ەلباسى نۇرسۇلتان  ءابىش ۇلى  «قازاقستان - 2030» ستراتەگيالىق دامۋ باعدارلاماسىندا  سالاۋاتتى ءومىر ءسۇرۋدىڭ سالتىن قالىپتاستىرۋ ءۇشىن  دەنە تاربيەسىمەن اينالىسىپ، ەسىرتكى، تەمەكى مەن الكاگولدى تۇتىنۋدى قويىپ، تازالىق پەن سانيتاريا شارالارىن ساقتاۋدىڭ ماڭىزدىلىعىن  ايتقان بولاتىن. وسى ورايدا ەلىمىزدە ەنگىزىلگەن «دەنساۋلىق» مەملەكەتتىك باعدارلاماسىندا  2020 جىلعا قاراي قازاقستان رەسپۋبليكاسى حالقىنىڭ ءومىر ءسۇرۋ ۇزاقتىعى 73 جاسقا دەيىن ۇلعايتۋ ماسەلەسى قويىلعان ەدى. ال سالاۋاتتى ءومىر ءسۇرۋدىڭ بىردەن-بىر جولى – سپورتپەن شۇعىلدانۋ ەكەنى بارشاعا ءمالىم. قالا باسشىسى مۇرات مۇقايەۆتىڭ مالىمەتىنشە، وبلىستا تۇراتىن 630 مىڭنان استام تۇرعىننىڭ 170 مىڭى سپورتپەن شۇعىلدانادى. تۇرعىنداردىڭ دەنساۋلىعىن نىعايتۋ ماقساتىندا وڭىردە 1545 سپورت نىسانى، ياعني ءۇش ستاديون، ءبىر سپورت سارايى، 11 سپورت كەشەنى، ءبىر سپورتتىق مانەج، التى شاڭعى جانە ەكى ەسۋ بازاسى، 101 اتۋ ءتيرى، 965 جازىق عيمارات، 20 تەننيس كورتى، بەس ءجۇزۋ باسسەينى، ءۇش حوككەي كورتى جانە 276 سپورت زالى مەن 151 جاپسارلاس سپورت زالى جۇمىس جاساۋدا. سونىمەن قوسا جەرگىلىكتى تۇرعىنداردى سپورتقا تارتۋ ماقساتىندا بۇقارالىق سپورتتان، كوپشىلىك جۇگىرۋدەن جارىستار ءجيى ۇيىمداستىرىلىپ كەلەدى. جۋىردا عانا وڭىردە سپورت كۇنى تويلانىپ، كوپشىلىك جۇگىرۋگە قاتىسقان تۇرعىندار جەڭىس الاڭىنان اباي الاڭىنا دەيىن جۇگىرىپ ءوتىپ، كەيبىرەۋى ماراپاتتالدى. جالپى دۇنيەجۇزىلىك دەنساۋلىق ساقتاۋ ماماندارى دەنساۋلىققا اسەر ەتەتىن فاكتورلاردىن 50-60%-ى ءومىر ءسۇرۋ دەڭگەيىنە، 20%-ى تۇقىم قۋلاۋشىلىققا، 20%-ى  سىرتقى ورتانىڭ جاعدايىنا، 8-10%-ى دارىگەرلىك كومەكتىڭ دەنگەيىنە بايلانىستى ەكەنىن ايتا كەلىپ، دەنساۋلىق ءۇشىن  كۇرەس سالاۋاتتى ءومىر سالتىن ناسيحاتتاۋعا ارنالعان شارالاردان باستاۋ الاتىندىعىن دالەلدەيدى. سونىمەن قوسا تۇرعىندارعا مەديسينالىق كومەك بەرۋدىڭ قولجەتىمدىلىگى دە ماڭىزدى. وبلىستىق دەنساۋلىق ساقتاۋ باسقارماسى  باسپا ءسوز قىزمەتىنىڭ مالىمەتىنە سۇيەنسەك، تۇرعىندارعا مەديسينالىق كومەكتىڭ قولجەتىمدىلىگىن قامتاماسىز ەتۋ ماقساتىندا قالاداعى التى ەمحاناعا جانە «دەركول» دا-عا ەلەكتروندى كەزەك جۇيەسى ەنگىزىلگەن. ول مەديسينالىق ۇيىم ىشىندە مەديسينالىق قىزمەتتەردى الۋعا پاسيەنتتەردىڭ جولدانۋىن رەتتەيدى. ەلەكتروندى كەزەك پاسيەنتتەرگە قىزمەت كورسەتۋلەر پروسەسىن جوعارى دەڭگەيدە ۇيىمداستىرۋعا مۇمكىندىك بەرەدى. مەديسينالىق قىزمەتتەر ساپاسىن قامتاماسىز ەتۋ ءۇشىن بارلىق مەديسينالىق ۇيىمداردا پاسيەنتتى قولداۋ جانە ىشكى باقىلاۋ قىزمەتتەرى قۇرىلعان.

گۇلىم اقاپ،

باتىس قازاقستان وبلىسى