قازىرگى ۋاقىتتا اۋىل شارۋاشىلىعى مينيسترلىگى ۇيىمداستىرعان اۋىل شارۋاشىلىعى ونىمدەرىن جۇزەگە اسىرۋ جارمەڭكەسىنىڭ ناتيجەسىندە ءبىرقاتار الەۋمەتتىك ماڭىزى بار ازىق-تۇلىك تۇرلەرىنىڭ باعاسى تومەندەدى دەپ حابارلايدى قامشى اقپاراتتىق اگەنتتىگى ق ر اشم باسپا ءسوز قىزمەتىنە سىلتەمە جاساپ.

اتاپ ايتقاندا، 2017 جىلدىڭ ءبىرىنشى جارتىجىلدىعى ءۇشىن قيارعا – 58،7 %، قىزاناققا – 28،7 %، جۇمىرتقاعا – 27%، قاراقۇمىق جارماسىنا – 13،4 %، كۇنباعىس مايىنا – 6،6 %، قانتقا – 1،8 % تومەندەۋى بەلگىلەندى.

ءونىم وندىرۋشىلەردەن تىكەلەي تۇتىنۋشىعا جارمەڭكە ارقىلى نارىقتاعى باعادان 10-15% تومەن ساتىلاتىنداي جۇمىستار جالعاسىن تابۋدا. ماسلەن، ماۋسىم ايىنىڭ باسىندا قاتارىنان 3200 جارمەڭكە وتكىزىلدى.

بۇدان بولەك، جەرگىلىكتى اتقارۋشى ورگاندار مەن وندىرۋشىلەر اراسىندا ازىق-تۇلىك تاۋارلارىن بەكىتىلگەن باعامەن ىسكە اسىرۋعا قاتىستى، سونداي-اق، الەۋمەتتىك ماڭىزى بار ازىق-تۇلىك تاۋارلارىنىڭ ۇستەمە باعاسىن 10% اسىرماۋ ءۇشىن ساۋدا سۋبەكتىلەرىمەن مەموراندۋمعا قول قويىلدى.

شولۋشى: اسەم المۇحانبەت