جاپونيانىڭ پوليسيا قىزمەتكەرلەرى توكيوداعى مەكتەپتەردىڭ بىرىنە جاقىن كوپىرگە سابان قۋىرشاقتى ءىلىپ، وعان ءقاۋىپتى جازۋ قالدىرعان ەر ازاماتتى ۇستادى،-دەپ حابارلايدى Qamshy.kz اقپارات اگەنتتىگى. مۇنداي ارەكەتكە بارعان ەر ازاماتتىڭ ايتۋىنشا مەكتەپ وقۋشىلارى وتە قاتتى شۋلايدى ەكەن.

جاپونيادا «ۆارانينگە» دەپ اتالاتىن قۋىرشاقتى 26 قىركۇيەكتە «ەدوگاۆا» مەكتەبىنىڭ ماڭىنداعى جاياۋ جۇرگىنشىلەرگە ارنالعان كوپىردەن تاپقان. ال وعان جابىستىرىلعان حاتتا بىلاي دەپ جازىلعان: «وسى جەردەن سەكىرىپ ولىڭدەر، وڭباعاندار!».

ونى جازعان ەر ادام 41 جاستاعى تاكەشي ينابا بولعان. ول وقۋشىلاردىڭ شۋىنا شىداي الماي وسى ارەكەتكە بارعانىن مويىنداعان. وسىعان دەيىن ول مەكتەپ باسشىلارى مەن اتا-انالارعا شۋدى توقتاتۋ تۋرالى 30-عا جۋىق حات جازعان. وعان قوسا، ول جۇرگەن جەرىندەگى قوعامدىق ورىندىقتارعا «بالالاردان وتە قاتتى شۋ ەستىلەدى» دەگەن جازۋ قالدىرىپ جۇرگەن. تاكەشيدىڭ بۇل قىلىعى ءۇشىن پوليسيا قىزمەتى «زاڭسىز جولمەن قىسىم كورسەتتى» دەگەن جالا جابۋى مۇمكىن نەمەسە ونى پسيحيكالىق تەكسەرۋدەن وتكىزۋى ىقتيمال.