زاڭعا بارلىق ادام مويىنسۇنۋى كەرەك. «قامشى» اقپاراتتىق اگەنتتىگى ايف.ru-عا سىلتەمە جاساپ ءتۇرلى ەلدەردىڭ 10 قيسىنسىز زاڭدارىن ۇسىنادى.

ۆەنەسيا

28 ءساۋىر 2008 جىلى ۆەنەسيا بيلىگى قالا قوناقتارى مەن تۇرعىندارىنا سان-ماركو الاڭىنداعى كەپتەرلەرگە تاماق بەرۋگە تىيىم سالدى. سەبەبى كەپتەرلەر تۇمسىعىمەن عيماراتتار مەن ەسكەرتكىشتەردىڭ قالىبىن قۇرتادى. سونىمەن قاتار، كەپتەرلەردىڭ اۋرۋدى تاسىمالدايتىن قۇس ەكەنى بەلگىلى.

يسپانيا

يسپاندىق پالما-دە-مايوركەدە كوشەدە ۆەلوسيپەدپەن جۇرۋگە تىيىم سالىنعان. مۇنداي زاڭدى قالالىق كەڭەس 2014 جىلى قابىلداعان. زاڭدى بۇزعاندار 50 ەۋرو كولەمىندە ايىپپۇل تولەيدى.

تايلاند

تايلاندتاعى پحۋكەت جاعالاۋىندا بالىقتاردى تاماقتاندىرۋعا بولمايدى. اتالمىش زاڭدى بيلىك وكىلدەرى 2016 جىلى بالىقتارعا تاڭسىق تاعامدى جەمەۋى ءۇشىن قابىلداعان. ونى بۇزعان تۋريست 3 مىڭ دوللار كولەمىندە ايىپپۇل تولەيدى نەمەسە تۇرمەگە وتىرادى.

اتالمىش زاڭدى رەسەيلىك ولگا سميرنوۆا بۇزىپ، تايلاند سوتى وعان 1000 بات ايىپپۇل سالعان.

سينگاپۋر

سينگاپۋردا ساعىزدى ساتۋ مەن يمپورتتاۋ زاڭسىز بولىپ تابىلادى. ونى تەك ءدارىحانادان دارىگەردىڭ رۇقساتىمەن عانا ساتىپ الۋعا بولادى. الايدا ءتۋريستىڭ قالتاسىندا ۇشاقتان قالىپ قالعان ساعىزى بولسا، ول ءۇشىن جازاعا تارتىلمايدى. جازا تەك ساعىزدى ساتىپ الماق بولعاندارعا عانا قولدانىلادى. ولار ءبىر جىلعا باس بوستاندىعىنان ايىرىلۋى مۇمكىن نەمەسە 5500 دوللار ايىپپۇل تولەيدى.

بىرىككەن اراب امىرلىكتەرى

اراب امىرلىكتەرىندە تۋريستەر عيماراتتى فوتوعا تۇسىرگەندە وتە اباي بولۋى كەرەك. ەلدە ادەمى عيماراتتار كوپ. ەگەر فوتواپپارات نىسانىنا العان عيماراتىڭىز زاڭ بويىنشا تىيىم سالعانداردىڭ ءبىرى بولسا، شپيوندىق ارەكەت جاسادى دەپ ايىپتاپ، تۇرمەگە وتىرعىزۋى مۇمكىن.

اشىق كيىنىپ جۇرگەندەردى دە قۇقىق قورعاۋ ورگاندارى قىزمەتكەرلەرى جاۋاپقا تارتۋى مۇمكىن. راس-ال-حايما جاعاجايىندا قاتاڭ  تۇردە ايەلدەرگە اشىق شومىلۋعا ارنالعان كيىم، ال ەر ادامدارعا تىرىسقان پلاۆكي كيۋگە تىيىم سالىنعان. ءبىرىنشى رەت ەسكەرتۋ جاسايدى. قايتالانسا ايىپپۇل تولەتەدى. جاعاجايدا اشىق كيىنۋگە بولمايتىنى تۋرالى جازىلعان تاقتايشالار بار. مۇنداي زاڭ تۇرعىلىقتى حالىقتىڭ تۋريستەردىڭ جالاڭاش جۇرۋىنە نارازىلىق بىلدىرگەننەن كەيىن قابىلدانعان.

گرەسيا

گرەسيادا 2002 جىلدان بەرى قۇمار ويىنداردى قوعامدىق جەردە ويناۋعا تىيىم سالاتىن زاڭ قولدانىستا.

اقش

نيۋ-دجەرسي شتاتىنداعى فورت لي قالاسىندا ءجۇرىپ بارا جاتىپ حات جازۋعا تىيىم سالىنعان. ول 2012 جىلى جول اپاتىن ازايتۋ ماقساتىندا قابىلدانعان. جەرگىلىكتى بيلىك مۇنداي قادامعا ستاتيستيكاداعى كورسەتكىشكە بولا بارعان. وعان ساي، حات جازىپ كەلە جاتىپ باعدارشامنىڭ قىزىل تۇسىنە ءوتىپ، مەرت بولعانداردىڭ سانى كوپ.

زاڭدى بۇزعاندار 85 دوللار ايىپپۇل تولەيدى.

مالايزيا

مالايزيادا 2011 جىلى سارى ءتۇستى قىسقا جەيدە كيۋگە تىيىم سالاتىن زاڭ قابىلدانعان. جەرگىلىكتى بەلسەندىلەر جەمقورلىققا قارسى اكسياعا سارى ءتۇستى قىسقا جەيدەلەرمەن شىققان. سودان بەرى سارى ءتۇس زاڭعا قارسى ەكەنىن بىلدىرەتىن بولعان.  

بەلگيا

ال بەلگيا بيلىگى قارمەن ويناۋ ادام دەنساۋلىعى ءۇشىن وتە زيان دەگەن قورىتىندىعا كەلىپ، 2013 جىلى قارمەن ويناۋعا تىيىم سالدى. بۇل زاڭ فلاندريانىڭ بەس ايماعىندا جۇرەدى.

يران

يرانعا جولىڭىز ءتۇسىپ جاتسا شاشىڭىزدىڭ جيناقى بولۋىنا ءمان بەرىڭىز. سەبەبى جان-جاقا شىعىپ تۇرعان شاش - شايتاننىڭ شاش ۇلگىسى بولىپ سانالادى. بۇل ءوز كەزەگىندە شايتانعا مويىنسۇنۋ جانە دىنگە قۇرمەت بىلدىرمەۋ بولىپ سانالادى. ەلدە قابىلدانعان زاڭ بويىنشا، ەر ادامنىڭ شاشىن بۋىپ جۇرۋىنە تىيىم سالىنادى. مۇنداي زاڭمەن كەلىسپەگەن سالوندار مەن شاشتاراز  بىردەن ليسەنزياسىنان ايىرىلادى.