قىزىلوردادا جاڭا ۇلگىدەگى اۆتوبۋس پاركى اشىلدى دەپ حابارلايدى Qamshy.kz اقپارات اگەنتتىگى قىزىلوردا وبلىسى اكىمدىگىنىڭ باسپا ءسوز قىزمەتىنە سىلتەمە جاساپ. وعان قىزىلوردا وبلىسىنىڭ اكىمى قىرىمبەك كوشەربايەۆ قاتىسىپ، قىزىلوردالىقتاردى قۋانىشتارىمەن قۇتتىقتادى.
اۆتوپاركتىڭ ەرەكشەلىگى – قالا كولەمىندە قىزمەت كورسەتەتىن ۇلكەن سىيىمدىلىقتاعى اۆتوبۋستارعا ارنالعان تۇراقتار، جانارماي بەكەتى، كولىك جۋۋ الاڭى جانە اۆتوبۋستاردىڭ ۇزدىكسىز جۇمىس جاساۋىنا جاعداي جاسايتىن ءتۇرلى مۇمكىندىكتەر قاراستىرىلعان.
"قالامىزدا حالىقتى باسپانامەن قامتۋ، ينجەنەرلىك-ينفراقۇرىلىمداردى دامىتۋ سەكىلدى ەڭ ماڭىزدى سالالاردا ماقتانىشپەن ايتارلىقتاي اۋقىمدى جوبالار جۇزەگە اسىرىلۋدا. سولاردىڭ ىشىندە باستى جەتىستىكتەرىمىزدىڭ ءبىرى – قالا تۇرعىندارىنىڭ قوعامدىق كولىككە دەگەن سۇرانىسىن قاناعاتتاندىرۋ جانە قالامىزداعى كولىك قاتىناسىن دامىتۋ ماقساتىنداعى جوبالار. مىنە، وسىنداي ماڭىزدى جوبالارىمىزدىڭ تاعى ءبىر ناتيجەسى – قوعامدىق كولىكتەردى كۇتىپ-ۇستاۋعا، تەحنيكالىق قىزمەت كورسەتۋگە جابدىقتالعان قالالىق اۆتوبۋس پاركى پايدالانۋعا بەرىلگەلى تۇر"، – دەدى وبلىس اكىمى قىرىمبەك كوشەربايەۆ.
جاڭا اۆتوبۋستاردىڭ تەحنيكالىق جانە سانيتارلىق جاعدايى ەلدىڭ سۇرانىسىنا ساي بولۋى ءۇشىن وبلىستىق بيۋدجەتتەن 2 ملرد. تەڭگەدەن استام قارجى قاراستىرىلعان. اۆتوبۋس پاركىنىڭ جالپى اۋماعى 5 گەكتاردى قۇرايدى جانە 200 اۆتوبۋسقا شاقتالعان. اۆتوبۋس پاركى 250-300 ادامدى جۇمىسپەن قامتيتىن بولادى.
مۇنىمەن قوسا، اعىمداعى جىلى جانارماي مەن قوسالقى بولشەكتەردىڭ، گازدىڭ باعالارىنىڭ ءبىرشاما قىمباتتاۋىنا بايلانىستى جولاقى تاريفتەرى قايتا قارالدى. ەندىگى كەزەكتە ورتا سىيىمدىلىقتاعى 100-150 جاڭا اۆتوبۋستار ساتىپ الىنىپ، بيلەتتىك جۇيە تولىققاندى ەنگىزىلەتىن بولادى. ءسويتىپ، وبلىس ورتالىعىندا قوعامدىق كولىك قىزمەتى تولىعىمەن جاڭارتىلادى.
ەستەرىڭىزگە سالا كەتەيىك، وسىدان 3 جىل بۇرىن قالا ىشىندە جۇرەتىن قوعامدىق كولىك تاسىمالىن ساپالى قىزمەتپەن قامتاماسىز ەتۋ ماقساتىندا «قىزىلوردا» اۆتوبۋس پاركى» قۇرىلعان بولاتىن. از ۋاقىتتىڭ ىشىندە «قىزىلوردا» اۆتوبۋس پاركى» ءبىرشاما جەتىستىكتەرگە قول جەتكىزىپ كەلەدى. مىسالى، 2014 جىلى قىزىلوردا اۆتوبۋس پاركىنە بيۋدجەتتەن بولىنگەن 500 ملن. تەڭگەگە قالا تىنىسىنا جاڭا سەرپىن بەرگەن، ەكولوگيالىق تازا، ەڭ باستىسى مۇمكىندىگى شەكتەۋلى ازاماتتارعا قولجەتىمدى 20 اۆتوبۋس الىنعان بولاتىن. وسى جوبانى جالعاستىرۋ ماقساتىندا «بايقوڭىر» الەۋمەتتىك-كاسىپكەرلىك كورپوراسياسى جانە «ەۋروپالىق قايتا قۇرۋ جانە دامۋ» بانكى اراسىنداعى كەلىسىمگە سايكەس اۆتوبۋس پاركىنە قوسىمشا 92 جاڭا اۆتوبۋس الىندى. ناتيجەسىندە، بۇگىنگى كۇنى قالاداعى كىشى سىيىمدىلىقتاعى قوعامدىق كولىكتەردىڭ ورنىنا جاڭادان بارلىق تالاپتارعا سايكەس، جولاۋشىلارعا ىڭعايلى جاعداي جاسالعان ۇلكەن سىيىمدىلىقتاعى 112 اۆتوبۋس نەگىزگى الەۋمەتتىك ماڭىزدى مارشرۋتتار بويىنشا قالا حالقىنا قىزمەت ەتۋدە. سونداي-اق، اۆتوبۋستارعا GPS قۇرىلعىسى ورناتىلىپ، ارا قاشىقتىقتىڭ ساقتالۋى قاتاڭ باقىلانادى. جاڭا قوعامدىق كولىكتەردىڭ بارلىعىندا بەينەكامەرا ورناتىلعان جانە جوسپارعا سايكەس بيلەتتىك جۇيە ەنگىزىلۋدە. سونىمەن قاتار، قالاىشىلىك جانە قالاماڭىنا قاتىنايتىن قوعامدىق كولىكتەردىڭ قىزمەتىن ساپالى ۇيىمداستىرۋ ماقساتىندا قورقىت اتا كوشەسى، تەمىر جول ۆوكزالى مەن سالاماتوۆ كوشەسى بويىندا 3 ديسپەچەرلىك پۋنكت سالىندى.
پىكىر قالدىرۋ