ەرتەدە حالقىمىز اس ادال بولۋى ءۇشىن ايەلدىڭ قولىندا مىندەتتى تۇردە ساقينا يا جۇزىك بولۋى كەرەك دەپ ساناعان. قازاق اراسىنداعى «ساقينانى سانگە سالمايدى، ول – تازالىققا تارازى»، «ساقينا سانگە جاتپاس، ايقاي انگە جاتپاس» دەگەندەي تىركەستى ۇعىمدار ساقينانىڭ تەك ساندىك قانا ەمەس، گيگيەنالىق قىزمەت تە اتقاراتىنىن دالەلدەيدى دەپ جازادى جازادى قامشى اقپاراتتىق اگەنتتىگى.
مۇنىڭ ءوزى حالىقتىڭ ساقينا سوعىلاتىن كۇمىس نە التىننىڭ تاتتانۋعا ۇشىرامايتىنىن، سۋدىڭ، تاماقتىڭ تەز بۇزىلماۋىنا سەپتىگىن تيگىزىپ، دەنساۋلىققا جاعىمدى اسەر ەتەتىنىن ەرتەدەن-اق اڭعارعانىن كورسەتسە كەرەك. كۇنى بۇگىنگە دەيىن اۋىلدىق جەرلەردە جاس كەلىنشەك نارەستەسىن شومىلدىرار الدىندا وعان سول ءۇيدىڭ ۇلكەندەرى (ەنەسى نە ابىسىنى) «قولىڭا ساقينا سالىپ ال، تازالىققا ءتان بولادى» دەپ ەسكەرتىپ وتىرادى. ولاي بولسا، نارەستەنى قىرقىنان شىعارعاندا ونى شومىلدىراتىن سۋعا التىن نە كۇمىس ساقينا نەمەسە بىلەزىك سالۋ ءداستۇرى ولاردى سوعان قاتىستىرىپ وتىرعان ايەلدەرگە سىيلىق رەتىندە ۇلەستىرۋ ءۇشىن عانا ەمەس، وسىندا اسىل بۇيىمداردى قاسيەتتى ساناۋدان، تازالىققا ءمان بەرۋدەن دە شىققان سياقتى.
مەديسينالىق تۇرعىداعى ساقينا سالۋدىڭ پايدالارى جەتەرلىك. ماسەلەن، ساۋساققا تاعىلعان ساقينا – بۇيرەك، باۋىر، ءوت، جۇرەك، جۇيكەگە تىكەلەي بايلانىستى جۇيكە نۇكتەلەرىن ءدوپ باسىپ، بۇكىل قان-تامىر جۇيەلەرىنە وڭ اسەر ەتەدى ەكەن. كەرىسىنشە، ساقينانى ۇدايى كىشى ساۋساعىنا تاعىپ جۇرگەن ادام ارتەسكلەروز جانە گيپەرتونيا كەسەلدەرىنە ۇشىرايدى.
