رەسەيدىڭ تيۋمەن وبلىسى توبول اۋداندىق سوتى «فيليپپ ليس» دەگەن اتپەن تانىمال 22 جاستاعى فيليپپ بۋدەيكيندى ءۇش جىلعا جالپى قونىستانۋ مەكەمەسىنە جىبەرۋ جونىندە شەشىم شىعاردى. ونى ادامداردىڭ سۋيسيد جاساۋىنا اكەلدى دەپ ايىپتايدى، دەپ حابارلايدى Qamshy.kz اقپارات اگەنتتىگى centralasian.org-كە سىلتەمە جاساپ.

«سوت پروسەسى كەزىندە سوتتالۋشىعا تاعىلعان ايىپتار دالەلدەندى»، – دەيدى سۋديانىڭ كومەكشىسى ەلۆيرا ياكۋبوۆا.

سوتتىڭ باسپا ءسوز قىزمەتىنىڭ حابارلاۋىنشا، فيليپپ بۋدەيكين كىناسىن تولىق مويىنداعان، ىستەگەن ىستەرىنە وكىنىش بىلدىرگەن. تەرگەۋ ءىسى بويىنشا ايىپتالۋشى 2016 جىلدىڭ ءساۋىر، مامىر ايىندا «كامەلەتكە جاسقا تولماعاندار اراسىندا ءسۋيسيدتى ناسيحاتتاعان».

تەرگەۋشىلەر سوتتا ەكى ەپيزودتى بايانداعان: بۋدەيكين استراحان قالاسىنىڭ 16 جاستاعى تۇرعىنىن وزىنە قول جۇمساۋعا ۇگىتتەگەن. ءبىراق ارنايى قىزمەت اراشا تۇسكەن. سونىمەن بىرگە «فيليپپ ليس» 17 جاستاعى قىزدىڭ سۋيسيدكە بارۋىنا سەبەپشى بولعان. قىزدى دارىگەرلەر قۇتقارىپ قالعان.

2016 جىلدىڭ مامىر ايىندا «نوۆايا گازەتا» باسىلىمى «ءولىم توبى» دەگەن ماقالا جاريالادى. وندا «ۆكونتاكتە» جەلىسىندە جاسوسپىرىمدەردى سۋيسيد جاساۋعا ماجبۇرلەيتىن توپ بار ەكەندىگى ايتىلعان. جابىق توپقا 130 وقۋشى مۇشە بولعان. كەيىن الەۋمەتتىك جەلىلەردەگى ءقاۋىپتى ويىن جايىندا الەمدىك ب ا ق حابارلاي باستادى.