«Qazaqstan» تەلەراديوكورپوراسياسى Asia-Pasific Broadcasting Union نەمەسە قىسقاشا ABU دەپ اتالاتىن ازيا-تىنىق مۇحيتتىق حابار تاراتۋ وداعىنا ەندى، دەپ حابارلايدى Qamshy.kz اقپارات اگەنتتىگى.

اتالمىش مۇشەلىك «Qazaqstan» كورپوراسياسىنا ABU وتكىزەتىن سان ءتۇرلى شارالارىنا قاتىسۋعا جول اشادى.

ABU وداعىمەن قارىم-قاتىناستىڭ اياسىندا ازيانىڭ 34 ەلىندە ستانسيالارى بار سپۋتنيكتىك Asiavision تەليەۆيدەنيەسىمەن اقپارات الماساتىن بولادى. ودان بولەك، ABU ءوز قۇرامىنا كىرگەندەرگە ءتۇرلى حالىقارالىق جوبالار اياسىندا باعدارلامالىق، زاڭگەرلىك، كونسالتينگتىك، باسقارۋشىلىق ماسەلەلەر بويىنشا كومەك بەرۋگە ءازىر. جانە تەلەراديوكورپوراسيا قىزمەتكەرلەرىندە ABU ۇيىمداستىراتىن حالىقارالىق سەمينارلار مەن ترەنينگتەرگە قاتىسۋعا مۇمكىندىك پايدا بولادى.

«Qazaqstan» تەلەراديوكورپوراسياسى الەمدىك تەلەنارىققا شىعۋدى كوزدەيدى. سوندىقتان حالىقارالىق سەرىكتەستىكتەردىڭ دامۋىنا ۇلكەن ءمان بەرەدى. ال ABU-عا مۇشە بولۋ – وسى ستراتەگيا اياسىنداعى ماڭىزدى قادام. سەبەبى، بۇل ىنتىماقتاستىق ABU وداعىنىڭ قۇرامىنداعى 69 مەملەكەتتەگى 272 تەلەراديوكومپانيالارمەن تىعىز ىسكەرلىك قارىم-قاتىناس ورناتۋعا سەپتىگىن تيگىزبەك.

ايتا كەتەيىك، Asia-Pasific Broadcasting Union كوممەرسيالىق ەمەس كاسىبي قاۋىمداستىعى 1964 جىلى قۇرىلعان. ول ازيا مەن مۇحيت ايماعى ەلدەرىنىڭ حابار تاراتۋ ۇيىمدارىن بىرىكتىرەدى. اتالمىش وداقتىڭ ماقساتى – حابار تاراتۋشىلار اراسىنداعى ىنتىماقتاستىقتى نىعايتۋ.