سولتۇستىك كورەي رەسپۋبليكاسىنىڭ سىرتقى ىستەر مينيسترلىگى رەسمي ۆاشينگتوننىڭ قارۋلى كۇشتەرىنە قارسى تۇرۋعا دايىن ەكەندەرىن حابارلايدى، دەپ جازادى "قامشى" اقپاراتتىق اگەنتتىگى. بۇل تۋرالى ەلدىڭ سىرتقى ىستەر مينيسترىلىگىنىڭ اقش بيلىگىنە جىبەرگەن جولداماسىندا ايتىلىپ ءوتتى.

8 ءساۋىر كۇنى اقش-تىڭ سىرتقى ىستەر مينيسترلىگى كورەي تۇبەگىنە قارۋلى اۋە كۇشتەرىن جىبەرۋ تۋرالى شەشىم قابىلداعاندىعىن ايتقان بولاتىن. الدىمەن اۋە كۇشى اۆستراليا جاعالاۋىنا قونۋى ءتيىس دەلىنگەن. كەيىننەن امەريكانىڭ تىنىق مۇحيتى ايماعىنداعى قارۋلى كۇشتەر شتابى: «ادميرال حارري حارريس باسقارعان «كارل ۆينسون» اۋە كۇشتەرىنىڭ تىنىق مۇحيتىنىڭ سولتۇستىك جاعالاۋىنا قاراي باعىت الىپ، سينگاپۋرگە توقتاعاننان كەيىن 8 ءساۋىر كۇنى بەلگىلەنگەن مەجەگە قاراي بەت الاتىنى» تۋرالى حابارلادى.

پحەنيان بيلىگى اقش-تىڭ ءوز تۇبەكتەرىنە باسىپ كىرۋى ۇلكەن قاتەلىك بولاتىنىن ەسكەرتتى. مالىمدەمەدە «ترامپ بۇيرىعى بويىنشا جاعالاۋعا ورناتىلىپ جاتقان قارۋلى كۇشتەر سولتۇستىك كورەيانىڭ ۇستانىمدارىنا اسەر ەتە المايدى. پحەنيان اقش باستاعان كەز كەلگەن شابۋىلعا قارۋلى كۇشپەن جاۋاپ بەرۋگە دايىن. قانداي دا ءبىر قارۋلى قاقتىعىس بولعان جاعدايدا بارلىق جاۋاپكەرشىلىك پەن كىنا رەسمي ۆاشينگتونعا ارتىلادى» دەلىنگەن.

كورەي تۇبەگىنىڭ ەكىنشى بولىگىندە ورنالاسقان وڭتۇستىك كورەيا رەسپۋبليكاسى بولسا اقش-تىڭ بۇل ىس-ارەكەتىن تولىق قۇپتايتىندىعىن حابارلادى. ەلدىڭ سىرتقى ىستەر ءمينيسترى مۋن سان گۋن اقش-تىڭ وسى ارەكەتى ارقىلى پحەنياننىڭ كۇشى السىرەيتىنىن، تيىسىنشە تالاي جىلدان بەرى سەۋلدىڭ اسپانىن تورلاعان بۇلتتىڭ سەيىلەتىنىن جەتكىزدى. جانە سەۋل مەن ۆاشينگتون اراسىنداعى دوستىقتى كۇشەيتۋ ارقىلى كورەي تۇبەگىندە تۇراقتىلىق ورنايتىنىن ايتتى دەپ حابارلايدى تاسس.

اۋدارعان اقنيەت تولەندى