بۇگىن ەحرو كورمەسىنىڭ اۋماعىندا ءۇندىستان مەملەكەتىنىڭ ۇلتتىق كۇنى ءوتىپ جاتىر دەپ حابارلايدى Qamshy.kz اقپارات اگەنتتىگى.

«حابار» اگەنتتىگىنىڭ مالىمەتىنە سۇيەنسەك، ەكى ەلدىڭ مەملەكەتتىك تۋلارى كوتەرىلىپ، ءانۇراندارى شىرقالدى. ساحنا تورىنە ەلىمىزدىڭ سىرتقى ىستەر ءمينيسترىنىڭ ورىنباسارى اقىلبەك كامالدينوۆ شىعىپ، قۇتتىقتاۋ ءسوزىن سويلەدى.

ءۇندىستان تاراپىنان ەحرو كورمەسىنە ەل دەلەگاسياسىن باسقارىپ، قازاقستانداعى ەلشى حارش كۋمار دجاين كەلدى. كەيىن ۇلتتىق ساحنادا ءۇندى ەلىنىڭ «رادجباحار» توبى بي ورىندادى. قازاقستاندا ءۇندىستان مادەنيەتىنە اۋەس جاندار كوپ بولعاندىقتان، مۇنداي كورىنىس كوپشىلىكتىڭ كوڭىلىنەن شىعادى دەگەن ويدامىز. ال كەيىن قالىپتاسىپ قالعان ءداستۇر بويىنشا دەلەگاسيالار مەن شاراعا شاقىرىلعان قوناقتار ۇلتتىق پاۆيلونعا بارىپ، جەرگىلىكتى ەكسپوزيسيالارمەن تانىسادى.

ءۇندىستاندا عىلىم سالاسى قارقىندى دامىپ كەلەدى. ونىڭ ىشىندە بالامالى ەنەرگەتيكاعا باسا نازار اۋدارىلىپ وتىر. سەبەبى ەلدىڭ اۋىلدى ايماقتارىندا تۇراتىن حالىقتى ەلەكتر ەنەرگياسىمەن قامتۋ الدىڭعى قاتارداعى ماسەلەلەردىڭ ءبىرى بولىپ تۇر. سول سەبەپتى كەزىندە ءۇندىستان بيلىگى حالىقارالىق كۇن اليانسىن قۇرۋدى ءجون كوردى. مۇنداعى باستى ماقسات – الەمدىك ەنەرگوتيىمدىلىك نارىعىندا نورماتيۆتىك قۇقىقتىق بازانى قۇرۋ. 2030 جىلعا دەيىن جەرگىلىكتى ۇكىمەت بالامالى ەنەرگيا ءوندىرىسىن 400 گۆت-قا دەيىن جەتكىزۋدى كوزدەپ وتىر. جەل ەنەرگەتيكاسىن وندىرۋدەن دە مەملەكەت الەمدە كوش باستاپ كەلەدى. وسى جەتىستىكتەر جايلى تولىق اقپارات ۇلتتىق پاۆيلوندا بار.