نيۋ-يوركتاعى EcoHealth Alliance زەرتتەۋ ۇيىمى «الەمدىك قاۋىپ كارتاسىن» جاساپ شىعاردى. وندا لاتىن امەريكاسى ادامزاتتىڭ دەنساۋلىعىنا ءقاۋىپ توندىرەتىن ۆيرۋستار ورداسى رەتىندە كورسەتىلگەن دەپ جازادى قامشى اقپاراتتىق اگەنتتىگى.

EcoHealth Alliance زەرتتەۋشىلەرى سۇتقورەكتىلەر مەن ۆيرۋستاردى، ولاردىڭ اداممەن قارىم-قاتىناسىن زەرتتەدى.

ولاردىڭ ەسەبىندە جارقاناتتار ەڭ ءقاۋىپتى جانۋار رەتىندە كورسەتىلگەن.

عالىمدار وزدەرى جيناستىرعان مالىمەتتەر سپيد، ەبولا نەمەسە تۇماۋ سەكىلدى اۋرۋلاردىڭ الدىن-الۋعا كومەكتەسەدى دەپ ەسەپتەيدى.

ەڭ ءقاۋىپتى ينفەكسيا ادامعا جانۋاردان جۇققان. ەبولانىڭ كەڭ ەتەك جايۋۋىنا جارقاناتتار سەبەپشى بولعان. ال ۆيچ ادامدارعا مايمىلدان بەرىلدى.

EcoHealth Alliance ماماندارىنىڭ الدىندا كەزەكتى ەپيدەميا قاي جەردە پايدا بولۋى مۇمكىن ەكەنىن بولجاۋ مىندەتى تۇر. ول ءۇشىن ماماندار سۇتقورەكتىنىڭ بەلگىلى 754 تۇرىندە كەزدەسەتىن 586  ۆيرۋستى زەرتتەۋىنە تۋرا كەلدى. مۇندا ادامدار مەن سۇتقورەكتىلەردى جۇقتىرتا الاتىن 188 زوونوزدى جۇقپا كىرەدى. ولاردىڭ كەيبىرى بۇگە-شۇگەسىنە دەيىن زەرتتەلگەن. عالىمدار ۆيرۋستى تاراتۋشىلاردىڭ قايسىسى ادامعا بەرىلۋى مۇمكىن ەكەنىن بىلگىسى كەلدى.

ولاردىڭ جۇمىستارى Nature جۋرنالىندا جاريالاندى. وندا جارقاناتتار تاسىمالدايتىن 17 ينفەكسيا اتالعان. جانە كەمىرگىشتەر تاراتاتىن 10 ينفەكسيا كورسەتىلگەن.

وسىدان كەيىن ماماندار جانۋارلار مەن ينفەكسيا تۇرلەرى الەمنىڭ قاي تۇكپىرىندە كوپ شوعىرلانعانىن انىقتاپ، ونىڭ كارتاسىن جاساپ شىقتى.

زەرتتەۋدىڭ اۆتورلارى ولار قۇرعان كارتا الەم بويىنشا كەلەسى ەپيدەميانىڭ الدىن-الۋعا كومەكتەسەدى دەپ ۇمىتتەنەدى.

«ادامداردىڭ قورشاعان ورتاعا اسەرىنەن ەپيدەميا بولادى دەگەندى جەتكىزگىمىز كەلەدى. ادامزات جابايى تابيعاتقا ارالاسۋدى بارىنشا ازايتۋى قاجەت. اڭشىلىققا شىعىپ، جابايى اڭدار مەكەن ەتەتىن ورتانى جويۋدى توقتاتۋ كەرەك» دەدى زەرتتەۋشىلەردىڭ ءبىرى كيەۆين وليۆال.

EcoHealth Alliance جاڭا ماقساتىن ايقىندادى. ولار ەندى جۇقپالى اۋرۋلاردى تاراتاتىن قۇستاردى زەرتتەپ كورمەك.

دايىنداعان: اسەم المۇحانبەت