ق ر پرەمەر-مينيسترى باقىتجان ساعىنتايەۆ «قازاقستان رەسپۋبليكاسىنىڭ پرەمەر-مينيسترى، پرەمەر-مينيسترىنىڭ ورىنباسارلارى جانە پرەمەر-مينيسترى كەڭسەسىنىڭ باسشىسى اراسىندا مىندەتتەردى ءبولۋ تۋرالى» وكىمگە قول قويدى، دەپ حابارلايدى Qamshy.kz اقپارات اگەنتتىگى پرەمەر-مينيستردىڭ رەسمي سايتىنا سىلتەمە جاساپ.

قۇجاتقا سايكەس، پرەمەر-مينيستردىڭ قاراۋىنا ەكونوميكالىق، قارجى، فيسكالدىق جانە كەدەن ساياساتىنىڭ، مەملەكەتتىك بيۋدجەتتىڭ ستارتەگيالىق ماسەلەلەرى، قورعانىس جانە قۇقىقتىق ءتارتىپ، مۇناي-گاز سەكتورىن دامىتۋ، مەملەكەتتىك اكتيۆتەردى باسقارۋ، مەملەكەتتىك ورگانداردىڭ اكىمشىلىك رەفورماسىن ىسكە اسىرۋ، مەملەكەتارالىق قاتىناستار مەن حالىقارالىق ىنتىماقتاستىق، شەتەلدىك ينۆەستيسيالار تارتۋ، ينۆەستيسيالىق احۋالدى جاقسارتۋ جانە باسقالارى كىرەدى.

ق ر پرەمەر-مينيسترىنىڭ ءبىرىنشى ورىنباسارى اسقار ماميننىڭ مىندەتتەرىنە ەكونوميكانى جەدەل باسقارۋ جانە وڭىرلىك ساياسات، كولىك ينفراقۇرىلىمىن جانە لوگيستيكانى دامىتۋ، قۇرىلىستى دامىتۋ جانە تۇرعىن ۇي-كوممۋنالدىق شارۋاشىلىقتى جاڭعىرتۋ ماسەلەلەرى جاتادى. سونىمەن قاتار اسقار مامين قورعانىس-ونەركاسىپ كەشەنىن دامىتۋ، توتەنشە جاعدايلار جانە جۇمىلدىرۋ جۇمىسى، عارىش قىزمەتى، ەنەرگيا ۇنەمدەۋ جانە ەنەرگيا تيىمدىلىگىن ارتتىرۋ، ەنەرگيانىڭ جاڭارتىلاتىن كوزدەرى، كومىر ونەركاسىبى، اتوم ونەركاسىبى جانە يادرولىق ەنەرگەتيكا، يننوۆاسيالار، تەحنيكالىق رەتتەۋ، ەلەكتر ەنەرگەتيكاسى، گەولوگيا جانە جەر قويناۋىن پايدالانۋ، مۇناي حيمياسى، ەكسپورتتىق باقىلاۋ، قورشاعان ورتانى قورعاۋ، جىلىتۋ ماۋسىمىنا دايىندىق جانە ونى وتكىزۋ جانە باسقا دا ماسەلەلەر كىرەدى.

پرەمەر-مينيستردىڭ ءبىرىنشى ورىنباسارىنىڭ قىزمەت اياسىنا سونىمەن قاتار ارنايى ەكونوميكالىق جانە يندۋستريالىق ايماقتاردى دامىتۋدى ۇيلەستىرۋ، ەۋرازيالىق ەكونوميكالىق وداق شەڭبەرىندە ىنتىماقتاستىق ماسەلەلەرى جاتقىزىلادى.

ق ر پرەمەر-مينيسترىنىڭ ورىنباسارى ەربولات دوسايەۆتىڭ مىندەتىنە ەل ەكونوميكاسىن ءۇشىنشى جاڭعىرتۋدى جوبالىق باسقارۋ، مەملەكەتتىك جوسپارلاۋ جۇيەسى، قارجى سەكتورىن دامىتۋ، ماكروەكونوميكالىق، بيۋدجەت، سالىق جانە كەدەن ساياساتى، شوب پەن مەملەكەتتىك-جەكەشەلىك ارىپتەستىكتى دامىتۋ، سونىمەن قاتار ءبىلىم بەرۋ مەن عىلىمدى دامىتۋ، دەنساۋلىق ساقتاۋ، الەۋمەتتىك جاڭعىرتۋ، جۇمىسپەن قامتۋ، ءدىن، تۋريزم، مادەنيەت جانە سپورت، دەموگرافيا جانە كوشى-قون ساياساتى، تاريف ساياساتىن ۇيلەستىرۋ جانە باسقا دا ماسەلەلەر بەكىتىلگەن.

ق ر پرەمەر-مينيسترىنىڭ ورىنباسارى اسقار جۇماعالييەۆ سالالاردى سيفرلاندىرۋ جانە سيفرلىق ەكونوميكانى دامىتۋ، اقپاراتتاندىرۋ، بايلانىس جانە اقپاراتتىق قاۋىپسىزدىك، «ەلەكتروندىق ۇكىمەتتى»، اقپاراتتىق تەحنولوگيالاردى دامىتۋ، مەملەكەتتىك كورسەتىلەتىن قىزمەتتەردى اۆتوماتتاندىرۋ، ەلەكتروندىق كوممەرسيا، سپۋتنيكتىك بايلانىستى دامىتۋ، مەملەكەتتىك اقپاراتتىق ساياساتتى ىسكە اسىرۋ جانە باسقا دا ماسەلەلەردى ۇيلەستىرەدى.

پرەمەر-مينيستردىڭ ورىنباسارى اسقار مىرزاحمەتوۆ اگروونەركاسىپتىك كەشەن، جەر قاتىناستارى، سۋ رەسۋرستارى، ورمان شارۋاشىلىعى، جانۋارلار الەمى، اۋىل شارۋاشىلىعى ماشيناسىن جاساۋ، اۋىلدا ناتيجەلى جۇمىسپەن قامتۋ جانە باسقا دا ماسەلەلەرگە جەتەكشىلىك ەتەدى.