بۇدان بىلاي قازاقستاندىق قۇزىرلى ورگاندار شەتەلدەن كەلگەن ەتنيكالىق قازاقتاردان سوتتالماعانى تۋرالى انىقتامانى تالاپ ەتپيتىن بولدى دەپ سۇيىنشىلەيدى Qamshy.kz اقپارات اگەنتتىگى. ىشكى ىستەر مينيسترلىگىنىڭ كوشى-قون پوليسياسىنان Qamshy.kz اقپارات اگەنتتىگىنە كەلگەن حاتتا جۇڭگو حالىق رەسپۋبليكاسىنان كەلگەن ەتنيكالىق قازاقتاردان «سوتتىلىق تۋرالى» انىقتامانى تالاپ ەتپەيتىنى جازىلعان.
قانداستارىمىزعا تۇراقتى تىركەۋگە تۇرىپ، ىحتيار حات العاندا اتالمىش انىقتامانى كورسەتۋى مىندەتتەلمەيدى.
«سوتتىلىق تۋرالى» انىقتامانى تالاپ ەتۋدىڭ كۇشىن جويۋ تۋرالى تالاي مارتە ايتىلدى. اتالمىش ماسەلە 2015 جىلدان بەرى تالقىلانىپ كەلەدى. وسى ۋاقىتقا دەيىن قانداستارىمىز «سوتتىلىق تۋرالى» انىقتامانى راستاتۋ ءۇشىن تالاي ماشاقاتتى باستان وتكەردى. ول ءۇشىن قانداستارامىز كەڭ بايتاق قازاقستاننىڭ تۇكپىر-تۇكپىرىنەن استانا مەن الماتىعا سابىلۋىنا تۋرا كەلدى.
ەگەر نۇرسۇلتان نازاربايەۆ استانادا وتكەن دۇنيەجۇزى قازاقتارىنىڭ V قۇرىلتايىندا وزەكتى ورتەگەن ماسەلە تۋرالى ايتپاعاندا بۇل ماسەلە ءالى دە شەشىلمەس پە ەدى؟
ەستەرىڭىزگە سالا كەتەيىك، 23 ماۋسىمدا وتكەن دۇنيەجۇزى قازاقتارىنىڭ V قۇرىلتايىندا ەلباسى نۇرسۇلتان نازاربايەۆ ەتنيكالىق قازاقتاردىڭ قۇجاتتى راسىمدەۋ كەزىندە سابىلماۋى كەرەك ەكەنىن باسا ايتتى.
«ەلگە كەلگەننەن سوڭ قۇجات تۇگەندەۋ ءۇشىن ارى-بەرى سابىلۋ بولماۋى كەرەك. جۇڭگو قازاقتارىنىڭ سوتتالعانى نەمەسە سوتتالماعانى تۋرالى انىقتاما الۋ جايى اعايىننىڭ ارعى بەتتەگى ەڭبەگىنە پروبلەمالار تۋعىزادى. ونى شەكارا تۇرعىسىنان سول جەردە انىقتاپ، ەلمەنەن اقىلداسىپ، كەلىسىپ شەشۋ كەرەك!» - دەپ تاپسىرما بەردى نازاربايەۆ.
دۇنيەجۇزى قازاقتارىنىڭ V قۇرىلتايىنداعى مەملەكەت باسشىسىنىڭ تاپسىرماسىن ورىنداۋ ءۇشىن قىتايدان كەلگەن ەتنيكالىق قازاقتاردان قازاقستان رەسپۋبليكاسىندا تۇراقتى تۇرۋعا رۇقساتتى الۋ كەزىندەگى سوتتىلىعى تۋرالى انىقتامانى تالاپ ەتۋدى الىپ تاستاۋدى كوزدەيتىن «شەتەلدىكتەرگە جانە ازاماتتىعى جوق ازاماتتارعا قازاقستان رەسپۋبليكاسىندا ۋاقىتشا جانە تۇراقتى تۇرۋعا رۇقسات بەرۋ قاعيداتتارىن بەكىتۋ تۋرالى» قازاقستان رەسپۋبليكاسى ىشكى ىستەر مينيسترلىگىنىڭ 2017 جىلعى 2 تامىزداعى №529 بۇيرىعى بەكىتىلىپ، ادىلەت مينيسترلىگىندە 2017 جىلدىڭ 6 قىركۇيەگىندە تىركەلدى. وسى بۇيرىق نەگىزىندە قىتايدان كەلگەن ەتنيكالىق قازاقتاردان سوتتىلىعى تۋرالى انىقتاما ەندى تالاپ ەتىلمەيدى.
ق ر ىشكى ىستەر مينيسترلىگىنىڭ Qamshy.kz-كە بەرگەن مالىمەتىنە سايكەس، اتالعان بۇيرىقتى بەكىتپەس بۇرىن، قىتايدان بولەك وزگە ەلدەردەن كەلەتىن ەتنيكالىق قازاقتاردىڭ دا قۇجات راسىمدەۋدەگى جاعدايلارى قاراستىرىلدى. سوعان سايكەس، وزگە ەلدەردە مۇنداي انىقتاما ەش كەدەرگىسىز بەرىلەتىنى انىقتالدى. وزگە ەلدەردەن كەلگەن ەتنيكالىق قازاقتار سوتتىلىعى تۋرالى انىقتامانى وزدەرى تۇرعان ەلدەن ەش كەدەرگىسىز جانە ۋاقىت جوعالتپاي الا الادى. باسقا ەلدەردەن كەلگەن ەتنيكالىق قازاقتاردان سوتتىلىعى تۋرالى انىقتامانى تالاپ ەتپەۋ ماسەلەسىن ءىىم مۇددەلى مەملەكەتتىك ورگاندارمەن بىرلەسە جان-جاقتى زەردەلەگەندە وسىنداي جايتتار انىقتالدى.
اسەم المۇحانبەت
