روسكومنادزور باسشىسى الەكساندر جاروۆ ەگەر دە زاڭنىڭ تالابىن ورىنداماسا، Facebook جەلىسى رەسەيدە بۇعاتتالاتىنىن ايتتى، دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ.

«زاڭ بارلىعىنا بىردەي، سوندىقتان دا كومپانيا زاڭنىڭ كەز كەلگەن تالابىنا جاۋاپ بەرۋى ءتيىس. ولاي بولماعان جاعدايدا، Facebook جەلىسى رەسەي جەرىندە ءوز جۇمىسىن توقتاتادى»، - دەيدى جاروۆ.

ونىڭ ايتۋىنشا، اتالمىش جەلى رەسەيدە وتە تانىمال، كوپ قولدانىسقا يە جانە مۇنى بيلىك جاقسى بىلەدى.

«الايدا الەۋمەتتىك جەلى تەك بىرەۋ عانا ەمەس، باسقا دا جەلىلەر كوپ. سول سەبەپتى Facebook كومپانياسى 242ء-شى زاڭدى قاتاڭ ۇستانعانىن تالاپ ەتەمىز»، - دەپ قوسا ايتىپ ءوتتى الەكساندر جاروۆ.

بەلگىلى بولعانداي، كومپانيا زاڭنىڭ تالابىنا تولىققاندى جاۋاپ بەرۋ ءۇشىن بارلىق جاعدايدى جاساپ وتىر ەكەن.

«ولاردان بىزگە رەسمي حات كەلىپ تۇسكەن جوق. ءبىز 2017 جىلدىڭ سوڭىنا دەيىن اتالمىش جەلىنى باقىلاۋدا ۇستاپ، تەكسەرىپ وتىرامىز، ال 2018 جىلدا ويلانىپ كورەمىز»، - دەيدى جاروۆ.

زاڭدا رەسەيلىكتەردىڭ جەكە مالىمەتتەرىن ەل شەكاراسىندا قۇپيا ۇستاۋ تالاپ ەتىلەدى. روسكومنادزور زاڭىن بۇزعان جەلىلەر ارنايى تىزىمگە ەنىپ، بۇعاتتالاتىن بولادى.