وڭتۇستىك قازاقستان وبلىسىندا جىلىتۋ ماۋسىمىندا گازبەن ۋلانۋدىڭ  24 وقيعاسى تىركەلگەن. سالدارىنان ءيىس تيگەن  46 ادام زارداپ شەگىپ، 11ء-ى كوز جۇمدى.  بۇل تۋرالى بۇگىن وڭىرلىك كوممۋنيكاسيالار قىزمەتىندە بريفينگ وتكىزگەن توتەنشە جاعدايلار قىزمەتكەرلەرى ءمالىم ەتتى، دەپ حابارلايدى Qamshy.kz اقپارات اگەنتتىگى. 

سالا ماماندارىنىڭ سوزىنشە، گازبەن ۋلانعان جاعدايلاردىڭ باسىم كوپشىلىگى ۇيقىعا باس قويعان كەزدە، ال تىركەلگەن 24 وقيعانىڭ ىشىندە 21ء-ى جەكە تۇرعىن ۇيدە، 3-ەۋى كوپقاباتتى ءۇي مەن قوعامدىق مونشادا بولعان. تۇرعىندار پەشتەرگە جارامسىز جابدىقتاردى پايدالانىپ،  ءوز بەتتەرىنشە ورنالاستىرۋى وسىنداي قايعىلى جاعدايلارعا سوقتىردى.

سونىمەن قاتار تۇرمىستىق گاز قۇرىلعىلارىن پايدالانۋ كەزىندە ءورت قاۋىپسىزدىك قاعيدالارىنىڭ بۇزىلۋى دا يىستەنۋگە سەبەپ بولىپتى.

«وبلىس بويىنشا جىلىتۋ ماۋسىمى 2017 جىلعى 15 قازاندا باستالادى.  دەپارتامەنت   جىلىتۋ ماۋسىمىندا ورىن العان كەلەڭسىز وقيعالاردىڭ قايتالانۋىنىڭ الدىن الۋ بويىنشا ءىس-شارالاردى باستاپ كەتتى. قىركۇيەك ايىنان باستاپ جىلىتۋ ماۋسىمىنا دايىندىق جۇمىستارى جۇرگىزىلۋدە. تۇرعىن ءۇي سەكتورلارىندا ۇگىت-ناسيحات جۇمىستارىن جۇرگىزۋ ءۇشىن «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» ءمم-سىنىڭ قىزمەتتەن بوس جەكە قۇرامى تولىق جۇمىلدىرىلعان.  پوليسيا قىزمەتكەرلەرىمەن بىرلەسىپ، الەۋمەتتىك قاۋىپ-قاتەر توبىنا جاتاتىن زەينەتكەرلەر، كوپ بالالى، تۇرمىسى ناشار وتباسىلار، الەۋمەتتىك بەيىمدەلمەگەن ازاماتتاردىڭ ءومىر سۇرەتىن ورىندارىندا 27 رەيد وتكىزىلدى»،- دەيدى    وبلىستىق تجد ءورت قاۋىپسىزدىگى سالاسىنداعى باقىلاۋ جانە پروفيلاكتيكالىق قىزمەت باسقارماسى باستىعىنىڭ ورىنباسارى باۋىرجان ءىزباساروۆ.

توتەنشە جاعداي قىزمەتكەرلەرى ءتىپتى ءتۇسىندىرۋ جۇمىستارىن جۇرگىزۋگە جەرگىلىكتى ءدىني بىرلەستىكتەر دە تارتىلعانىن ايتادى. مەملەكەتتىك ءورت باقىلاۋ ينسپەكتورلارى جۇما نامازدان كەيىن جينالعان قاۋىمعا تۇرعىن ءۇي سەكتورلارىندا ءورت قاۋىپسىزدىگىن  ساقتاۋ تۋرالى تۇسىندىرمە جۇمىستارىن وتكىزىپ جاتقانىن ءسوز ەتتى.