ميننەسوتانىڭ 19 جاستاعى تۇرعىنى موناليزا پەرەس You tube ارناسىنا ارنايى ۆيدەو ءتۇسىرۋ ساتىندە 22 جاستاعى جىگىتى پەدرو ءرۋيزدى بايقاماي ءولتىرىپ قويعان. بۇل تۋرالى بي-بي-سي جاڭالىقتار قىزمەتى حابارلايدى.

جەرگىلىكتى پوليسەي قىزمەتكەرلەرىنىڭ مالىمەتىنشە، جۇپ بەينەبايان تۇسىرمەكشى بولعان. سەناريي بويىنشا، پەرەس قالىڭ كىتاپ ۇستاپ تۇرعان جىگىتى رۋيزگە وق اتۋى ءتيىس ەدى، الايدا وق كىتاپتان ءوتىپ كەتەدى. ءوز ەكسپەريمەنتتەرى ءۇشىن ولار مۇقاباسى قالىڭ ەنسيكلوپەديا كىتابى مەن Desert Eagle ءىرى كاليبرلى تاپانشاسىن پايدالانعان.

بەينەبايان ءتۇسىرۋ ءۇشىن جاستار بولمەگە ەكى كامەرا ورناتتى. بايقاۋسىزدا بولعان قىلمىستىڭ كۋاگەرلەرى ءۇش جاسار ءبۇلدىرشىن مەن «تريۋكتى» تاماشالاۋعا كەلگەن 30  شاقتى كورشىلەرى بولدى.

پەرەس وق اتقاندا، وق كىتاپتى تەسىپ، ءرۋيزدىڭ ىشىنە تيەدى. ەسى شىققان قىز بالا بىردەن 911-گە حابارلاسادى، الايدا جىگىتتىڭ ءومىرىن ساقتاپ قالۋ مۇمكىن بولمادى.

پەرەس پوليسەي قىزمەتكەرلەرىنە تۇسىنىكتەمە بەرەردە YouTube ارناسىنا ۆيدەو ءتۇسىرۋ ءرۋيزدىڭ يدەياسى بولعانىن ايتادى. قايعىلى وقيعا ورىن الماس بۇرىن قىز بۇل جايىندا ءوزىنىڭ تۆيتتەر پاراقشاسىنا جازادى.

«ءبىز پەدرو ەكەۋمىز اسا ءقاۋىپتى ۆيدەو تۇسىرمەكشىمىز. بۇل مەنىڭ ەمەس، ونىڭ يدەياسى»، دەپ جازدى پەرەس.

تۇسىرمەك بولعان ۆيدەو ارقىلى جاس جۇپ وزدەرىنىڭ YouTube ارناسىنىڭ تانىمالدىلىعىن ارتتىرىپ، تىركەلۋشىلەر جيناماق بولعان.

تانىستارىنىڭ ايتۋىنشا، ەكەۋى ءبىر-بىرىن قاتتى سۇيگەن، ءارى ءدال وسىلاي بولماۋى ءتيىس ەدى.

جۇپ YouTube ارناسىنداعى جەكە ۆيدەوبلوگتارىن 2017 جىلدىڭ ناۋرىزىندا اشقان. ماقساتتارى – ادامدارعا «ەرتە اتا-انا اتانعان جاس جۇپتىڭ» ءومىرىن كورسەتۋ.

7 ايعا اياعى اۋىر موناليزا پەرەسكە 10 جىلعا باس بوستاندىعىنان ايىرۋ مەن 20 مىڭ دوللار ايىپپۇل تولەۋ ءقاۋپى ءتونىپ تۇر.

بۇگىندە قىزدى 7 مىڭ دوللار كەپىل اقشامەن ۇيىنە بوساتتى. سوت 5 شىلدە كۇنى وتپەك.

شولۋشى: سابينا رامازان