بەلگىلى اقىن، كوپتەگەن ءان ولەڭدەرىنىڭ اۆتورى يبراگيم يسايەۆ دۇنيەدەن وزدى. بۇل سۋىت حابار تۋرالى جۋرناليست قانىشايىم بايداۋلەت ءوزىنىڭ فەيسبۋكتەگى پاراقشاسىندا جازدى. مارقۇمنىڭ جاقىندارى مەن تۋىستارىنا قايعىرىپ كوڭىل ايتامىز.
يبراگيم يسايەۆ - 1949 جىلى 7 قاڭتاردا قىزىلوردا وبلىسىنا قاراستى سىرداريا اۋدانىنىڭ جەتىكول اۋىلىندا تۋعان. قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن سىرتتاي وقىپ بىتىرگەن. سىرداريا اۋداندىق گازەتىندە ادەبي قىزمەتكەر، قىزىلوردا وبلىستىق حالىق تۆورچەستۆوسى ۇيىندە نۇسقاۋشى-مەتوديست، قازاقستان جازۋشىلار وداعىنىڭ كوركەم ادەبيەتتى ناسيحاتتاۋ بيۋروسىندا تىلشى-ادىسكەر، «ارا» جۋرنالىندا فەلەتونشى، «جالىن» الما-ناحىندا رەداكتور، «ساحنا-سەنا» جۋرنالىندا باس رەداكتور، «ساقشى — نا ستراجە» گازەتىندە، «اراي» جۋرنالىندا ءبولىم مەڭگەرۋشىسى بولىپ قىزمەت ىستەگەن.
ولەڭدەرى ءبىرقاتار شەتەل تىلدەرىنە اۋدارىلعان. كوپتەگەن ءان ماتىندەرىنىڭ اۆتورى. «ءان-اعا» اتتى ءان البومى شىققان.
كومي اقىنى ي.كۋراتوۆ، ورىس اقىنى ن.رۋبسوۆ ولەڭدەرىن قازاقشا سويلەتكەن.
«ەڭبەكتە ۇزدىك شىققانى ءۇشىن» مەدالىمەن ماراپاتتالعان.
شىعارمالارى:
- التىن سىرعا. ولەڭدەر. ا.، «جازۋشى»، 1974؛
- تاڭ الدىنداعى ءان. ولەڭدەر مەن باللادالار. ا.، «جازۋشى»، 1976؛
- تەربەلەدى قايىڭدار. ولەڭدەر مەن باللادا. ا.، «جالىن»، 1981؛
- جانىمنىڭ جارىعى. ولەڭدەر مەن باللادا. ا.، «جازۋشى»، 1983.
