباسارى، پروفەسسور داناگۇل ماحات قىزى وزدەرىندە شەتەل قازاقتارىنىڭ تۇلعالارى جونىندە قورلار مەن زەرتتەۋ جوبالارى بار ەكەنىن، بۇلاردان ءبىرىنىڭ حاليفا التايعا ارنالعانىنا كورسەتە كەلىپ وتكەن جىلى رەكتور ەرلان سىدىقوۆتىڭ قولداۋىمەن حاليفا التاي تۋرالى حالىقارالىق عىلىمي-پراكتيكالىق كونفەرەنسيا وتكىزۋگە شەشىم قابىلداعاندىقتارىن، سول ءۇشىن دايىندىقتارىنىڭ ءجۇرىپ جاتقانىن اتاپ ءوتتى.
تۇركى دۇنيەسى اكىمشىلىكتەر وداعىنىڭ حاتشىسى دوسەنت، ت.ع.د. فاحري سولاق باسقارىپ وتىرعان جيىننىڭ سوڭىندا ءسوز سويلەگەن ميمار سينان كوركەم ونەر ۋنيۆەرسيتەتىنىڭ پروفەسسورى ءابدىۋاقاپ قارا دا حاليفا التايدىڭ تۇركيا مەن قازاقستاننىڭ ورتاق تۇلعاسى ەكەنىنە كورسەتە كەلىپ 1982 جىلى تۇركيا مادەنيەت مينيسترلىگى باسىلىمدارى اراسىندا التايدىڭ تۇركيا قازاقتارىنىڭ كوش تاريحى مەن قازاق مادەنيەتى تۋرالى “اتاجۇرتتان اناتولياعا” اتتى كىتابىنىڭ جارىك كورگەنىن، ال بيىل بولسا 100 جىلدىققا ارنالىپ ىستامبۇلدا عۇلامانىڭ ءومىرى تۋرالى تۇرىك تىلىندە كىتاپ شىققانىن، ونىڭ اتىن سول كىتاپقا مەڭزەپ “اناتوليادان اتاجۇرتقا” دەپ قويعاندارىن، ويتكەنى حاليفا التايدىڭ قازاقستان تاۋەلسىزدىك العاننان كەيىن 1992 جىلى كىدىرمەستەن اتاجۇرتقا ات باسىن بۇرىن قالعان ءومىرىن تۋعان حالقىنا ارناعانىن تىلگە تيەك ەتتى.
ءىس-شارا سوڭىندا حاليفا التاي ارۋاعىنا دۇعا ەتىلدى جانە تۇركيا قازاقتارى ءبىلىم جانە زەرتتەۋ قوعامى مەن حاليفا التايدىڭ ۇرپاقتارى وسى شاراعا ات سالىسقان ازاماتتارعا العىستارىن ايتىپ سىيلىقتارىن بەردى.
ءابدىۋاقاپ قارا،تاريح عىلىمىنىڭ دوكتورى، ميمار سينان كوركەم ونەر ۋنيۆەرسيتەتىنىڭ پروفەسسورى
