جۇڭگو عالىمدارى «ايدان تابىلعان گەليي-3 ەلەمەنتى جەردەگى ەنەرگەتيكالىق داعدارىستىڭ الدىن الۋعا كومەكتەسەدى. ەگەر ادام بالاسى ايدان بۇل ەلەمەنتتى ءوندىرىپ الاتىن بولسا، ودان الىناتىن ەنەرگيا ون مىڭ جىلعا جەتەدى»، - دەپ مالىمدەمە جاساعان. بۇل تۋرالى Massaget.kz.  حابارلادى.

جۇڭگو عالىمدارى وسىلاي الەمگە جار سالۋدان بۇرىن ايدى مۇقيات زەرتتەگەن. راسىندا، جەر سەرىگىنىڭ بەتكى قاتپارىندا تەرمويادرولىق رەاكتورعا شيكى ءونىم بولا الاتىن پايدالى قازبالار كوپ ەكەنى انىقتالدى.

گەليي-3 – جەردە وتە سيرەك كەزدەسەتىن ەلەمەنت. سەبەبى، كۇن ساۋلەسىنىڭ اتموسفەرا قاباتتارىنان ءوتۋى كەزىندە اتالعان ەلەمەنتتىڭ يزوتوپتارى تىستا قالىپ قويادى. ال ايدا ەشقانداي اۋا قاباتى بولماعاندىقتان، گەليي-3ء-تىڭ  ول جاقتا مول قورى بار.

جۇڭگو عالىمدارى گەليي-3 ەلەمەنتىن اي بەتىن 600 گرادۋسقا ىسىتۋ ارقىلى ءبولىپ الۋدى جوسپارلاپ وتىر. سودان سوڭ شيكى ماتەريالدار جەرگە جىبەرىلەتىن بولادى. بۇل ەلەمەنتتىڭ تىپتەن كىشكەنتاي بولشەگىنىڭ سينتەزى ءبىرشاما ەنەرگيا بەرە الادى. ايتا كەتسەك، گەليي-3 ەلەمەنتىنىڭ 0،02 گرامم سينتەزى ءبىر باررەل مۇنايدىڭ ەسەبىندەگى ەنەرگيانى شىعارۋعا جەتەدى.

Mail Online گازەتىنىڭ ساراپتامالىق جۇمىسىندا نەبارى 40 توننا گەليي-3 ەلەمەنتى بۇكىل اقش تەرريتورياسىن ءبىر جىل ەنەرگيامەن قامتاماسىز ەتە الادى دەلىنگەن. ال ايدا بۇل ەلەمەنتتىڭ 10 ميلليون توننا قورى بار ەكەنى انىقتالدى. Huffington Post گازەتى ايدان قازىپ الىنعان ءاربىر توننا گەليي-3 ەلەمەنتىنىڭ قۇنى ورتاشا ەسەپپەن 3 ميلليارد اقش دوللارىنا تەڭ بولاتىنىن جازادى. بۇل – جەردەگى مۇنايدى قولدانعاننان الدەقايدا ارزان ءارى جەر ءۇشىن وتە پايدالى بولادى.

قامشى-اقپارات