موڭعوليانىڭ جاڭا پرەزيدەنتى حالتمااگيين باتتۋلگا انت قابىلداپ، بۇرىنعى پرەزيدەنتتەن ءموردى الدى، دەپ جازادى قامشى اقپارات اگەنتتىگى. ءسويتىپ جاڭادان سايلانعان پرەزيدەنت ءوز مىندەتىنە تولىقتاي كىرىستى.

جەرگىلىكتى باق-تىڭ مالىمەتىنشە، سالتاناتتى ءراسىم مەملەكەتتىك رەزيدەنسيانىڭ ۇلكەن زالىندا ءوتتى. حالتمااگيين باتتۋلگا پوديۋمعا شىعىپ، قولىنا موڭعوليانىڭ كونستيتۋسياسىن الىپ، انت بەردى دە، سوڭىندا الداعى جوسپارىمەن ءبولىستى.

ءبىرىنشى كەزەكتە پرەزيدەنت ەلدەگى كەدەيلىك دەڭگەيىمەن كۇرەسۋگە ۋادە بەردى. سونداي-اق موڭعوليا ازاماتتارى ءۇشىن جاڭا جۇمىس ورىندارىن اشۋمەن اينالىساتىنىن ايتتى.

حالتمااگيين باتتۋلگا ءوز ازاماتتارىنىڭ پىكىرىن مۇقيات تىڭداپ، ۇلتتىق بىرلىكتى قامتاماسىز ەتەتىنىن ايتتى.

«موڭعوليا ۇلتتىق ونەركاسىبى دامىعان جانە قىسقا مەرزىم ىشىندە ءوز ەكونوميكاسىن كوتەرە بىلگەن ەل بولادى»، - دەدى موڭعوليانىڭ جاڭا پرەزيدەنتى يناۋگۋراسيانىڭ سالتاناتىندا. 

ەسكە سالا كەتەيىك، مونعوليا ورتالىق سايلاۋ كوميتەتى جەتەكشىسى چوينزونگيين سودنومسەرەن وپپوزيسيالىق دەموكراتيالىق پارتيادان سايلاۋعا تۇسكەن حالتمااگيين باتتۋلگا پرەزيدەنتتىك سايلاۋدىڭ ەكىنشى كەزەڭىندە جەڭىپ، رەسمي پرەزيدەنت بولعانىن مالىمدەدى. سودنومسەرەننىڭ مالىمدەمەسىنە ساي، باتتۋلگا 611 مىڭ 226 داۋىس (50،61%) جيناپ، ەلدىڭ بەسىنشى پرەزيدەنتى بولىپ سايلانعان.

شولۋشى: گۇلىم جاقان