وڭتۇستىك ازيا ەلدەرى تولاسسىز جاۋعان جاڭبىردان زارداپ شەگىپ وتىر. سۋ تاسقىنى سالدارىنان 160 ادام كوز جۇمدى. كەلەڭسىز جاعداي نەپال، بانگلادەش، ءۇندىستاندا ورىن الدى. بۇل تۋرالى Qamshy.kz اقپارات اگەنتتىگى Reuters مالىمەتىنە سۇيەنىپ حابارلايدى.
ەڭ كوپ زارداپ شەككەندەر نەپالدا تىركەلدى. نەپالدا 115 ادام كوز جۇمدى، تاعى 38 ادام ءىس-تۇسسىز جوعالىپ كەتكەن. جالپى ەسەپتەگەندە ەلدىڭ 75 اۋدانىنىڭ 26-سى ءبۇلىندى.
بانگلادەشتىڭ سولتۇستىگىندە سۋ تاسقىنىنان 27 ادام كوز جۇمدى. جارتى ميلليونعا جۋىق تۇرعىن ءوز ۇيلەرىن تاستاپ، ءقازىر بوسقىنداردىڭ مەكەنىن پانالاۋدا.
ءۇندىستاننىڭ بيحار شتاتىندا 10 ادام كوز جۇمسا، اسسام شتاتىندا 15 ادام تابيعي اپات قۇربانى بولعان.
قۇتقارۋشىلار سۋ تاسقىنى ورىن العان اۋىلدارعا بارۋ ءۇشىن تىكۇشاقتار پايدالانۋدا.
