اتىراۋلىق بلوگەر الىبەك ناۋاروۆ جەتى حان جەرلەنگەن سارايشىق جەرىندە جۇرگىزىلگەن ەكسپەديسيالاردىڭ كەزىندە كوپتەگەن جادىگەرلەردىڭ اكەتىلگەنىن ايتتى. بلوگەر بۇل تۋرالى فەيسبۋكتەگى پاراقشاسىندا جازدى.
“سارايشىقتا تاۋەلسىزدىك العانعا دەيىن نەشە ەكسپەديسيا جۇرگىزىلدى، قانداي ماقساتتا، وسىلاردىڭ انىقتىعىنا كوز جەتكىزىپ قۇجاتتارىن كوپشىلىككە تانىستىرۋ كەرەك. كورشى ەلدەن دە ماماندار كەلىپ قازبا جۇمىستارىن جۇرگىزىپ كوپتەگەن جادىگەردى الىپ ەلدەرىنە ورالعانىن كوپتىڭ ءبىر بىلسە ءبىرى بىلە بەرمەيدى”، - دەيدى بلوگەر.
اۆتوردىڭ ايتۋىنشا، ەكسپەديسيالار كەزىندە اكەتىلگەن جادىگەرلەردى ەلگە قايتارۋدى قولعا الۋ قاجەت.
“اۋەل باستان ەكسپەديسيا قالاي باستالدى، قانداي جاعدايدا؟ ءبارىن تىزبەكتەپ ءبىر دوكۋمەنتالدى فيلم ءتۇسىرۋدى قولعا العان ءجون. جانە كورشى ەلگە كەتكەن جادىگەرلەردى قايتارۋعا تىرىسقانىمىز جاقسى بولار ەدى”، - دەيدى ول.
قازىرگى تاڭدا جايىق سۋى شايىپ بارا جاتقان قالانى ساقتاپ قالۋ ءۇشىن وزەننىڭ جاعاسى بەكىتىلىپ جاتىر. بۇعان دەيىن اتىراۋ وبلىسىنىڭ اكىمى نۇرلان نوعايەۆ بۇل جوباعا 1،5 ميلليارد تەڭگە بولىنگەنىن مالىمدەدى. جۇمىس 2018 جىلى اياقتالۋى ءتيىس. سونىمەن قاتار، بيىل مادەنيەت جانە سپورت مينيسترلىگى سارايشىقتى قالپىنا كەلتىرۋ ءۇشىن 100 ميلليون تەڭگە بولەتىنىن حابارلادى. شاھاردىڭ ورنىن تۋريستىك ورتالىققا اينالدىرۋ جوسپارلانعان.
كونە قالانىڭ ورنى اتىراۋ قالاسىنان 45 شاقىرىم جەردە جايىق وزەنىنىڭ جاعاسىندا ورنالاسقان. التىن وردانىڭ ساياسي، ەكونوميكالىق ورتالىقتارىنىڭ ءبىرى بولعان قالا قاسىم حاننىڭ تۇسىندا قازاق حاندىعىنىڭ استاناسى اتاندى. جىبەك جولىنىڭ بويىندا تۇرعان مۇندا 7 حان جەرلەنگەن. ولار: موڭكە، توقتاعۋ، جانىبەك، ءامىر وقاس، قاسىم حان، شيح ماماي جانە ءجۇسىپ حاندار.
