مونوپولياعا قارسى ورگاندار ەنەرگەتيكا ءمينيسترى قانات بوزىمبايەۆ اتاپ وتكەن بەنزين باعاسىنىڭ كوتەرىلۋىنە سەبەپ بولعان فاكتورلاردى تەكسەرىپ جاتىر، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"جانار-جاعارماي ماتەريالدارىنىڭ باعاسى جايلى. باعا جاقىندا عانا كوتەرىلدى جانە بۇل وبەكتيۆ فاكتورلارمەن بايلانىستى. مىسالى، ەلىمىزدەگى مۇناي ونىمدەرىنىڭ تاپشىلىعى، جانارمايدىڭ 40 پايىزىنان كوبى رەسەيدەن يمپورتتالۋى. رەسەيدە ءقازىر بەنزين وتە قىمبات، اي-92 بەنزينى توننا ءۇشىن 560 دوللاردان اسادى. ءبىز مونوپولياعا قارسى ورگانداردىڭ اتىنان نارىقتاعى ويىنشىلاردىڭ بارلىعىنا ساۋال جولدادىق. نارىققا جانە باعانىڭ كوتەرىلۋىنە اسەر ەتىپ جاتقان فاكتورلارعا تالداۋ جاساپ جاتىرمىز"، - دەدى ۇلتتىق ەكونوميكا ۆيسە-مينيسترى سەرىك جۇمانعارين.

ونىڭ ايتۋىنشا، باعانىڭ جوعارىلۋىنا نەگىز بار بولسا، ەنەرگەتيكا مينيسترلىگى وزدەرىنىڭ ساياساتى اياسىندا وسى ماسەلەنى شەشىپ، جاڭا جىلدان باستاپ قازاقستاندى ءوزىنىڭ مۇناي ونىمدەرىمەن قامتاماسىز ەتۋى كەرەك.

"جازدا كوتەرىلگەن باعالار جايلى ايتاتىن بولساق، جاقىندا تەرگەۋ جۇمىستارىن اياقتادىق. جانار-جاعارماي ماتەريالدارىن كوتەرمە ساۋدا باعاسىمەن ساتاتىن بىرنەشە ءىرى كومپانيا جازالاندى. ولارعا ايىپپۇل سالىندى. قازىرگى ۋاقىتتا سوت ءوتىپ جاتىر، ولار مونوپولياعا قارسى ورگانداعىلاردىڭ ارەكەتىمەن كەلىسپەي جاتىر"، - دەدى سەرىك جۇمانعارين.

ەسكە سالا كەتەيىك، وسىعان دەيىن باقىتجان ساعىنتايەۆ مونوپولياعا قارسى قىزمەتتەگىلەرگە بەنزين باعاسىنا قاتىستى ماسەلەنى شەشۋدى تاپسىرعان بولاتىن.