اليمەنتىن تولەمەيتىن بورىشكەرلەر جۇمىسپەن قامتۋ ورتالىعىنا شاقىرىلدى دەپ جازادى almaty.tv. ءسويتىپ، جۇمىسسىز جۇرگەندەرگە 2 مىڭنان اسا بوس ورىندار ۇسىنىلدى. ءتىپتى اراسىندا باسشىلىق لاۋازىمدار دا بار. بوس ورىندار ۇمىتكەرلەردىڭ شاما-شارقىنا قاراي تاڭدالىپ، ۇسىنىلادى. ال بەرىلگەن جۇمىسقا ناقتى ورنالاسۋ ءۇشىن ازاماتتارعا ويلانۋعا ءبىر ايداي ۋاقىت بەرىلەدى. ەگەر وسى مەرزىم ارالىعىندا جۇمىسقا تۇرماسا، وندا قارىزى بار اكەلەرمەن ءىس باسقاشا جۇرگىزىلمەك.

جۇمىسپەن قامتۋ ورتالىعىنىڭ ەسىگى ءوز بالالارىنا اقى تولەمەي جۇرگەن اكەلەر ءۇشىن ايقارا اشىلدى. اليمەنتىن تولەمەۋ ءۇشىن ايلاسىن اسىرىپ جۇرگەن بورىشكەرلەر دە بار اراسىندا. ايتاتىن سىلتاۋلارى - جۇمىستىڭ جوقتىعى. ال قالانىڭ پروكۋرورلارى بۇل ماسەلەنى شەشۋگە بىلەك سىبانا كىرىسىپتى.

بىلىكتى مامان قاي كەزدە دە سۇرانىسقا يە. جۇمىس بەرۋشىلەر بورىشكەرلەردىڭ قارىزى بارىنا قاراماستان، ولاردىڭ كاسىبيلىگىن باعالاۋعا دايىن. ءتىپتى كەيبىر مەكەمەلەر ۇمىتكەرلەرگە ديرەكتور، باسشىنىڭ ورىنباسارى سياقتى 200-دەن استام بوس ورىندى ۇسىنىپ جاتقانعا ۇقسايدى.

«ءقازىر جۇمىسپەن قامتۋ ورتالىعىندا بىزدە 2 مىڭنان استام بوس جۇمىس ورىندارى تىركەلگەن جۇمىس بەرۋشىلەردەن كەلگەن. وسى بوس جۇمىس ورىندارىنىڭ ىشىندە 600-دەن استامى جوعارى وقۋ ورىندارىن بىتىرگەن تالاپ قويىلعان. سونىمەن قاتار 1500-دەن استامى ورتا وقۋ ورىندارىن بىتىرگەن تالاپتار بار. قالعاندارى وقۋى بويىنشا تالاپتار قويىلماعان»، - دەدى جۇمىسپەن قامتۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گاۋحار ابۋيەۆا.

جۇمىسسىزدار سانىن ازايتۋ ماقساتىندا بيزنەسپەن اينالىسقىسى كەلگەندەرگە دە مۇمكىندىكتەر قاراستىرىلىپتى. ماسەلەن ءوز كاسىبىن اشام دەۋشىلەرگە ميكروكرەديتتەر بەرىلەدى. ال ۇسىنىلعان جۇمىستارعا ۇمىتكەر ءبىر ايدىڭ كولەمىندە كىرىسپەسە، ولارعا قاتاڭ شارا قولدانىلماق.

«باعىت بەرەمىز، ەگەر بۇل باعىت بويىنشا ءبىر ايدىڭ كولەمىندە تىركەلمەي، جۇمىس اتقارماي جاتقان بولسا، بۇل جەردە دە ءوزىنىڭ جاۋاپكەرشىلىكتەرى بار. ونىڭ ءبارى تۇسىندىرىلەدى ءقازىر. سونىمەن قاتار، قازىرگى تاڭدا  الماتى قالاسى بويىنشا جاۋاپكەرشىلىكتەر ايتاتىن بولساق، 176 بورىشكەر اكىمشىلىك جاۋاپكەرشىلىككە تارتىلدى جانە 5 بوىرشكەردىڭ ۇستىنەن قىلمىستىق ءىس قوزعالدى. ونىڭ ۇشەۋى بويىنشا سوت وكىمى شىقتى. 2ء-ۋى قارالۋدا»، - دەدى المالى اۋدانى پروكۋراتۋراسىنىڭ ءبولىم باسشىسى ەرلان قاسىمبايەۆ.

ءقازىر اليمەنتتى قايتارۋ بويىنشا 8 مىڭداي ازاماتتىڭ قۇجاتى قارالىپ جاتىر. ولاردىڭ 20 پايىزى بالالارىنىڭ كۇتىمىنە تولەنەتىن قارجىنى ەكى قولعا كۇرەك تاپپاعاندىقتان وتەمەي جۇرگەندىكتەرىن ايتىپ اقتالاتىن كورىنەدى.

نازكەن بايتىلەس، ەلدار مۇقاشيەۆ، «الماتى» تەلەارناسى