قىرعىزستان باس پروكۋرورى وش قالاسىندا داۋىستاردى ساتىپ الۋ فاكتىسى بويىنشا قىلمىستىق ءىس قوزعادى دەپ حابارلايدى Qamshy.kz اقپارات اگەنتتىگى. قۇزىرلى مەكەمە مالىمەتىنە قاراعاندا، ەكى ازامات قالا تۇرعىنىنا پرەزيدەنتتىككە "ۇمىتكەر ومىربەك بابانوۆتى قولداۋ ءۇشىن ەكى مىڭ سوم ۇسىنعان".
باس پروكۋراتۋرا باسپا ءسوز قىزمەتىنىڭ حابارلاۋىنشا، ۇگىت-ناسيحات ناۋقانى كەزىندە داۋىس ساتىپ الۋ فاكتىسى بويىنشا العاش رەت قىلمىستىق ءىس قوزعالىپ وتىر. ءىس وش قالالىق سوتىنا جولداندى. ول 3 قازاندا قارالادى. زاڭ بۇزعاندار 300 مىڭ سوم ايىپپۇل تولەۋدەن باستاپ بەس جىلعا دەيىن باس بوستاندىعىنان ايرىلۋ جازاسىن الۋى مۇمكىن.
داۋىس ساتىپ الۋ فاكتىسىنە قاتىستى تاعى ءبىر ماتەريال بىشكەك قالاسىنىڭ اۋداندىق سوتىنا جولداندى. استانالىق ءبىر تۇرعىن ميليسياعا "ونۋگۋۋ-پروگرەسس" پارتياسى شتابىنىڭ وكىلى سايلاۋشىلار تاۋىپ بەرۋ ءۇشىن 2 مىڭ سوم ۇسىندى" دەپ ارىزدانعان.
قىرعىزستاندا پرەزيدەنت سايلاۋى 15 قازاندا وتەدى.
