ساۋد ارابياسىندا كوپ ايەل الۋ ماسەلەسىمەن شۇعىلداناتىن اكادەميا قۇرۋ تۋراسىندا ۇسىنىس ايتىلدى.

دالىرەگى، كورول ءابدىازىز اتىنداعى ۋنيۆەرسيتەتتىڭ وقىتۋشىسى حاۋازين مىرزا وسىنداي باستاما كوتەرىپ وتىر. بىلايشا ايتقاندا، مۇنى ساۋديالىق نوۋ-حاۋ دەسە دە بولادى.

ونىڭ ايتۋىنشا، بۇل قۇرىلىم ەر-ازاماتقا ءۇش ايەلدى بىردەن الىپ بەرۋ مۇمكىندىگىن قاراستىرۋى ءتيىس. تارقاتىپ ايتقاندا، ءۇش نەكە دە ءبىر ايدىڭ ىشىندە قيىلۋى كەرەك. كۇيەۋ جىگىتتىڭ جاسى 25 پەن 35 ارالىعىندا بولۋى ءتيىس. حاۋازين مىرزانىڭ سوزىنە قاراعاندا، جوعارىداعى ايتىلعانداردان بولەك، تاعى مىناداي شارتتار قاراستىرىلۋى كەرەك: ءبىرىنشىسى – اجىراسقان ايەلمەن، ەكىنشىسى – جەسىرمەن، ياعني، كۇيەۋى قايتىس بولعان اداممەن، ال ءۇشىنشىسى – وڭ جاقتا وتىرىپ قالعانىمەن نەكە قيدىرۋى كەرەك.

ەگەر ەر-ازامات ءۇش ايەلىمەن دە ءتاتۋ-تاتتى وتباسىن قۇرسا، تاعى توقال الۋدى قالاسا، ءتورتىنشىسى وعان تەگىن، ياعني ەشقانداي قالىڭمالسىز بەرىلۋى كەرەك.

دەرەككوز: islam.kz