18 ناۋرىزدا نيۋ-يوركتەگى Madison Square Garden ارەناسىندا گولوۆكين مەن دجەيكبوس رينگكە شىعىپ، ناتيجەسىندە ۇپايلار سانى جاعىنان جەڭىس گولوۆكينگە تيەسىلى بولعان ەدى. گولوۆكين ەشبىر جەكپە-جەگىن 12 راۋندقا دەيىن جەتكىزبەگەن. الايدا سول كۇنگى قارسىلاسى دجەيكبوسپەن جۇدىرىقتاسۋى قيىنعا سوقتى.

تورەشىلەردىڭ ءبىراۋىزدان جەڭىستى گولوۆكيننىڭ قانجىعاسىنا بايلاعانى كوشىلىكتى قۋانتسا، ەندى ءبىرى شەشىمنىڭ ءادىل بولعانىنا كۇمان كەلتىردى. الەۋمەتتىك جەلىلەردە گولوۆكيننىڭ جەڭىسىنە نەبىر كۇدىكتى پىكرىلەر جازىلدى. ءتىپتى دجەيكبوستىڭ ءوزى سوڭىنا دەيىن جەڭىسكە قول جەتكىزەتىنىنە سەنىمدى بولدى. ءوزىن گولوۆكيننەن الدەيقايدا مىقتى جۇدىرىقتاسقانىن دا ايتىپ قالدى.  

الەمنىڭ بۇرىنعى ۇزدىك بوكسشىلار تىزىمىندە كوش باستاعان فلويد مەيۆەزەر دە گولوۆكيننىڭ جەڭىسىنە، سونداي-اق ۇزدىك بوكسشى اتاناتىنداي مىقتىلىعىنا ءشۇبا كەلتىرىپ، ءتىپتى وعان مازاق رەتىندە ءبىر ەسىم ويلاپ تاپقان كورىنەدى.

«مەن ءبىر جىگىتتىڭ جەكپە-جەگىن كوردىم. سىزدەر مەنىڭ كىم تۋرالى ايتىپ وتىرعانىمدى بىلەسىزدەر، ول - Triple-L - سەبەبى ول مەنىمەن جەكپە-جەككە شىقسا، ءۇش رەت جەڭىلەر ەدى. قازىرگى ۋاقىتتا مەن ءبىر سپورتشى ءۇشىن عانا رينگكە قايتىپ ورالۋعا دايىنمىن. ونىڭ ەسىمى - كونور ماكگرەگور.

مەن ءالى دە بەلسەندى بوكسشى بولسام، مەن وندا... سىزدەر تۇسىندىڭىزدەر عوي. مەن ونىڭ كۇل-تالقانىن شىعارار ەدىم. ال قازىرگى ۋاقىتتا مەنى تەك مەگا قاراجاتتى جەكپە-جەكتەر قىزىقتىرادى... گولوۆكين دەگەن كىم ءوزى؟»، - دەدى مەيۆەزەر Fighthype.com سايتىنا بەرگەن سۇحباتىندا.

وسىنداي جاعدايلار ورىن الىپ جاتقاندا گەنناديي گولوۆكيننىڭ جاتتىقتىرۋشىسى ابەل سانچەس ءۇنسىز قالمادى. ول GGGء-دىڭ دەنيەل دجەيكوبستى جەڭگەنىنە كۇمان كەلتىرەتىن ينتەرنەت-قولدانۋشىلارعا جاۋاپ بەردى.

 «وتكەن سەنبىدە ءۇش تورەشى گولوۆكيننىڭ پايداسىنا شەشىم شىعاردى. سوندىقتان وزگەلەردىڭ ايتىپ جاتقانى مەنى تولعاندىرمايدى. بۇل ماڭىزدى ەمەس، سەبەبى سۋديالاردىڭ ۇكىمىن وزگەرتپەيدى. تاريحقا باسقالاردىڭ نە ايتقانى ەمەس، ايقاستىڭ قالاي وتكەنى ەنەدى. الەۋمەتتىك جەلىلەردە ءوز پىكىرلەرى ماڭىزدى دەپ ويلايتىن «ديۆاندىق باپكەرلەر» مەن «كلاۆياتۋرالىق سۋديالار» وتە كوپ. تورەشىلەر ايقاستىڭ ناتيجەسىن ەسەپتەدى، سول عانا ماڭىزدى».

سونداي-اق، ابەل سانچەس ورتا سالماقتا WBA (Super)، IBO، WBC جانە IBF تۇجىرىمدارى بويىنشا الەم چەمپيونى گەنناديي گولوۆكيننىڭ ساۋل «كانەلو» الۆارەسپەن كەلىسە الماسا، جوعارعى سالماققا وتەتىنىن مالىمدەدى.

 «گەنناديي ورتا سالماقتا بارلىق بەلبەۋلەردى جەڭگەننەن كەيىن، سول ديۆيزيوندا قالۋدىڭ ەش ءمانىسى جوق. ۇلىبريتانيالىق بوكسشى بيللي دجو سوندەرسپەن جەكپە-جەك ماۋسىمدا وتەتىن بولسا، وندا GGG ەكىنشى ورتا سالماققا كوتەرىلۋدى جوسپارلاپ وتىر. ارى قاراي... «كانەلومەن» كەلىسىمشارت جاسالسا، ونىمەن جۇدىرىقتاسۋعا دا دايىنبىز. ەگەر ول كەلىسپەسە، سۋپەر ورتا ديۆيزيونعا كوشەتىن بولامىز»، - دەپ جازادى سانچەستىڭ ءسوزىن BoxingNews24 پورتالى.  ونىڭ ايتۋىنشا، سۋپەر ورتا سالماقتا ولار «ءىرى جىگىتتەرمەن شارشى الاڭعا شىعىپ، ءىرى جەكپە-جەكتەرگە شىعاتىنىن» ايتادى. ەكىنشى ورتا سالماقتاعى جىگىتتەردىڭ گولوۆكيننىڭ سوققىسىنا قالاي توتەپ بەرەتىنىن كورەمىز. حيلبەرتو راميرەس ءقازىردىڭ وزىندە گولوۆكينمەن جۇدىرىقتاسقىسى كەلەتىنىن ايتتى. مەن گولوۆكيننىڭ سۋپەر ورتا سالماقتا بارلىق بەلبەۋلەردى جەڭىپ العانىن كورگىم كەلەدى»، - دەدى باپكەر.

ايتا كەتەيىك، ينسايدەرلىك اقپارات بويىنشا، ب ا ق بەتتەرىندە گولوۆكين - سوندەرس جەكپە-جەگى استانادا 17 ماۋسىمدا EXPO-2017 حالىقارالىق كورمەسى كۇندەرى وتەتىنى حابارلاندى. قازاقستاندىق بوكسشى مەن مەكسيكالىق ساۋل «كانەلو» الۆارەس اراسىنداعى جەكپە-جەك قىركۇيەكتە وتەدى دەپ بولجانادى، الايدا كەلىسسوزدەر ءالى دە ءجۇرىپ جاتىر.