ق ر پرەمەر-مينيسترى باقىتجان ساعىنتايەۆتىڭ توراعالىعىمەن وتكەن ۇكىمەت وتىرىسىندا ق ر ءبىلىم جانە عىلىم ءمينيسترى ەرلان ساعادييەۆ 2017-2018 جاڭا وقۋ جىلىنىڭ باستالۋىنا ازىرلىك بارىسى تۋرالى ەسەپ بەردى. بۇل تۋرالى Qamshy.kz اقپارات اگەنتتىگى پرەمەر-مينيستردىڭ باسپا ءسوز قىزمەتىنە سىلتەمە جاساپ حابارلايدى.
ە.ساعادييەۆ نەگىزگى تۇجىرىمدامالىق شەشىمدەردىڭ وتكەن جىلى قابىلدانعانىن ايتتى. سوندىقتان بيىلعى جانە كەلەسى جىلدىڭ مىندەتتەرى – باستالعان شارالاردى سوڭىنا دەيىن اياقتاپ، ناتيجەلەرگە قول جەتكىزۋ.
بۇل باعىتتاعى مىندەتتەردىڭ ءبىرى – 2019 جىلدىڭ قىركۇيەك ايىندا بارلىق بالاباقشالار مەن مەكتەپتەردە ءنولىنشى سىنىپتى ەنگىزۋگە ازىرلىك بولىپ تابىلادى. ونىڭ قاتارىندا «الىپپەنى» تابىستى ماقۇلداۋ، تاربيەشىلەر مەن پەداگوگتەردىڭ بىلىكتىلىگىن ارتتىرۋ، نورماتيۆتىك-قۇقىقتىق بازانى 0+11 بويىنشا 12 جىلدىق وقىتۋ سيكلىنە سايكەستەندىرۋ بار.
مەكتەپتەگى باستى مىندەت – وتكەن جىلى قولعا الىنعان جاڭارتىلعان مازمۇنعا كوشۋ بولىپ قالا بەرەدى. 2017 جىلى وعان قوسىمشا 2، 5 جانە 7 سىنىپتار كوشەدى.
سونىمەن قاتار پاندەردى اعىلشىن تىلىندە وقىتۋ بويىنشا اۋقىمدى پيلوت باستالادى، وعان ءتىل كۋرستارىن بىتىرگەن نەمەسە ەندى بىتىرەتىن 1500-دەن استام ءمۇعالىم اتسالىسادى.
بۇدان وزگە، مەكتەپتەردىڭ قامقورلىق كەڭەستەرىن قۇرۋ مەن ودان ءارى نىعايتۋ، ولارعا بۇرىنعىدان دا كوبىرەك وكىلەتتىلىكتەر بەرۋ جانە قامقورلىق كەڭەستەرىنىڭ باقىلاۋىمەن مەكتەپتەردىڭ اكادەميالىق، باسقارۋشىلىق، قارجىلىق ەركىندىكتەرىن جوسپارلى تۇردە كەڭەيتۋ ماڭىزدى باعىت بولىپ تابىلادى. كجتب مەن «بارشاعا ارنالعان تەگىن كجتب» جوباسى بويىنشا جۇمىستار ءارى قاراي جالعاسۋدا.
جوعارى وقۋ ورىندارى بويىنشا باستى مىندەت كاسىبي قاۋىمداستىققا، جۇمىس بەرۋشىلەرگە «اتامەكەن» ۇكپ-مەن بىرلەسىپ قازاقستاندىق جوو-لاردىڭ ساپاسى، زاماناۋيلىعى مەن نارىققا قاجەتتىلىگى تۇرعىسىنان ولاردىڭ ءبىلىم بەرۋ باعدارلامالارىنىڭ ناقتى ءتىزىلىمىن قۇرۋعا مۇمكىندىك بەرەتىن زاڭنىڭ قابىلدانۋى بولىپ تابىلادى. بۇل باعىتتاعى جۇمىستار باستالدى – ۇكپ-مەن بىرلەسىپ ءىت-ماماندىقتار ءتىزىلىمى تاياۋدا تانىستىرىلاتىن بولادى. بۇل نارىقتان ساپاسىز جانە ەسكىرگەن ءبىلىم باعدارلامالارىن الىپ تاستاۋعا مۇمكىندىك بەرەدى.
وعان قوسا، جوو-لاردىڭ اكادەميالىق دەربەستىگىن ارتتىرۋ مەن قوعامدىق باقىلاۋدى كۇشەيتۋ فورماسى رەتىندە باقىلاۋ كەڭەستەرىن نىعايتۋ جۇرگىزىلىپ جاتىر.
ءسوز سوڭىندا ءبىلىم جانە عىلىم ءمينيسترى جالپى ءبىلىم بەرۋ جۇيەسى وقۋ جىلىنىڭ باستالۋىنا ءازىر ەكەنىن اتاپ ءوتتى، بارلىق ماسەلەلەر بويىنشا كەڭىنەن ءتۇسىندىرۋ جۇمىستارى جۇرگىزىلەدى.
ق ر پرەمەر-مينيسترى باقىتجان ساعىنتايەۆ اكىمدىكتەر مەن مۇددەلى مەملەكەتتىك ورگاندارعا بارلىق باعىتتارداعى جۇمىستاردىڭ اتقارىلۋىن باقىلاۋعا الۋدى تاپسىردى.
