جۋرناليستەردىڭ مەملەكەتتىك ورگاندارعا اقپارات الۋ ماقساتىندا جولداعان سۇراۋلارىن جاۋاپسىز قالدىرعان قىزمەتكەرلەرگە ەندى قاتاڭ جازا قولدانىلاتىن بولادى دەپ حابارلايدى قامشى اقپاراتتىق اگەنتىگى elana.kz-كە سىلتەمە جاساپ. بۇل تۋرالى ق ر پارلامەنتى ماجىلىسىندە وتكەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اقپارات جانە كوممۋنيكاسيالار ماسەلەلەرى بويىنشا وزگەرىستەر مەن تولىقتىرۋلار ەڭگىزۋ تۋرالى» زاڭ جوباسىنىڭ تالقىلاۋىندا ق ر اقپارات جانە كوممۋنيكاسيالار ءمينيسترى داۋرەن ابايەۆ مالىمدەدى.

وسى ۋاقىتقا دەيىن ب ا ق وكىلدەرى تاراپىنان رەسمي ورگاندارعا جىبەرىلگەن ساۋالدار مەن حاتتاردىڭ جاۋاپ مەرزىمى كەشىگىپ، ساپاسىز تۇردە كەلەتىندىگى نە مۇلدە جاۋاپسىز قالاتىندىعى تۋرالى سىندار ءجيى ايتىلىپ كەلگەن. ءمينيستردىڭ پايىمداۋىنشا، جاڭا نورما مەملەكەتتىك ورگانداردىڭ جاۋاپكەرشىلىگىن ارتتىرىپ، بۇقارالىق اقپارات قۇرالدارىمەن ارىپتەستىكتى نىعايتادى.

«بارلىق مەملەكەتتىك ورگانداردا باسپاسوزبەن بايلانىسقا جاۋاپتى ارنايى قىزمەتكەر بولادى. ونىڭ مىندەتى – بۇقارالىق اقپارات قۇرالدارى وكىلدەرى جولداعان ساۋالدارعا تولىق، ۋاقىتىلى ءارى ساپالى جاۋاپ بەرۋ. ءقازىر جۋرناليستەردىڭ 90 پايىزعا جۋىعى رەسمي ورگانداردان 3 كۇن ىشىندە كەلەتىن جاۋاپتاردىڭ ساپاسىنا نارازىلىق بىلدىرەدى. وسىعان بايلانىستى ارنايى سۇراۋلارعا جاۋاپ بەرۋ مەرزىمى 15 كۇنگە دەيىن ۇزارتىلادى»، – دەدى مينيستر.

ق ر اقپارات جانە كوممۋنيكاسيالار مينيسترلىگىنىڭ مالىمەتىنە سايكەس، 2016 جىلى عالامتور قولدانۋشىلارىنىڭ تالقىلانۋىنا سالىنعان زاڭ جوباسىمەن جۇمىس تولىق اشىقتىق جانە جاريالىلىق جاعدايىندا جاسالعان. بەلگىلى ۇكىمەتتىك ەمەس ۇيىمدار، جۋرناليستەر، ۇلتتىق كاسىپكەرلەر پالاتاسىنىڭ وكىلدەرى مەن پارلامەنت دەپۋتاتتارى ەنگەن جۇمىس توبى وسى ۋاقىتقا دەيىن كەلىپ تۇسكەن 200-دەن استام ۇسىنىستىڭ 70% جۋىعىن ەسكەرىپ، قۇجاتقا قوسقان.

شولۋشى: اسەم المۇحانبەت