ءۇندىستاننىڭ بحۋبانەشۆار قالاسىندا وتكەن ازيا چەمپيوناتى ءوز مارەسىنە جەتتى. ءتورت كۇنگە سوزىلعان قۇرلىق بىرىنشىلىگىندە قازاقستان قۇراماسى 4 التىن، 2 كۇمىس، 2 قولا مەدال جەڭىپ الدى دەپ حابارلايدى قامشى اقپاراتتىق اگەنتتىگى. 

جارىستىڭ سوڭعى كۇنىندە سپرينتەرلەر ءۇشىن باسەكە ءساتتى بولدى. ايەلدەر اراسىندا 200 مەترگە جۇگىرگەن ۆيكتوريا زيابكينا بيىلعى ماۋسىمداعى ازياداعى ۇزدىك ناتيجەلەردىڭ ءبىرىن كورسەتىپ، التىن مەدال جەڭىپ الدى. ونىڭ ۋاقىت كورسەتكىشى – 23.10 سەكۋند. مارەگە ەكىنشى بولىپ، شري-لانكا وكىلى رۋمەشيكا كۋماري كەلدى. ۇزدىكتى ۇشتىكتى تاعى ءبىر جەرلەسىمىز ولگا سافرونوۆا (23.47 سەك) قورىتىندىلادى.

– ۆيكتوريا ستارت باسىندا باياۋ قيمىلدادى. كەشە ەستافەتادا جۇگىرگەن بولاتىن. سوندىقتان ازداپ شارشادى. دەگەنمەن بۇگىن ءوزىنىڭ قالاي جۇگىرەتىنىن كورسەتتى. 200 مەترگە جۇگىرۋدە كوبىنەسە ارا قاشىقتىقتىڭ جارتىسىنان اسقاننان كەيىن شەشىلەدى. ۆيكتوريا مارەگە جاقىنداعاندا كۇش الادى. نەگىزىنەن ۇنەمى سولاي جەڭىپ جۇرەدى، – دەيدى زيابكينانىڭ ۇستازى، تانىمال قازاقستاندىق جاتتىقتىرۋشى ليۋبوۆ نيكيتەنكو.

وسىلايشا، ۆيكتوريا زيابكينا 2017 جىلعى ازيا چەمپيوناتىنىڭ ءۇش دۇركىن چەمپيونى اتاندى. ول بۇعان دەيىن جەكەلەي سىندا 100 مەترگە جۇگىرۋدەن جەڭىسكە جەتكەن بولاتىن. سونداي-اق ارىپتەستەرى  ريما كاشافۋتدينوۆا، سۆەتلانا گولەندوۆا، ولگا سافرونوۆامەن بىرگە 4ح100 مەترگە جۇگىرۋ بويىنشا كوماندالىق ەستافەتادان ەكىنشى التىندى يەلەندى.

ايتا كەتەيىك، 8 شىلدە كۇنى قازاقستاندىق جەڭىل اتلەتتەر 100 مەترگە كوماندالىق ەستافەتاعا جۇگىرۋدە سارى قۇرلىقتا وزدەرىنە تەڭ كەلەر ەشكىم جوق ەكەنىن دالەلدەگەن بولاتىن. قازاقستان قۇراماسىنىڭ ۋاقىت كورسەتكىشى – 43.53 سەكۋند. ەكىنشى ورىن جۇڭگو قىزدارى (44.50) بولسا، ۇشتىكتە ءۇندىستان (44.57) قۇراماسى بار.

ءتورتىنشى التىندى ءۇش قارعىپ سەكىرۋدەن ماريا وۆچيننيكوۆا ەنشىلەدى. ول ازيا چەمپيوناتىن 13.72 مەترمەن قورىتىندىلادى. 18 جاستاعى اتلەت سونىمەن قاتار 4-13 تامىز ارالىعىندا لوندوندا وتەتىن الەم چەمپيوناتىنىڭ جولداما الدى. ماريادان بولەك، ءدال وسى سايىستان تاعى ءبىر قازاقستاندىق سپورتشى يرينا ەكتوۆا كۇمىس مەدال جەڭىپ الدى. ول ءوز كەزەگىندە 13.62 مەترگە سەكىردى.

ازيا چەمپيوناتىنان سپرينتەر ولگا سافرونوۆاعا ەكى مەدال بۇيىردى. ول 100 مەتردە  (11.45 سەكۋند) كۇمىس، 200 مەتردە قولا جۇلدە ەنشىلەدى.

تاعى ءبىر قولانى جارىستىڭ ەكىنشى كۇنىندە يادرو سەرپۋدەن يۆان يۆانوۆ ولجالاعان بولاتىن. ول يران مەن ءۇندىستان سپورتشىلارىن العا جىبەرىپ، 19.41 مەترگە لاقتىرىپ، ءۇشىنشى ورىنعا قول جەتكىزدى. 

وسىلايشا، بحۋبانەشۆارداعى ازيا چەمپيوناتىنان قازاقستان قۇراماسىنا 8 مەدال بۇيىردى. ونىڭ تورتەۋى التىن، ەكەۋى كۇمىس، ەكەۋى قولا. ءسويتىپ، جالپى كوماندالىق ەسەپتە ءۇشىنشى ورىنعا جايعاستى. كوشباسىندا جارىس قوجايىنى ءۇندىستان 29 مەدال (12 التىن، 5 كۇمىس، 12 قولا) مەن جۇڭگو (8 التىن، 7 كۇمىس، 5 قولا) بار.

جالپى، ازيا چەمپيوناتىنا 43 ەلدەن 800-دەن استام سپورتشى قاتىستى.