ەكسپو-2017 حالىقارالىق كورمەسىندە افريكا ۇلتتىق كۇنى اياسىندا افريكالىق پاۆيلوننىڭ مەيماندارى قارا جورعا ءبيىن بيلەدى، دەپ حابارلايدى Qamshy.kz اقپارات اگەنتتىگى.
ودان بولەك داۋىلپازدارمەن ءتۇرلى اۋەندەر سومدالىپ، ساحنادا افريكا حالقىنىڭ ءداستۇرلى بيلەرى دە ورىندالدى.
ءداستۇرلى فلانگتان كەيىن ساحنا تورىنە افريكالىق پاۆيلوننىڭ كوميسسارى فيليپ كونتە شىقتى.
«افريكاعا كەلىڭىزدەر. ءبىراق ءبىزدىڭ مينەرالداردى ءوندىرىپ، ءوز ەلدەرىڭىزدىڭ پايداسىن كوزدەۋ ءۇشىن كەلۋدىڭ قاجەتى جوق. ينۆەستيسيا جاساپ، تەڭ دارەجەدە جۇمىس ىستەۋگە كەلىڭىزدەر»، - دەدى كونتە.
سونداي-اق، ەكسپو-2017 كورمەسىنە شاقىرتۋ العاندارى ءۇشىن قازاق حالقىنا العىسىن ءبىلدىردى. افريكانىڭ ۇلتتىق كۇنىندە ەلدىڭ ءداستۇرىن تاماشالاۋ ءۇشىن قالىڭ بۇقارانىڭ جينالعانىنا قۋانىشتى ەكەنىن جەتكىزدى.
ۆيدەو: inform.kz
