23 ناۋرىز كۇنى «قىزاي انا» قوعامدىق قورى الماتى وبلىسى تالعار اۋدانى وستەمىر اۋلىنداعى قىزاي انا كوشەسىنىڭ بويىندا ناۋرىز مەرەكەلىك داستارحان جايدى. مەرەكەلىك شاراعا اۋىل تۇرعىندارى مەن بىرگە الىس جاقىننان كەلگەن مىڭداعان ازامات قاتىستى. اراسىندا قوعام قايراتكەرلەرى، ونەر ادامدارى، اقىن-جازۋشىلار، سپورتشىلار، قىزاي انا ۇرپاقتارى بولدى، حابارلايدى ۇلت پورتالى
مەرەكەلىك شارا «قىزاي انا» قوعامدىق قورىنىڭ ءتوراعاسى، پروفەسسور ءنابيجان مۇحامەتحان ۇلىنىڭ حالىقتى ۇلىستىڭ ۇلى كۇنىمەن قۇتتىقتاۋى مەن جانە «قىزاي انا» قورى جۇمىسىن قىسقاشا تانىسترىپ، سىيلى قوناقتارعا شاپان كيگىزدى. ءنابيجان مۇحامەتحانۇلىنان كەيىن اۋىل، اۋدان اكىمدەرى، قوعام قايراتكەرلەرىنىڭ اق جارما تىلەكتەرى مەن اۋىل اقساقالدارىنىڭ باتاسىنا ۇلاستى. مەرەكەلىك شارانىڭ كۇن تارتىبىنە بايلانىستى، جاستار مەن جاس وسپىرىمدەر اراسىنداعى سپورتتىق جارىستار مەن مەرەكەلىك كونسەرتتىك باعدارلاما قاتار باستالدى. ق ر مادەنيەت قايراتكەرى، قۇرمەت وردەنىنىڭ يەگەرى تىلەۋبەك قوجان، تانىمال انشىلەر نۇرشات زەيىپحان، ءادىل ءسىلامحان، اسقار اكىمبەك، ءلالا باقىتنۇر قىزى قاتارلى ءبىر توپ ءانشى ونەرپازدار اننەن ءشاشۋ ءجاشىپ، بيشىلەرىمىز حالىقتىڭ كوز ايىمىن قاندىرىپ، اقىندارىمىز جىر مارجانىن جاۋدىردى.
كونسەرتتىك باعدارلامانىڭ ورتاسىندا «قىزاي انا» قوعامدىق قورى ۇيىمداستىرعان يگى شارالاردىڭ ماراپاتتاۋلارىنا دا كەزەك بەرىلىپ تۇردى. وسى يگى شارانىڭ ءبىرى جاستارىمىزدى ءبىلىم مەن عىلىمعا ىنتالانتىرۋ ماقساتىندا جوعارعى وقۋ ورىندارىندا ءبىلىم الىپ جاتقان ۇزدىك ستۋدەنتتەرگە ستەپەنديا تاعايىنداۋ. عالىم ءنابيجان مۇحامەتحان ۇلى وقۋداعى جەتىستىكتەرى مەن قوعامدىق جۇمىستاعى بەلسەندىلىگى ءۇشىن ءال-فارابي اتىنداعى قازۇۋ-دىڭ ماگيسترانتى مۇقتاي كلاراعا ءجۇز مىڭ تەڭگە، ءال-فارابي اتىنداعى قازۇۋ-دىڭ 1 كۋرس ستۋدەنتى بولات ءبۇبىساراعا جەتپىس مىڭ تەڭگە، تەحنولوگيا-ەكونوميكالىق كوللەدجىنىڭ 2 كۋرس ستۋدەنتى نۇردانعالي جايناعا ەلۋ مىڭ تەڭگە، تادعار اۋدانى وستەمىر اۋىلى № 14 مەكتەبىنىڭ 9-شى سىنىپا وقۋشىسى بەگالى بايسالدىعا 50 مىڭ تەڭگە قارجىلاي سىيلىق تابىس ەتتى.
ەستەرىڭىز دە بولسا، «قىزاي انا» قوعامدىق قورى الاش وردا ۇكىمەتىنىڭ 100 جىلدىعىنا وراي «ادەبيەت» پورتالىندا «ايبىندى الاشىم» اتتى جاس اقىندار اراسىنداعى جىر ءمۇشايراسىن جاريالاعان بولاتىن. ءادىل قازىلار جەڭىمپاز دەپ بەلگىلەگەن اقىنداردى ماراپاتتاۋ دا وسى ناۋرىز مەرەكەلىك شاراسىنىڭ اياسىندا ءوتىپ، جىر ءمۇشايراسىنىڭ قازىلارى مەن قور مۇشەلەرى جەڭىپاز اقىنداردى سالتاناتتى تۇردە ماراپاتتادى. بيىلعى جىلعى ناۋرىز مەرەكەلىك داستارحان شىعىنىن كوتەرلگەن قور قۇرىلتايشىسىنىڭ ءبىرى سابىرجان مۇحامەتحان ۇلى جىر ءمۇشايراسىنىڭ نەگىزگى جۇلدە قورى 500 مىڭ تەڭگەنى ءوزى اتاعان بولاتىن. ءادىل قازىلار القاسى باس جۇلدەگە باياناۋىلدىق جاس اقىن ەلامان حاسەنۇلىن لايىق دەپ 200 مىڭ تەڭگە، ءبىرىنشى ورىن الماتىلىق اقىن تولەگەن مەللاتقا 150 مىڭ تەڭگە، ەكىنشى ورىن الماتىلىق جاس اقىن ايبول يسلامعاليعا 100 مىڭ تەڭگە، ءۇشىنشى ورىن قوجا احمەت ياساۋي اتىنداعى قازاق-تۇرىك ۋنيۆەرسيتەتىنىڭ 1 كۋرس ستۋدەنتى عىلىمنۇر كادىربايۇلىنا 50 مىڭ تەڭگە قارجىلاي سىيلىق تابىس ەتتى. سونىمەن بىرگە «قىزاي انا» قورى اقىن تالاپبەك تىنىسبەك ۇلى مەن بالتاباي نۇرعالييەۆكە ارنايى جۇلدە تابىس ەتسە، جاس كاسىپكەر جولشىباي وشىرباي ۇلى الاش ءتۇرسىنالى مەن دينارا مالىككە «قىزاي انا» قورىنىڭ اتىندان ارنايى جۇلدە تابىس ەتتى.
«قىزاي انا» قوعامدىق قورى اقىندار اراسىنداعى ءمۇشايرانى وسىمەن ەكىنشى جىل وتكىزسە، ستۋدەنتتەر مەن وقۋشىلارعا ستەپەنديانى نەشە جىلدان بەرى تاعايىنداپ كەلەدى. سونىمەن بىرگە قور اتىنان بەلگىلى كاسىپكەر، «قىزاي انا» قورىنىڭ حاتشىسى، الماتىداعى «ءساتتىباي» فەرماسىنىڭ ءتوراعاسى ءومارالى ابدىبەك ۇلى دا جىل سايىن تادعار اۋدانى وستەمىر اۋىلى № 14 مەكتەبىنىڭ وتباسىندا قيىنشىلىعى بار، وقۋدا وزات 5 وقۋشىعا 30 مىڭ تەڭگەدەن قارجىلاي سىيلىق بەرىپ كەلەدى. بيىلدا داستۇرگە ساي 1- سىنىپتان 7- سىنىپقا دەيىنگى 5 وقۋشىعا سىيلىعىن ءوز قولىمەن تابىستادى.
مەرەكە سپورتتىق جارىستاردا ماراپاتقا يە بولعان جاستار مەن جاس-وسپىرىمدەردىڭ سىيلىقتارىن تابىس ەتۋمەن مارەسىنە جەتتى. كەلگەن بارشا قوناق ارنايى تىگىلگەن كيگىز ۇيلەردە ءجايىلعان داستارحاندارعا رەتىمەن كىرىپ كەڭ داستارحاننان ءدام تاتتى. 4،5 ساعاتقا سوزىلعان مەرەكەلىك شارا بارشا قوناقتارىنىڭ كوڭىلىنەن شىعىققانى ءبىلىنىپ، قوناقتار ۇيىمداسترۋشىلارعا العىسىن ايتىپ قايتىپ جاتتى. سامارحاننىڭ كوك تاسى ەرىگەن ناۋرىز مەرەكەسىندە «قىزاي انا» قورى وستەمىر اۋىلىنىڭ تۇرعىندارى قۋانىش سىيلاپ، اقىندار مەن ستۋدەنت، وقۋشىلارعا شابىت سىيلاپ قايتتى. جانە قالا حالقىن، كاسىپكەرلەردى اۋىلعا اپارۋ ارقىلى اۋىل تۇرمىسىنا كوز قىرىن سالا جۇرۋلەرىنە وي تۇيدىرە ءبىلدى دەپ ويلايمىن. وسى شارا ارقىلى جاس ۇرپاق قىزاي اناداي ۇلى تۇلعانىڭ ومىرىمەن تانىسىپ ۇلىققا ۇمىلتۋعا وي-ساباق الا بىلگەنىنە دە ءشۇبام جوق.
ەسكەرە كەتەيىن، «قىزاي انا» قوعامدىق قورى ۇيىمداستىرعان وستەمىر اۋىلىنداعى ناۋرىز مەرەكەسىنىڭ داستارحان ءار جىلى ءبىر ءبىر اۋلەت نە بىرنەشە ازامات ءوز مويىندارىنا الادى. سپورتتىق شارالار مەن جىر ءمۇشايراسىنىڭ شىعىنىن دا داستارحان ءجايعان ازاماتتار شىعارادى. بيىلعى جىلعى ناۋرىز مەرەكەلىك داستارحانىن «قىزاي انا» قوعامدىق قورىنىڭ ءتوراعاسى، تاريحشى، پروفەسسور ءنابيجان مۇحامەتحان ۇلى جانە ىنىلەرى ءانۋار مۇحامەتحان ۇلى مەن سابىرجان مۇحامەتحان ۇلى ءجايعان ەدى.
«قىزاي انا» قورىنىڭ ناۋرىز مەرەكەسىن وستەمىر اۋىلىندا وتكىزىپ كەلە جاتقانىنا توقتالا كەتەر بولساق، 2011 جىلى اقىن ءابدىعاني ءپازىلحان ۇلى تالعار اۋدانى نۇرا اۋلىدىق وكرۋگى مادەنيەت ءۇيىنىڭ باسشىسى بولىپ تۇرعان كەزىندەگى باستاماسى بويىنشا تالعار اۋدانى وستەمىر اۋىلىنداعى ءبىر كوشە قىزاي انانىڭ اتىنا بەرىلگەن ەدى. 2011 جىلدىڭ قازان ايىندا سول كوشەنىڭ بويىندا قىزاي اناعا اس بەرىلىپ، 2012 جىلدان باستاپ ءداستۇرلى تۇردە ناۋرىز مەرەكەسى سول كوشەنىڭ بويىندا ءوتىپ كەلەدى. وسى 6 جىل بارىسىندا «قىزاي انا» كوشەسىن الۋعا سەبەپشى بولعان، اقىن ءابدىعاني ءپازىلحان ۇلى ناۋرىز مەرەكەسىن ۇيىمداسترۋعا بەلسەنە اتسالىسىپ، ناۋرىز مەرەكەسىن جۇرگىزىپ كەلەدى.
