رەسەيلىك اكتەر سەرگەي رومان ۇلى "چەرنوبىل. جات ايماق"، "مەتود"، "ەكيپاج" جانە "اس ءۇي" سەريالدارىندا، سونداي-اق، "ەكيپاج"، "ماچ"، "قوراپ" فيلمدەرىندە ويناعان، قازىرگى ۋاقىتتا "ولگا" تەلەسەريالىنا ءتۇسىپ ءجۇر.  ول جەرگىلىكتى باق-قا بەرگەن سۇحباتىندا ءومىرىن تۇبەگەيلى وزگەرتكەن ءبىر وقيعانى ايتىپ بەردى، دالىرەگى، ءوزىنىڭ ويلاماعان جەردەن قالاي حاق جولعا تۇسكەنىن باياندادى، ― دەپ جازادى Qamshy.kz اقپارات اگەنتتىگى islam.kz سايتىنا سىلتەمە جاساي وتىرىپ.

ول جيىرما جاسىندا يسلام ءدىنىن قابىلداعان (سەرگەي 1992 جىلدىڭ شىلدە ايىنىڭ 16-ى كۇنى تومسك وڭىرىندە دۇنيەگە كەلگەن).

"مەن ءاردايىم قۇدايعا سەنۋشى ەدىم. مەن ءدىندار وتباسىندا دۇنيەگە كەلىپ، شوقىنعان اداممىن. ءوزىمدى قۇدايمەن تىلدەسىپ جۇرگەندەي كۇي كەشەتىنمىن. انام التى جاسىمدا: "ۋايىمداما. ءبارى جاقسى بولادى. قۇداي ءبارىن كورىپ تۇر"، ― دەپ ءوزىن جۇباتاتىنىمدى ايتىپ وتىرادى. سول كەزدە مەن ءبىر جاراتۋشىنىڭ بارىن تۇسىنگەنمىن. نيكولاي چۋدوتۆورەستىڭ يكونىن الىپ، شىركەۋگە ءجيى بارۋشى ەدىم. ون التىعا كەلگەنىمدە ءوزىمدى كوپتەگەن ساۋالدار ءجيى تولعاندىراتىن. وقىدىم، توقىدىم، اقىرى مىناداي شەشىمگە كەلدىم: ءدىن - حالىقتى باسقارۋ قۇرالى. ال قۇداي اركىمنىڭ ءوز ىشىندە. جيىرما جاسىمدا تومسكىگە كەلدىم. ءشامىل ەسىمدى جاقىن دوسىم بولاتىن. وعان قوناققا كەلدىم. ونىڭ ۇلكەن اعاسىمەن پىكىر تالاستىرىپ قالدىق. ءدىن جايىندا، سونىڭ ىشىندە يسلام تۋراسىندا. مەن تەلەديداردان كورسەتىپ جاتاتىن اۆتومات اسىنعان تەرروريستەر دەپ ويلايتىنمىن. ول تاقىرىپپەن قانشالىقتى تانىس ەكەنىمدى سۇرادى. مەن وقىماعانىمدى مويىندادىم. سول سەبەپتى، ارامىزدا اڭگىمە وربىمەدى. ۇيگە كەلگەن سوڭ يسلامدى زەردەلەۋگە كىرىستىم، قىزىق ءۇشىن. نەعۇرلىم تەرەڭدەگەن سايىن سوعۇرلىم بۇرىننان مازالاپ جۇرگەن ساۋالدارىما جاۋاپ تاپتىم. ەندىگى جەردە مەن ءۇشىن ءبارى تۇسىنىكتى ەدى، مەنىڭ ىزدەگەنىم دە وسى بولاتىن. ءبىر اي وتكەن سوڭ ءشامىل بىزدىكىنە كەلدى. ول ونىڭ باۋىرلارىممەن ناماز وقىعانىمدى كورىپ، ايران-اسىر بولدى. ول ءوزى ناماز وقىمايتىن ەدى. سولاي بولدى دەسە دە بولادى: مەن ونى، ال ول مەنى يسلامعا الىپ كەلدىك"،― دەدى ول اعىنان اقتارىلىپ.

جاقىندارى بوزبالانىڭ باسىن اينالدىرىپ العان ەكەن دەپ ويلاپ، الاڭداۋشىلىق بىلدىرگەندە سەرگەي ولارعا ءبارىن ەگجەي-تەگجەيلى تۇسىندىرۋىنە تۋرا كەلگەن. ونى، ءتىپتى، ءوزى ءبىلىم الىپ جۇرگەن جوعارعى وقۋ ورنىنىڭ باسشىلارى، دەكان پروفيلاكتيكالىق اڭگىمە وتكىزىپ، رايىنان قايتارۋعا تىرىسقاندارىن دا جاسىرمادى. كەيىن ونىڭ جات اعىمنىڭ جەتەگىندە كەتپەگەنىن، دۇرىس ءجۇرىپ-تۇراتىنىنا كوز جەتكىزىپ، مازالامايتىن بولعان. ول حاق جولعا تۇسكەنىنە بەس جىل وتكەنىن جەتكىزدى. 

«مەن ءتۇسىرىلىم بارىسىندا شۇجىق جەيتىن كەزدە مەن ءۇشىن قىزمەتكەرلەر حالالىن ساتىپ الدىرتاتىن بولدى»، ― دەيدى سەرگەي رومان ۇلى.