تۇركيا قاۋىپسىزدىك كۇشتەرى قارجى مينيسترلىگىنىڭ بۇرىنعى 82 قىزمەتكەرىن ۇستاۋ وپەراسياسىن ورىنداۋ ۇستىندە. قارجى مينيسترلىگىنىڭ قىزمەتكەرلەرىنە وپپوزيسيالىق يسلامدى ۋاعىزداۋشى فەتحۋللاح گۇلەنمەن (FETO) بايلانىسى بار دەگەن ايىپ تاعىلدى. بۇل تۋرالى جەرگىلىكتى NTV ارناسى حابارلادى، دەپ جازادى Qamshy.kz اقپارات اگەنتتىگى.
انكارا پروكۋراتۋراسى قاماۋعا وردەر بەردى. بۇگىندە 17 كۇدىكتىنىڭ ۇستالعانى حابارلاندى. ولار FETO مۇشەلەرىنىڭ شيفرلانعان حابارلامالاردى اۋىستىرۋ ءۇشىن قولداناتىن ByLock باعدارلاماسىن پايدالانۋشىلار قاتارىنان بولىپ شىقتى.
ەسكە سالساق، بۇلىكشىلەر توبى 2016 جىلى 16 شىلدەگە قاراعان ءتۇنى تۇركيادا اسكەري توڭكەرىس جاساعان. قاقتىعىستاردىڭ باسى انكارا مەن ىستامبۇلدا بولدى. ناتيجەسىندە 240 تۇرىك ازاماتتارى قازا تاۋىپ، 2 مىڭعا جۋىق ادام جارالاندى. بۇلىكتەن كەيىن تۇركيادا 50 مىڭعا جۋىق ادام قامالىپ، 140 مىڭ مەملەكەتتىك قىزمەتكەر جۇمىستان قۋىلدى.
