ءۇپ ەتكەن جەلگە بولا قارا اسپاندى توڭكەرىپ، ءمولت ەتكەن سۋعا مۇحيتتى قوتارىپ، ءبىر اۋىز سوزبەن اۋىلدى ورتەيتىن اپەندىلەر قانشاما. سولاردىڭ ىشىندە وزگەشەلەۋ شىرەنىپ مويىن جىپكە قىلقىنىپ، ىعايلاردىڭ قاتارىن دا كورىنگىسى كەلەتىن ءبىر كىسى بار.
جانىنا ادام بالاسى جولاماق تۇگىل، الىستان كەلە جاتقانىن كورسەڭ اسقازانىڭ كوتەرىلەدى. تىرشىلىك ءۇشىن كەيدە سوندايلارعا تاۋەلدى بولاتىن ساتتەر دە كەزدەسىپ جاتادى. ولاي ەتپەۋگە لاجىڭ جوق. تۋرا سول ءالسىز جەرىڭنەن ۇستاۋدى ول سەننەن جاقسى ءبىلىپ العان. باسىنان ءسوز اسىرمايتىنى دا سوندىقتان. مويىنىڭا اجىرعى سالىپ، ەرتتەپ جەلكەڭە ءمىنىپ الىپ تەپەڭدەيتىنىن قايتەسىڭ. كەيدە، اسقىنعاننىڭ ۇستىنە اسقىنىپ، قازاققا ءتىل، ار مەن يبا تۋرالى تۇسىندىرگىسى كەلىپ ەكى ۇرتى بۇلكىلدەي قالاتىنى تاعى بار.
اتەيزمنىڭ جىلتپاسىنا جۇمىرىن ابدەن مايلاعان كوركەۋدە توعىشار بايقۇس، قىزدى-قىزدىمەن قۇدايدان قورقۋدى ۇمىتىپ، كەيدە جاراتۋشىنى سىقاققا كۇلكىگە اينالدىرعىسى كەلەدى. مىنە، جۇرت سەنىپ سەنىم ارتىپ وتىرعان نايساپتىڭ كۇيى وسىنداي.
اقىل-ەسى دۇرىستاۋ دەگەندەردىڭ ءوزى، وسى قوراشتى قولتىعىنان دەمەپ، قولپاشتاپ الەك، كوتەرمەلەپ بايەك بولادى. قىستىق سوعىمى مەن اۋجالىن قاراسىتىلعىنداعى توعىشارلار توبى دايارلايدى. جەم-شوبىن دەسەم ارتىق بولار...
نەگىزى ولاردىڭ ويلاپ جۇرگەنى، بۇل «تۇلعانىڭ» قاراستىلىعىن دا جۇرگەنىن اسقان باقىت سەزىنۋدىڭ جەمىسى. ولاردىڭ دا ءقايسىبىرى وڭىپ تۇرعانى شامالى. وسەك ايتىپ جۇرتتى شاعىستىرۋدان قارا ۇزەدى. الدىنا جان سالمايدى.
جەگى قۇرتتىڭ ويلاپ تاپپايتىن بالەسى جوق. جۇمىس دەمالىسىن دا قاراداي ءىشى قىزىپ، قىزىلكوزدىك قاسيەتى ويانىپ تىنىشتا ۇيىقتاي المايدى. نەگە دەيسىز بە، جۇمىس باستالا سالىسىمەن باسقالاردى جامانداپ، قاراستىلىعىنداعى ادامداردى جۇندەي ءتۇتىپ، جەر-جەبىرىنە جەتىپ بوقتايدى. سودان ءلاززات الاتىن سەكىلدى مە، ول جاعىن تۇسىنگەن جان بالاسى ازىرگە جوق.
ورىنسىز اكىرەڭدەپ، قارعاپ-سىلەپ قازبالاپ اكە-شەشەدەن ءتۇسىپ بالاعاتتاۋدىڭ قاس شەبەرى. ديپلوم جۇمىسىن «انايى سوزدەردىڭ اعزاعا اسەرى»،- دەگەن تاقىرىپتا ەكى مىڭ دوللار تولەۋ ارقىلى قورعاپ شىققانىن ايتار بولساق، ءسىز، ءبىزدى جەك كورۋىڭىز بەك مۇمكىن. الايدا شىندىق وسى. نە دەسەڭىز دە ەركىڭىز ءبىلسىن! شۋىلداعان قىز-قىرقىندى جيناپ الىپ، داۋرىعىپ ايعاي سالىپ، شامپان اتىپ شاراپ ءىشىپ شالقىعان دا بارىپ، ونىڭ ناعىز كەسپىرىن كورۋگە بولادى. وعان دەيىن ونى تانۋعا تىرىسۋدىڭ قاجەتى جوق.
ادامدى جامانداپ باقىت تاپپاسىمىز انىق. الايدا كورە تۇرا جاق اشپاي قالۋعا بولمادى. سوڭعىلارعا ەسكەرتۋىمىز بولسىن دەگەن ويمەن قوزعاپ وتىرمىز. جۇرتتار اعاش اتقا مىنگىزگەن دە، تاقىمى اۋىرماسىن دەپ كوپشىك سالىپ بايەك بولدىق. تەكسىز ءبارىبىر تەكسىزدىگىن دالەلدەدى. وسى جولى ول ويىمىزدان اينىپ قالدىق.
وتىرىك كوپىرمە ءسوزدى سۋدىراتىپ، تىلىمەن وزىنەن جوعارعىلاردىڭ كەبىسىن تازالايتىن بولسا حالىقارالىق دارەجەدەگى سپورت شەبەرى، بىرەۋدىڭ سىرتىنان دومالاق ارىز جازىپ، بالە شىعارۋعا كەلسە الەم شەمپيونى بولا الادى. بۇكىل عۇمىرىن «وزىمنەن باسقا ەشبىر جانعا جاقسىلىق جاساماۋ كەرەكپىن»،-قاعيداسىن بەرىك ۇستانعانى سونشا، كەسكىن –كەلبەتىنەن كىم ەكەنى مەنمۇندالاپ تۇرادى.
زاۋدەعالام بىرەۋ جەتىستىككە جەتىپ، قۋانىشقا كەنەلسە، بۇل سابازىڭ ينە جۇتقان يتتەي قىلعىنىپ دوڭبەكشيدى-اي كەلىپ. ونىڭ تەك وزىنە عانا ءتان يت مىنەزىمەن توعىشارلىق قاسيەتى وسىنداي. وسىناۋ جەرشارىن تەك ءبىر ءوزى يەمەدەنىپ، ءبىر ءوزى عانا ءومىر سۇرەتىندەي سەزىنۋى وكىنشتى. ءبارىبىر سىرتىنان شۋىلدايمىز عوي، قۇلاعى تىنىش قالسىن با... جەگى قۇرت ءتۇبى ءوزىن جەپ تىناتىنى اقيقات.
ك.بوعىدابايەۆ
